ការស្តាប់ គឺមិនដូចគ្នាជាមួយនឹងការលឺនោះទេ ព្រោះថាការលឺនរណាម្នាក់និយាយ មិនគ្រប់គ្រាន់ ដើម្បីយល់ពីអ្វីដែលពួកគេបាននិយាយនោះទេ។ ការស្តាប់ តម្រូវឱ្យមានការផ្តោតអារម្មណ៍ និងមានការវិនិច្ឆ័យ។ ក្នុងពេលជាមួយគ្នានេះដែរ ការស្តាប់ ដើរតួនាទីយ៉ាងសំខាន់ក្នុងការសន្ទនាគ្នា។ នៅក្នុងពិភពអាជីវកម្ម ការមានទំនាក់ទំនងប្រកបដោយប្រសិទ្ធភាព គឺពិតជាមានសារៈសំខាន់ខ្លាំងណាស់។ ដូច្នេះជំនាញមួយដែលសហគ្រិន អ្នកដឹកនាំ និងអ្នកជំនាញគួរមាន គឺការចេះពីរបៀបដែលធ្វើឲ្យអ្នកដ៏ទៃបែរមកស្តាប់ពីពួកគេ។ ទាំងនេះ គឺជាបច្ចេកទេសសាមញ្ញមួយចំនួន ដើម្បីធ្វើឱ្យមនុស្សគ្រប់គ្នាបែរមកស្តាប់នូវអ្វីដែលអ្នកកំពុងនិយាយ មិនមែនគ្រាន់តែលឺពាក្យរបស់អ្នកនោះទេ។
1. ការស្តាប់បានច្រើន
ជាមធ្យម មនុស្សចំណាយពេលប្រហែល 70 ទៅ 80 ភាគរយក្នុងមួយថ្ងៃ ដើម្បីធ្វើការសន្ទនារវាងមនុស្សជុំវិញខ្លួនរបស់ពួកគេ។ ការស្តាប់ អាចចំណាយរយៈពេលប្រហែល 55% របស់មនុស្សម្នាក់ៗ។ ជាមួយនឹងការយកចិត្តទុកដាក់ស្តាប់ជាមធ្យមត្រឹមតែ 25 នាទី ប៉ុណ្ណោះ វាមានន័យថា ព័ត៌មានភាគច្រើនដែលយើងលឺ មិនអាចធ្វើឲ្យយើងចង់ចាំទាំងអស់នោះទេ។ ដូច្នេះ អ្នកត្រូវនិយាយសង្ខេបឲ្យបានច្បាស់ៗ និងប្រើប្រាស់រយៈពេល 25 នាទីឱ្យបានល្អ មុនពេលអ្នកស្តាប់ចាប់ផ្តើមបាត់បង់ការផ្តោតអារម្មណ៍។
អ្នកប្រហែលជាគិតថា ការពន្យល់រឿងមួយឱ្យលម្អិតនឹងធ្វើឱ្យមនុស្សផ្សេងៗយល់ពីអ្នកកាន់តែច្បាស់ ប៉ុន្តែវាមិនតែងតែជាការពិតនោះទេ។ មនុស្សម្នាក់ៗ អាចមានភាពច្របូកច្របល់ នៅពេលទទួលបានព័ត៌មានច្រើនពេកក្នុងពេលតែមួយ ពួកគេអាចផ្លាស់ប្តូរការផ្តោតអារម្មណ៍របស់ពួកគេទៅលើរឿងសាមញ្ញវិញ។ ដូច្នេះ ជំនួសឱ្យការនិយាយច្រើន សូមព្យាយាមនិយាយឲ្យបានតិច ហើយអាចបើកឱកាសឲ្យពួកគេអាចសួរសំណួរបាន។ ដោយផ្តោតលើការបញ្ជូនព័ត៌មានសំខាន់ៗ អាចឲ្យអ្នកស្តាប់សួរសំណួរ ហើយពួកគេនឹងយកចិត្តទុកដាក់ទៅលើចម្លើយរបស់អ្នក។
2. និយាយតិចអំពីខ្លួនឯង
នៅក្នុងជីវិតពិត មនុស្សម្នាក់ៗកម្រចាប់អារម្មណ៍នឹងស្តាប់អំពីខ្លួនអ្នក និងអ្វីដែលអ្នកបានធ្វើណាស់។ យោងតាម លោក Ryan Fold ដែលជាអ្នកនិពន្ធ អ្នកឯកទេសខាងទំនាក់ទំនងនៅ UCI និងជាវាគ្មិន TEDx Talk បានអះអាងថា បញ្ហាក្នុងការទំនាក់ទំនងដែលសំខាន់បំផុតមួយ គឺការឆ្លើយសំណួរ "តើអ្នកបានធ្វើអ្វី?" លោក Fold បានកត់សម្គាល់ឃើញថា ចម្លើយរបស់សហគ្រិនភាគច្រើន គឺវែង និងលម្អិត ។ ដូច្នេះហើយ គាត់បានបង្កើតវិធីសាស្រ្ត 3-1-3 ដើម្បីធ្វើឱ្យទំនាក់ទំនងខាងអាជីវកម្មកាន់តែមានប្រសិទ្ធភាព។ វិធីសាស្រ្តមានបីជំហានសាមញ្ញ៖
- សំណួរដែលត្រូវឆ្លើយ៖ "តើអ្វីជាគោលការណ៍ស្នូលបំផុតនៃគំនិតរបស់អ្នក ពោលគឺបញ្ហាដែលអ្នកកំពុងដោះស្រាយ ដំណោះស្រាយដែលអ្នកកំពុងផ្តល់ជូនដល់អតិថិជន ឬទីផ្សារដែលអ្នកកំពុងដាក់គោលដៅ?"
- ចម្លើយមិនគួរលើសពីមួយប្រយោគសម្រាប់សំណួរមួយនេះ៖ បញ្ហា ដំណោះស្រាយ ទីផ្សារ។
- ជាចុងក្រោយ ចម្លើយទាំងបីនេះ គួរតែត្រូវបានកាត់បន្ថយមកត្រឹមតែមួយប្រយោគ។
ប្រសិនបើអ្នកចង់ឱ្យមនុស្សផ្សេងៗបែរមកស្តាប់ ហើយយល់ពីសាររបស់អ្នក ប្រយោគតែមួយនេះ គួរតែអាចជំនួសការឆ្លើយតបដ៏វែង និងច្របូកច្របល់ដែលអ្នកធ្លាប់ផ្តល់ឱ្យ។
3. យកចិត្តទុកដាក់លើការទាក់ទងគ្នាដោយមិនប្រើពាក្យសំដី
ការប្រាស្រ័យទាក់ទងគ្នាដោយមិនប្រើពាក្យសំដី គឺសំខាន់ក្នុងការបញ្ជូនសាររបស់យើង។ ទឹកដមសម្លេង ភាសាកាយវិការ ទឹកមុខ និងកាយវិការរបស់យើង សុទ្ធតែជាផ្នែកសំខាន់នៃការទំនាក់ទំនង។ របៀបដែលអ្នកឈរ របៀបដែលអ្នកមើល និងសូម្បីរបៀបដែលអ្នកដើរ ក៏អាចបង្ហាញពីចេតនា ភាពស្មោះត្រង់ និងការជឿជាក់លើខ្លួនឯងរបស់អ្នកបាន។ ភាសានិយាយអាចបោកបញ្ឆោតបាន តែការប្រាស្រ័យទាក់ទងដោយមិនប្រើពាក្យសំដី មិនអាចក្លែងបន្លំបានទេ។ប្រសិនបើអ្នកចង់ធ្វើឱ្យមនុស្សដ៏ទៃទៀតស្តាប់ អ្នកត្រូវបង្ហាញថា អ្វីដែលអ្នកកំពុងនិយាយ គឺជាការពិត ហើយសំខាន់។ អ្នកអាចធ្វើឲ្យគេយល់ឃើញថា អ្នកមានទំនុកចិត្ត និងមានភាពស្មោះត្រង់ ប្រសិនបើអ្នក៖
- រក្សាសម្លេងថេរ
- ជៀសវាងការប្រើពាក្យដដែលៗ
- សំឡឹងមើលភ្នែក
- ឈរត្រង់
- រក្សាចង្ការបស់អ្នកឲ្យនៅស្មើ។
4. ការស្តាប់អ្នកដទៃ
ការស្តាប់អ្នកដទៃ អាចធ្វើឱ្យអ្នកបង្កើតទំនាក់ទំនងជាមួយដៃគូសន្ទនារបស់អ្នកបានល្អ។ ផ្តល់ឱ្យពួកគេនូវការយកចិត្តទុកដាក់របស់អ្នក សួរសំណួរ និងសង្ខេបអ្វីដែលអ្នកបានលឺ ដើម្បីបង្ហាញថា អ្នកពិតជាចាប់អារម្មណ៍លើអ្វីដែលពួកគេបាននិយាយ។ មនុស្សភាគច្រើន កាន់តែមានការចាប់អារម្មណ៍ក្នុងការស្តាប់នរណាម្នាក់ ដែលបង្ហាញពីការយកចិត្តទុកដាក់ចំពោះបញ្ហារបស់ពួកគេ។លើសពីនេះទៅទៀត ដោយការស្តាប់អ្នកដទៃ អ្នកអាចរៀនបានច្រើនពីពួកគេ ដែលអាចមានប្រយោជន៍ខ្លាំង នៅពេលដែលអ្នកត្រូវនិយាយឆ្លើយតបទៅពួកគេវិញ។
5. បង្កើតទំនាក់ទំនង
មនុស្សគ្រប់គ្នា ទំនងជាស្តាប់អ្នកដែលពួកគេទុកចិត្ត និងគោរព។ ការនិយាយជាមួយមនុស្សដែលអ្នកធ្លាប់ស្គាល់ មិនថាជាក្រុមគ្រួសារ មិត្តភក្តិ ឬមិត្តរួមការងារ គឺមានភាពងាយស្រួលជាងការនិយាយទៅកាន់មនុស្សដ៏ទៃទៀតនៅពេលដំបូង។ អ្នកអាចមានការសង្ស័យខ្លះទៅលើមនុស្សដែលអ្នកមិនដែលស្គាល់។ ដូច្នេះ វាជារឿងសំខាន់ក្នុងការស្គាល់ពួកគេជាមុន។នៅពេលអ្នកកំពុងផ្តល់គំនិតទៅនរណាម្នាក់ ជំហានដំបូង គឺការសិក្សាអំពីមនុស្សដែលអ្នកនឹងផ្តល់យោបល់ឲ្យគេ។ នោះ គឺដោយសារតែការស្វែងយល់ពីពួកគេ គឺជាវិធីដ៏ល្អបំផុតក្នុងការបង្កើតទំនាក់ទំនងមួយ ដែលនឹងធ្វើឱ្យពួកគេពិតជាស្តាប់អ្នក៕