ជាការពិតណាស់រឿងសុខភាពភ្នែកត្រូវបានមនុស្សជាលើកមកនិយាយក្នុងសារព័ត៌មាននិងបណ្តាញសង្គមផ្សេងៗ ប៉ុន្តែក៏មានអ្នកបកស្រាយមួយចំនួនបានប្រឌិតឬ បំភ័យមនុស្សអោយខ្លាច និងជឿជាក់ទៅលើពួកគេដោយពុំមានហេតុផលសមរម្យនោះឡើយ។ ដូច្នេះថ្ងៃនេះ យើងខ្ញុំសូមលើកយកប្រធានបទការភ័ន្តច្រឡំទាក់ទងទៅនឹងសុខភាពភ្នែកដែលអ្នកគួរតែដឹង។
១. ការមើលទូរទស្សន៍ក្នុងទីងងឹត
ការលេងវីដេអូហ្គេម ឬមើលទូរទស្សន៍ក្នុងកន្លែងដែលមានពន្លឺតិច មិនបង្កឱ្យមានការខូចខាតដល់ភ្នែករបស់អ្នកខ្លាំងនោះទេ ប៉ុន្តែផ្ទុយគ្នាទៅវីញអេក្រង់ដែលមានពន្លឺភ្លឺខ្លាំង ហើយស្ថិតនៅក្នុងកន្លែងងងឹត អាចបណ្តាលឱ្យភ្នែកអស់កម្លាំង ដែលអាចបណ្តាលឱ្យឈឺក្បាល។ ដូច្នេះ សូមព្យាយាមរក្សាពន្លឺដែលនៅជុំវិញ ហើយកែតម្រូវកម្រិតនៃពន្លឺ និងកម្រិតពណ៌អេក្រង់ ដើម្បីឱ្យត្រូវនឹងពន្លឺក្នុងបន្ទប់។
២. ការងារដែលប្រើប្រាស់កុំព្យូទ័រច្រើន
តើអ្នកចំណាយពេលពេញមួយថ្ងៃនៅមុខកុំព្យូទ័រយួរដៃ ឬកុំព្យូទ័រលើតុ ហើយព្រួយបារម្ភថា វាធ្វើឱ្យភ្នែកអ្នកខូចមែនទេ? បើទោះបីជាវាមិនធ្វើឱ្យប៉ះពាល់ដល់ភ្នែករបស់អ្នកក៏ដោយ វាអាចធ្វើឱ្យភ្នែករបស់អ្នកស្ងួត ដោយសារតែអ្នកបានព្រិចភ្នែកតិច ខណៈពេលដែលកំពុងផ្តោតអារម្មណ៍ចូលទៅក្នុងការងាររបស់អ្នកនៅលើអេក្រង់។ ដូច្នេះ សូមព្យាយាមអង្គុយយ៉ាងតិច 70 សង់ទីម៉ែត្រពីម៉ូនីទ័រ និងប្រើថ្នាំបណ្តក់ភ្នែកពេលមានអារម្មណ៏ថាស្ងួតភ្នែកខ្លាំង។
៣. ការពឹងផ្អែកលើវ៉ែនតា
គ្លីនិក Mayo បានបង្ហាញថា វ៉ែនតាមិនអាចធ្វើឲ្យសុខភាពភ្នែក និងភ្នែកធម្មជាតិរបស់អ្នកមើលឃើញល្អប្រសើរឡើងបានទេ វាគ្រាន់តែជួយសម្រួលរូបភាពអោយធំ និងជិតជាងមុនប៉ុណ្ណោះ។
៤. ការប្រើប្រាស់ភ្នែកច្រើនពេក
មនុស្សមូយចំនួនធំតែងតែយល់ច្រលំថា ភ្នែករបស់ពួកគេអាច "ប្រើអស់" ប្រៀបដូចទៅនឹងថ្មពិលអញ្ចឹង ដូច្នេះពួកគេព្យាយាមថែរក្សាវាដោយជៀសវាងសកម្មភាពដូចជា ការអាន ឬការដេរប៉ាក់។ American Academy of Ophthalmology បានកត់សម្គាល់ថា ការពិត ភ្នែកគឺប្រៀបដូចជាកាមេរ៉ាដែលអាចថតរូបបានពេញមួយជីវិត ហើយអ្នកមិនអាចប្រើអស់ដោយសារអ្នកការប្រើប្រាស់ភ្នែករបស់អ្នកច្រើនពេកឡើយ។
កែសំរួលអត្ថបទ និងរៀបរៀងវីដេអូដោយ BeeTube News Team