ការឈឺក្បាលភាគច្រើន គឺបណ្តាលមកពីការឡើងរឹងនៃសាច់ដុំក និងក្បាល ដែលត្រូវបានគេស្គាល់ថាជា ការឈឺក្បាលធម្មតា (តាមរយៈ Harvard Health Publishing)។ ការឈឺក្បាលទាំងនេះអាចត្រូវបានបណ្តាលមកពីការស្រេកឃ្លាន ភាពតានតឹង ការគេងមិនលក់ ឬសូម្បីតែការផ្លាស់ប្តូរអាកាសធាតុ។ ចំណែកឯការឈឺក្បាលប្រកាំង ខណៈពេលដែលស្រដៀងទៅនឹងការឈឺក្បាលធម្មតា គឺជាលទ្ធផលនៃការឈឺចាប់ដែលបង្កើតឡើងដោយចុងសរសៃប្រសាទដែលមានប្រតិកម្មខ្លាំងនៅក្នុងខួរក្បាល ហើយជារឿយៗត្រូវបានជួបប្រទះជាទម្រង់ធ្ងន់ធ្ងរនៃការឈឺក្បាល។ ជំងឺឈឺក្បាលប្រកាំងអាចបណ្តាលមកពីផ្សែង ឬពន្លឺភ្លឺខ្លាំង ក៏ដូចជាអាហារមួយចំនួនដូចជា ឈីស ផ្លែបឺរ ប៊័រសណ្តែកដី និងក្រែមជូរ។ ដូច្នេះតើសូកូឡាពិតជាអាហារមួយប្រភេទដែលបណ្តាលឲ្យមានការឈឺក្បាលមែនទេ?

គ្រឿងផ្សំផ្សេងៗនៃសូកូឡាអាចធ្វើអោយប្រសើរឡើង ឬធ្វើអោយឈឺក្បាលកាន់តែធ្ងន់ធ្ងរ

នៅក្នុងការពិនិត្យឡើងវិញឆ្នាំ 2020 ដែលត្រូវបានចេញផ្សាយនៅក្នុងទិនានុប្បវត្តិវិទ្យាសាស្ត្រ Nutrients អ្នកស្រាវជ្រាវបានស៊ើបអង្កេតលើការអះអាងរបស់អ្នកជំងឺថា សូកូឡាជាអាហារកំពូលសម្រាប់ការឈឺក្បាលប្រកាំងរបស់ពួកគេ។ ភ័ស្តុតាងថាតើសូកូឡាគឺជាមូលហេតុផ្ទាល់នៃការឈឺក្បាល គឺមិនគ្រប់គ្រាន់ដើម្បីកំណត់ឲ្យបានច្បាស់នោះទេ ក៏ប៉ុន្តែអ្នកជំនាញជឿថា សារធាតុផ្សំមួយចំនួននៅក្នុងសូកូឡា ដូចជាជាតិកាហ្វេអ៊ីន អាចជាកត្តារួមចំណែកមួយ (តាមរយៈ Healthline)។ សារធាតុផ្សំបន្ថែមដែលមាននៅក្នុងសូកូឡាដូចជា បេតា-ហ្វេនីលទីឡាមីន (beta-phenylethylamine) ត្រូវបានបង្ហាញថាប៉ះពាល់ដល់លំហូរឈាមខួរក្បាល ដែលបង្ហាញពីទំនាក់ទំនងដ៏មានសក្តានុពលទៅនឹងការចាប់ផ្តើមនៃជំងឺឈឺក្បាលប្រកាំង (តាមរយៈ American Academy of Neurology)។

ម្យ៉ាងវិញទៀត សូកូឡាក៏មានផ្ទុកនូវកាកាវ ដែលជាសារធាតុផ្សំដែលអ្នកជំនាញនៅ National Headache Foundation ជឿជាក់ថា ពិតជាអាចជួយសម្រាលការឈឺក្បាលបាន។ យោងតាមការស្រាវជ្រាវ អ្នកនិពន្ធការសិក្សា Paul Durham នៃមជ្ឈមណ្ឌលជីវវេជ្ជសាស្ត្រ និងវិទ្យាសាស្ត្រជីវិតរបស់សាកលវិទ្យាល័យ Missouri State បាននិយាយថា "ទិន្នន័យរបស់យើងគឺជាភស្តុតាងដំបូងដែលគាំទ្រថារបបអាហារដែលសំបូរទៅដោយកាកាវ បង្កើនប្រូតេអ៊ីនដែលការពារកោសិកាសរសៃប្រសាទរបស់អ្នកពីការបញ្ចេញម៉ូលេគុលរលាក ដែលត្រូវបានគេគិតថាពាក់ព័ន្ធនឹងជំងឺឈឺក្បាលប្រកាំង។

ខណៈពេលដែលអ្នកជំងឺឈឺក្បាលប្រកាំងនឹងឆ្លើយតបខុសគ្នាទៅនឹងប្រភេទអាហារផ្សេងៗ National Headache Foundation មិនណែនាំអោយប្រើសូកូឡាដើម្បីព្យាបាលរោគសញ្ញានោះទេ ដោយសារតែវាមានវត្តមានកាកាវតិចតួច ហើយផ្ទុយទៅវិញ ជាតិកាហ្វេអ៊ីន និង tyramine ទំនងជានឹងជំរុញដល់ការឈឺក្បាល៕