នៅថ្ងៃទី០១ ខែសីហាកន្លងទៅនេះ សហរដ្ឋអាមេរិកបានបញ្ចេញនូវប្រព័ន្ធ Supercomputer របស់ខ្លួនជាលើកដំបូងមួយមានឈ្មោះថា «Cassie» ដែលត្រូវបានបង្កើតឡើងដោយប្រើប្រាស់នូវប្រព័ន្ធAI ដ៏ធំទូលាយមួយដើម្បីទប់ទល់ រឺ​​​ប្រើប្រាស់នូវវិធានការប្រឆាំងនឹងការគំរាមកំហែងដោយជីវសាស្រ្ត។ ប្រព័ន្ធនេះផងដែរគឺជាផ្នែកមួយនៃប្រព័ន្ធ Supercomputer ដ៏ធំបំផុតលើពិភពលោក ដែលមានឈ្មោះថា «El Capitan»ដែលសហរដ្ឋអាមេរិកគ្រោងនឹងដាក់ប្រើប្រាស់នៅក្នុងឆ្នាំនេះហើយ។ មិនតែប៉ុណ្ណោះ សហរដ្ឋអាមេរិកក៏ធ្លាប់បានបញ្ចេញផងដែរ តាមរយៈប្រព័ន្ធ Supercomputer នេះ វាមិនមែនជាលើកដំបូងទេ ដែលពួកគេក៏ធ្លាប់បានភ្ជាប់ប្រព័ន្ធនេះទៅនឹង Cloud ដើម្បីទាញប្រយោជន៍ពីប្រព័ន្ធ AI របស់វាសំរាប់ធ្វើការវិភាគ និងស្រាវជ្រាវដល់ផ្នែកការរុករកថាមពល។ សហរដ្ឋអាមេរិកបានបញ្ជាក់ផងដែរថា ប្រព័ន្ធ Supercomputer «Cassie» នេះនឹងជួយដល់ផ្នែកជាច្រើនដូចជា សំរាប់ដល់ការអង្កេត វិភាគបែងចែក និងកំណត់ដឹងទុកមុនពីការគំរាមកំហែងដោយជីវសាស្រ្តណាមួយ ដោយប្រើប្រាស់នូវបច្ចេកវិទ្យា Simulation និង Modeling របស់ប្រព័ន្ធ AI នៃវា ហើយពួកគេក៏នឹងអាចធ្វើការផលិតថ្នាំ រឺរកវិធីសាស្រ្តផ្សេងៗដើម្បីទប់ស្កាត់នឹងការគំរាមកំហែងនេះផងដែរ។ 

យ៉ាងណាមិញនៅក្នុងប្រវត្តិសាស្រ្តនៃពិភពលោក អាវុធជីវសាស្រ្តប្រភេទនេះក៏ធ្លាប់បានបង្កគ្រោះថ្នាក់មហន្តរាយមកលើពិភពលោកជាច្រើនកលិយុគរួចមកហើយ។ ជាពិសេសនៅក្នុងសម័យសង្គ្រាមទំនើបនេះ នៅរយៈពេលប៉ុន្មានសប្តាហ៍ប​​​ន្ទាប់ពីការវាយប្រហារភេរវកម្មថ្ងៃទី១១​​​ ខែកញ្ញា ឆ្នាំ២០០១ ក៏បានរងគ្រោះដោយការគំរាមកំហែងពីអាវុធជីវសាស្រ្តផងដែរ។ ដោយមេរោគ Anthrax ដែលបង្កឡើងដោយបាក់តេរី ត្រូវបានផ្ញើជាប់ទៅជាមួយនឹងសំភារៈមួយចំនួនតាមរយៈប៉ុស្តិប្រៃសណីយ៍ ទៅកាន់បណ្តាប្រព័ន្ធផ្សព្វផ្សាយនានា និងបុគ្គលល្បីៗមួយចំនួន។ ការវាយប្រហារដោយជីវសាស្រ្តបែបនេះ គឺត្រូវបានជឿជាក់ថាជាសង្គ្រាមដែលវាយប្រហារលើផ្នែកស្មារតី និងចិត្តសាស្រ្តដ៏ធ្ងន់ធ្ងរ និងកាលណោះបានធ្វើអោយរដ្ឋាភិបាលខាតបង់ប្រាក់អស់រាប់លានដុល្លាដើម្បីដោះស្រាយលើការកំចាត់មេរោគទាំងនេះ ថ្វីបើវាបានបង្កអោយមនុស្សត្រឹមតែប៉ុន្មាននាក់ប៉ុណ្ណោះបានឆ្លង និងមានត្រឹម៥នាក់ប៉ុណ្ណោះបាត់បង់ជីវិត។ 

ខណៈនៅក្នុងសម័យសង្គ្រាមស៊ីវិលរបស់អាមេរិកវិញ ដែលជាសង្គ្រាមរវាងភាគីខាងជើងហៅថា Union និងភាគីខាងត្បូងហៅថា Confederacy ក៏មានការផ្ទុះឡើងនៃការប្រើប្រាស់អាវុធជីវសាស្រ្តនេះផងដែរ។ ដោយវេជ្ជបណ្ឌិតភ្នាក់ងាររបស់ភាគី Confederacy មួយរូបដែលមានឈ្មោះថា Luke P.Blackburn បានព្យាយាមបង្ក្រាបទ័ពភាគ Union ដោយការនាំយកសំលៀកបំពាក់ដែលមានផ្ទុកនូវមេរោគ Smallpox ពីអ្នកជំងឺរបស់ខ្លួនទៅលក់អោយកងទ័ព Union។ នៅខណៈនោះផងដែរ ក៏មានការផ្ទុះឆ្លងរីករាលដាលនៃជំងឺ Small Pox នេះជាខ្លាំងក្លានៅក្នុងអាមេរិកខាងជើង។ យ៉ាងណាមិញនៅទីបំផុតនៃសង្គ្រាមនេះ ភាគីខាងជើងទទួលបានជ័យជំនះ ខណៈលោក Luke P.Blackburn ក៏ត្រូវបានប្រកាសចាប់ខ្លួនពីបទរៀបចំគំរោងបង្កការគំរាមកំហែងផ្នែកជីវសាស្រ្តនេះឡើង។