បណ្តាអ្នកលេងបណ្តាញសង្គម Tik Tok ផ្ទុះការចាប់អារម្មណ៍បន្ទាប់ពីឃើញការចែករំលែកតៗគ្នានូវរូបភាពផ្ទាំង Poster នៃកម្មវិធី The Rapper Cambodia រដូវកាលទី២ ដែលមានបង្ហាញឡើងនូវស្រមោលព្រាលៗរបស់សមាសភាព Producer នៃកម្មវិធីទាំងពីររូប។ ដោយនៅលើរូបភាព Poster មួយផ្ទាំងនោះ បានសរសេរឡើងថា «The Next Level, Who is the producer?» ជាមួយនឹងស្រមោលព្រាលរបស់លោកវណ្ណដានៅម្ខាង និងស្រមោលរបស់ Producer ថ្មីមួយរូបទៀតនៅម្ខាង ដែលស្រដៀងគ្នាខ្លាំងទៅនឹងលោកជីដេវីត។ ខណៈអ្នកលេង
បង្ហោះនូវវិដេអូនេះបានសរសេរឡើងជាមួយនឹងខេបសិនថា«ត្រៀមៗរដូវកាលនេះដឹងតែកក្រើកអស់ឋានទាំង៣ហើយ ត្រៀមស្បៀងទុកអោយហើយទៅ»។ ជាមួយគ្នានេះផងដែរ ក៏មានបណ្តាទស្សនិកជនមួយចំនួន បានចោលមន្ទិលសង្ស័យជាខ្លាំង ថានេះប្រហែលត្រឹមជារូបភាពកាត់ត រឺរូបភាពក្លែងក្លាយតែប៉ុណ្ណោះ ដោយពួកគេសង្កេតឃើញថាមានភាគរយតិចណាស់ដែលអ្នកទាំងពីរអាចនឹងមកចាប់ដៃសហការនឹងគ្នា ដោយម្ខាងៗមាន Sponsor ខុសគ្នា។
ទោះជាបែបនេះក៏ដោយ ក៏មានទស្សនិកជនមួយចំនួនទៀតបានអះអាងឡើងថា ភាគរយប្រាកដណាស់ដែលអាចកើតឡើង ព្រោះរូបភាពនេះពិតជាត្រូវបានបង្ហោះនៅលើផេកផ្លូវការរបស់កម្មវិធីពិតមែន គឺ The Rapper Cambodia ប៉ុន្តែត្រឹមតែបង្ហោះភ្លាមប៉ុណ្ណោះ ក៏ត្រូវបានលុបចេញពីផេកវិញយ៉ាងគួរអោយកត់សម្គាល់។ អ្នកមួយចំនួនទៀតក៏បាននិយាយឡើងថា ភាគរយៈដែលអាចកើតឡើងគឺដោយសារតែកម្មវិធី The Rapper Cambodia នាពេលនេះអាចនឹងមិនមានការគាំទ្រផ្តាច់មុខនោះទេ។ ខណៈយ៉ាងនេះផងដែរ ដោយឡែកក៏មានទស្សនិកជនមួយចំនួនទៀត បង្ហាញការសន្និដ្ឋានឡើងថា នេះប្រហែលជារូបរបស់តារារ៉េបរូបផ្សេងនោះទេ អាចជាលោក MC Bull ក៏ថាបាន។ ចុះទស្សនិកជនវិញយល់ឃើញយ៉ាងណាដែរ?
