កាលពីថ្ងៃទី១៥ ខែកក្កដាកន្លងទៅនេះ យោងតាមកាសែត South China Morning Post បានបង្ហាញអោយដឹងថា នៅពេលនេះក្រុមហ៊ុន Denysenko របស់អ៊ុយក្រែនបានបង្ហាញមុខនូវប្រភេទមនុស្សយន្តដ្រូនមួយទៀតរបស់ខ្លួនដែលមានឈ្មោះថា«Odyssey»។Odyssey គឺជាយានមនុស្សយន្តដែលត្រូវបានផលិតឡើងដើម្បីដឹកនូវគ្រឿងភស្តុភារ គ្រឿងបរិក្ខាររបស់ទាហាន និងដើម្បីបំពេញបេសកកម្មជំលៀសទាហានរងរបួសជាដើម។ មនុស្សយន្តដ្រូន Odyssey នេះបង្គុំឡើងដោយបាក់តឺរីដែលមានកំលាំង ១១គីឡូវ៉ាត់ និងអាចធ្វើដំណើរបាន៣០គីឡូម៉ែត្រនៅក្នុងមួយបាក់តឺរី។ ម្យ៉ាងវិញទៀត វាថែមទាំងមានតំលៃថោកជាងប្រភេទដ្រូនដទៃទៀតនាំចូលពីប្រទេសលោកខាងលិចរហូតដល់ទៅ១០ដងឯណោះ។ គួរអោយចាប់អារម្មណ៍ផងដែរថា មកទល់នឹងពេលនេះ អ៊ុយក្រែនមានការពេញនិយមជាខ្លាំងជាមួយនឹងការប្រើប្រាស់មនុស្សយន្តដ្រូនផ្សេងៗ ដោយសង្កេតឃើញថា កន្លងមកនេះ រួមមានដូចជា មនុស្សយន្តដ្រូន GNOM robotic platform, THeMIS vehicle, SkyWiper និង Naval drone ជាដើម។ 

ចំពោះមនុស្សយន្តដ្រូន GNOM robotic platform នេះ វាគឺជាប្រភេទមនុស្សយន្តដ្រូន Killing Robot គឺជាម៉ាស៊ីនកាំភ្លើងយន្តដែលអាចដំណើរការដោយប្រព័ន្ធ AI ដើម្បីធ្វើការកំនត់គោលដៅ និងបាញ់ប្រហារដោយស្វ័យប្រវត្តិបាន។ នេះស្តែងអោយឃើញថាស្របទៅនឹងបរិបទសង្គ្រាមនៃសម័យទំនើប អ៊ុយក្រែនបានរិះគិតរកនូវវិធីជាច្រើនដើម្បីកាត់បន្ថយកំលាំងមនុស្ស និងហនិភ័យនៃការវិនាសនៃមនុស្សជាតិរបស់ខ្លួន។ ក្រោមជំនួយពីប្រទេសលោកខាងលិច និងសហរដ្ឋអាមេរិកក្តី ក៏អ៊ុយក្រែននៅតែបន្តខិតខំស្វែងរកវិធីការពារខ្លួនឯងយ៉ាងសកម្ម។ ជាក់ស្តែងលោក Mykhailo Fedorov ឧបនាយករដ្ឋមន្ត្រីសម្រាប់ការផ្លាស់ប្តូរឌីជីថលរបស់អ៊ុយក្រែនក៏បានជំរុញទឹកចិត្តអោយប្រជាពលរដ្ឋទាំងអស់ចាប់ផ្តើមស្វែងរកថ្នាក់រៀនអនឡាញចំពោះវគ្គសិក្សាពីដ្រូននេះ និងអាចសាកល្បងតំឡើងដ្រូននៅផ្ទះរបស់ខ្លួនរៀងៗខ្លួន នោះពួកគេនឹងអាចសំរេចការផលិតបានដ្រូនប្រមាណជា ១លានគ្រឿងនៅក្នុងមួយឆ្នាំផងដែរ។