ការរក្សាទុកនូវអាហារដែលនៅសេសសល់ គឺជាវិធីដ៏ល្អក្នុងការសន្សំប្រាក់។ ក៏ប៉ុន្តែ មានអ្វីដែលអ្នកត្រូវធ្វើ មុនពេលអ្នកចាប់ផ្តើមរកមើលអាហារនៅក្នុងទូរទឹកកករបស់អ្នក ជាពិសេសប្រសិនបើអាហាររបស់អ្នកបានដាក់នៅក្នុងនោះមួយរយៈមកហើយ។ អ្នកត្រូវប្រាកដថា អាហារដែលនៅសល់ នៅតែសមនឹងការទទួលទានបាន។
បន្ទាត់ពេលវេលាខុសគ្នានៃអាហារនីមួយៗ
ពេលខ្លះវាងាយស្រួលក្នុងការប្រាប់ថា តើអាហារដែលនៅសេសសល់ គឺហួសពីចំណុចនៃការបរិភោគហើយឬនៅ។ ក្លិនមិនល្អ ពណ៌មិនស្អាត និងការផ្លាស់ប្តូរដែលមិនចង់បាន សុទ្ធតែជាកត្តាច្បាស់ណាស់ថា អាហារនៅក្នុងទូរទឹកកកយូរពេកហើយ។ អ្នកឯកទេសខាងចំណីអាហារ Amy Shapiro ដែលជាម្ចាស់ក្រុមហ៊ុន Real Nutrition NYC បានពន្យល់ថា អាហារដែលនៅសេសសល់ មិនអាចទុកចោលពេញមួយល្ងាច បន្ទាប់ពីអាហារពេលល្ងាចបានទេ។ នាងណែនាំឱ្យទុកអាហារដែលនៅសល់ក្នុងទូរទឹកកក ក្រោយពេលមិនលើសពីពីរម៉ោង។ បើទុកនៅក្រៅយូរជាងនេះទៅ បាក់តេរីចាប់ផ្តើមលូតលាស់នៅក្នុងអាហារ ដែលអាចជាមូលហេតុមួយក្នុងចំណោមមូលហេតុចម្បងនៃជំងឺដែលបណ្តាលមកពីអាហារ។
នៅពេលដែលអាហារសល់នៅក្នុងទូរទឹកកក ម្ហូបភាគច្រើន គឺល្អសម្រាប់តែបីទៅបួនថ្ងៃប៉ុណ្ណោះ។ អាហារដែលគ្មានសាច់ និងបាយ អាចទុកបានរហូតដល់ទៅប្រាំថ្ងៃ ចំណែកឯសាឡាកំប៉ុងដែលមាន Ham ស៊ុត សាច់មាន់ ម៉ាការរ៉ូនី ឬត្រីធូណាក៏ដូចគ្នា។ នេះជាមូលហេតុដែលវាជាគំនិតល្អក្នុងការបិទស្លាកកាលបរិច្ឆេទទៅនឹងអាហារដែលនៅសេសសល់របស់អ្នក លុះត្រាតែអ្នកមានគម្រោងញ៉ាំវានៅថ្ងៃបន្ទាប់។
