ក្រុមហ៊ុនហនុមាន ប៊ែវើរីជីស និងផលិតកម្ម បារមី បើកទំព័រប្រវត្តិសាស្ត្រថ្មីមួយជាមួយគ្នា តាមរយៈ ការប្រគំតន្រ្តី “SKULL TOUR” របស់តារាចម្រៀងរ៉េប វណ្ណដា ដែលទើបនឹងបញ្ចប់ ដោយជោគជ័យយ៉ាងត្រចះត្រចង់
ការប្រគំតន្រ្តីនេះបានចាប់ផ្តើមធ្វើឡើងនៅខេត្ត បាត់ដំបង កាលពីថ្ងៃទី 20 ខែសីហា ឆ្នាំ 2022 ដោយសំបុត្រត្រូវបានលក់អស់មុនកម្មវិធី ហើយបានបញ្ចប់ជាមួយនឹងកម្មវិធីចុងក្រោយនៅទីក្រុងភ្នំពេញនៅថ្ងៃទី 17 ខែកញ្ញា ដោយសំបុត្រចូលរួមទស្សនាក៏ត្រូវបានលក់អស់ដូចគ្នា ហើយមានអ្នកគាំទ្រចូលរួមយ៉ាងច្រើនកុះករ។ លោក វណ្ណដា និង ផលិតកម្ម បារមី រួមជាមួយអ្នកឧបត្ថម្ភធំគឺ ក្រុមហ៊ុនហនុមាន ប៊ែវើរីជីស និង អ្នកសហការឧបត្ថម្ភ គឺក្រុមហ៊ុនទូរគមនាគមន៍ សែលកាតបានបង្កើតប្រវត្តិសាស្រ្តដ៏គួរឱ្យរំភើបមួយ ដោយបញ្ចប់ការប្រគំតន្រ្តីសម្រាប់តារារ៉េបដំបូងគេបង្អស់ នៅប្រទេសកម្ពុជាបានយ៉ាងជោគជ័យនាពេលថ្មីៗនេះ។ នេះជាសញ្ញាបង្ហាញថាឆាកតន្ត្រីរបស់ប្រទេសកម្ពុជា នឹងកាន់តែមាន ភាពអស្ចារ្យនិងរន្ទឺខណៈដែលទូតសុច្ឆន្ទៈរបស់ស្រាបៀរហនុមានគឺលោកវណ្ណដាបានផ្តើមប្រវត្តិសាស្ត្រតន្ត្រីដ៏អស្ចារ្យនេះរួចហើយ។យើងបានសង្កេតឃើញថាអ្នកគាំទ្រនៅប្រទេសកម្ពុជាបានត្រៀមខ្លួនរួចជាស្រេចសម្រាប់ចូលរួមការប្រគំតន្ត្រីមួយ ដែលមានគុណភាពរបស់សិល្បករ សិល្បការនីប្រចាំប្រទេសហើយយើងក៏រំពឹងទុកថាការចូលរួមប្រគំតន្ត្រីដែលមានលក់
សំបុត្រនេះ នឹងក្លាយជារឿងធម្មតាមួយនៅក្នុងប្រទេសកម្ពុជា។
ការប្រគំតន្ត្រី ៥ ខេត្តក្រុង ទទួលបានភាពជោគជ័យជាខ្លាំង ដែលនេះជាគម្រោងធំមួយនៅក្នុងគម្រោងជាច្រើនដែលលោក វណ្ណដា និង ក្រុមហ៊ុនហនុមាន ប៊ែវើរីជីស បានសហការរួមគ្នាក្នុងឆ្នាំ 2022 ដោយរាប់បញ្ចូលទាំង ការប្រគំតន្ត្រី វីដេអូចម្រៀង និងវីដេអូឯកសារជាច្រើនទៀត ដែលសុទ្ធសឹងតែជាចំណុចចាប់ផ្តើមដ៏គួរអោយទាក់ទាញ សម្រាប់ទីផ្សារ វិស័យសិល្បៈនៅកម្ពុជា។ គួររំលឹកផងដែរ លោក វណ្ណដា បានសហការ ចេញបទរួមគ្នា ជាមួយសិល្បករក្រៅស្រុកគឺ តារារ៉េបថៃ លោក OG Bobby ដោយនៅក្នុង វីដេអូចម្រៀងបទ “Young Man” នេះក៏មានការឧបត្ថម្ភ ពីក្រុមហ៊ុនហនុមាន ប៊ែវើរីជីស។ The SKULL Tour គឺជាការប្រគំតន្ត្រីចុងក្រោយបង្អស់ ដែលទទួលបានជោគជ័យខ្ពស់ជាខ្លាំងក្នុងចំណោម ការធ្វើការប្រគំតន្រ្តីរបស់ក្រុមហ៊ុនហនុមាន ប៊ែវើរីជីស និង ផលិតកម្ម បារមីទាំងអស់ ដោយចាប់ផ្តើមពីការប្រគំតន្ត្រី SKULL DAY នៅថ្ងៃទី 16 ខែមីនា ឆ្នាំ 2022 ហើយក៏បន្តមក ការប្រគំតន្ត្រី $KULLTHEALBUM នៅថ្ងៃទី 9 ខែមេសា ឆ្នាំ 2022 ហើយក៏មាន ការប្រគំតន្ត្រី ថ្ងៃចូលឆ្នាំខ្មែរដ៏ធំ មានរយៈពេល ៣ ថ្ងៃ នៅ King’s Road។ ការប្រគំតន្រ្តីចុងក្រោយបង្អស់របស់ SKULL Tour នៅក្នុងទីក្រុងភ្នំពេញ ក៏មានការចូលរួមជាកិត្តិយស ពីសិល្បករមកពីផលិតកម្ម Hype Train របស់ប្រទេសថៃ ដែលមានតារាល្បីៗជាច្រើនដូចជា Sprite, OG Bobby, Guygeegee និង Eskiimo មកសម្តែងបើកឆាក សម្រាប់ការប្រគំតន្រ្តីទោល របស់សិល្បករកម្ពុជាលើកដំបូងបង្អស់។
នាយកប្រតិបត្តិក្រុមហ៊ុនហនុមាន ប៊ែវើរីជីស លោក Chas Geschke បានមានប្រសាសន៍ថា “ប្រទេសកម្ពុជាកំពុងឈានចូលយុគសម័យថ្មីមួយ ដោយយើងបានឃើញក្នុងរយៈពេល 12ខែ កន្លងមកនេះ ភាពជោគជ័យរបស់ក្រុមហ៊ុនហនុមាន ប៊ែវើរីជីសបង្ហាញថាប្រជាជនកម្ពុជាបានត្រៀមខ្លួនរួចជាស្រេច ក្នុងការដើរតាមទីផ្សារ របស់ម៉ាកសញ្ញាដើម្បីឆ្ពោះទៅមុខរកភាពរីកចម្រើនមួយកម្រិតទៀត ហើយខ្ញុំពិតជាមានមោទនភាពជាខ្លាំង ដែលក្រុមហ៊ុនហនុមាន ប៊ែវើរីជីសជាអ្នកដឹកនាំភាពផ្លាស់ប្តូរនេះ ជាមួយដៃគូដ៏អស្ចារ្យដូចជា ផលិតកម្ម បារមី និង សិល្បករដ៏មានទេពកោសល្យដូចជាលោក វណ្ណដា ហើយយប់មិញនេះយើងធ្វើបានល្អបំផុតដូចទៅនឹង ពាក្យស្លោករបស់យើង “វិសាលភាព គ្រប់ពេល!”
ការប្រគំតន្រ្តី SKULL Tour គឺជាព្រឹត្តិការណ៍ដ៏សំខាន់មួយនៅក្នុងវិស័យសិល្បៈរបស់ប្រទេសកម្ពុជា ដោយការដាក់លក់សំបុត្រនេះជាការនាំផ្លូវអោយសិល្បករដទៃអាចចាប់ផ្តើមប្តេជ្ញាចិត្តធ្វើការប្រគំតន្រ្តីទោលមួយដែលមាន គុណភាព។ ដូចដែលយើងបានដឹងមកហើយការប្រគំតន្ត្រីនៅប្រទេសយើងភាគច្រើនគឺត្រូវបានបើកឱ្យចូលរួមដោយសេរី និង រៀបចំ នៅកន្លែងដែលបើកចំហ និងមានទីធ្លាធំទូលាយ។ ដោយឡែក ចំពោះ SKULL Tour វិញមានសំឡេង ពន្លឺ និង visual ដែលមានគុណភាព ហើយត្រូវបានរៀបចំឡើងដោយផ្ចិតផ្ចង់ និងយកចិត្តទុកដាក់បំផុតពីក្រុមការងារទាំងអស់នោះ យើងអាចនិយាយបានថា ការប្រគំតន្រ្តី SKULL Tour បានផ្តល់នូវបទពិសោធន៍ពិសេសជាងគេ សម្រាប់អ្នកគាំទ្ររបស់តារាចម្រៀងរ៉េប ដ៏ពេញនិយមបំផុតរបស់កម្ពុជាគឺ លោក វណ្ណដា ។
លោក វណ្ណដា ក៏មានពាក្យពេចន៍ផ្តែផ្តាំផងដែរ “សូមអរគុណអ្នកគាំទ្រទាំងអស់ដែលបានគាំទ្រ SKULL Tour ហើយនិងក្រុមការងារដែលបានសហការគ្នាដើម្បីឱ្យការប្រគំតន្រ្តីនេះដំណើរការបានយ៉ាងរលូន។ ខ្ញុំក៏ចង់អរគុណដល់ក្រុមហ៊ុនហនុមាន ប៊ែវើរីជីស និងសែលកាតជាពិសេសដែលបានជឿជាក់និងគាំទ្រក្តីសុបិនរបស់ខ្ញុំហើយ
ឥលូវនេះវាក៏ បានក្លាយជាការពិត។ អរគុណអ្នកទាំងអស់គ្នា!"
