1. ណាតូទាមទារឱ្យ Zelensky ចុះញ៉មរុស្ស៊ីជាថ្នូរនឹងសមាជិកភាពណាតូ

យោងតាមសារព័ត៌មាន The Guardian ចុះផ្សាយថ្ងៃទី១៦ ខែសីហាបានអោយដឹងថា មន្ត្រីជាន់ខ្ពស់ណាតូម្នាក់បានសុំទោសនិងបំភ្លឺការអត្ថាធិប្បាយរបស់លោកនៅមួយថ្ងៃបន្ទាប់ពីលោកបាននិយាយជាសាធារណៈថាអ៊ុយក្រែនអាចលះបង់ទឹកដីឱ្យរុស្ស៊ីជាថ្នូរនឹងសមាជិកភាពណាតូ និងការបញ្ចប់សង្គ្រាម។ លោក Stian Jenssen ដែលជាប្រធានបុគ្គលិករបស់អគ្គលេខាធិការអង្គការណាតូ លោក Jens Stoltenberg បានប្រាប់កាសែតន័រវេសថា លោកមិនគួរនិយាយអោយសាមញ្ញដូចអ្វីដែលលោកបានធ្វើនោះទេ បន្ទាប់ពីមតិមុនរបស់លោកបានជំរុញឱ្យមានប្រតិកម្មខឹងសម្បារពីទីក្រុង Kyiv ។ នៅក្នុងព្រឹត្តិការណ៍មួយនៅប្រទេសន័រវេសកាលពីថ្ងៃអង្គារ លោក Jenssen បាននិយាយថា ខណៈពេលដែលកិច្ចព្រមព្រៀងសន្តិភាពណាមួយឈានដល់កំរិតត្រូវតែអាចទទួលយកបានសម្រាប់អ៊ុយក្រែន សមាជិកនៃសម្ព័ន្ធភាពកំពុងតែពិភាក្សាពីមធ្យោបាយដែលធ្វើអោយសង្រ្គាមរយៈពេល 18 ខែអាចត្រូវបញ្ចប់បាន។ លោក Jenssen​​​ បានប្រាប់ទស្សនិកជនរបស់លោកដោយកត់សម្គាល់ការពិភាក្សាអំពីស្ថានភាពក្រោយសង្គ្រាមរបស់អ៊ុយក្រែនកំពុងបន្តនៅក្នុងរង្វង់ការទូតថា"ខ្ញុំគិតថាដំណោះស្រាយមួយអាចជាអោយអ៊ុយក្រែនបោះបង់ទឹកដីរបស់ខ្លួននិងទទួលបានសមាជិកភាពណាតូមកវិញ"។ មួយថ្ងៃក្រោយមកលោកបានផ្តល់បទសម្ភាសន៍ដល់កាសែតដដែល VG ដែលបានរាយការណ៍មតិដើមរបស់លោកថា“សេចក្តីថ្លែងការណ៍របស់ខ្ញុំអំពីរឿងនេះគឺជាផ្នែកមួយនៃកិច្ចពិភាក្សាធំជាងនេះ ដែលនិយាយអំពីសេណារីយ៉ូនាពេលអនាគតដែលអាចកើតមានឡើងនៅអ៊ុយក្រែន ហើយខ្ញុំមិនគួរនិយាយបែបនេះនោះទេ។ វា​ជា​កំហុស​មួយ”។

2. អាមេរិក​ស្នើ​​អ៊ីរ៉ង់​ឈប់​លក់​ដ្រូនឱ្យ​រុស្ស៊ី

យោងតាមសារព័ត៌មាន Reuters ចុះផ្សាយថ្ងៃទី១៦ ខែសីហាបានអោយដឹងថា សហរដ្ឋអាមេរិកកំពុងជំរុញឱ្យប្រទេសអ៊ីរ៉ង់បញ្ឈប់ការលក់ដ្រូនប្រដាប់អាវុធទៅឱ្យប្រទេសរុស្ស៊ី ដែលទីក្រុងម៉ូស្គូកំពុងប្រើប្រាស់ក្នុងសង្គ្រាមនៅអ៊ុយក្រែនក៏ដូចជាគ្រឿងបន្លាស់ដ្រូនដែលជាផ្នែកនៃកិច្ចពិភាក្សារវាងទីក្រុងវ៉ាស៊ីនតោន និងទីក្រុងតេអេរ៉ង់ក្នុងការកាត់បន្ថយភាពតានតឹង។ ដំណឹងនេះកើតឡើងនៅពេលដែលទីក្រុងវ៉ាស៊ីនតោន និងអ៊ីរ៉ង់កំពុងព្យាយាមបន្ធូរបន្ថយភាពតានតឹង និងស្តារឡើងវិញនូវកិច្ចពិភាក្សាទូលំទូលាយអំពីកម្មវិធីនុយក្លេអ៊ែររបស់អ៊ីរ៉ង់។ រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីថ្ងៃអង្គារថា លោកនឹងស្វាគមន៍រាល់វិធានការរបស់អ៊ីរ៉ង់ ដើម្បីកាត់បន្ថយ"ការគំរាមកំហែងនុយក្លេអ៊ែរដែលកំពុងកើនឡើង" របស់ខ្លួន។ ពិភាក្សាទាំងនេះបានធ្វើឡើងទន្ទឹមនឹងការចរចាលើកិច្ចព្រមព្រៀងដោះដូរអ្នកទោសកាលពីសប្តាហ៍មុន។ អ៊ីរ៉ង់បានអនុញ្ញាតឱ្យពលរដ្ឋអាមេរិកជាប់ឃុំខ្លួនចំនួន 4 នាក់ ផ្លាស់ទៅរស់នៅក្នុងការឃុំឃាំងក្នុងផ្ទះពីពន្ធនាគារ Evin នៃទីក្រុងតេអេរ៉ង់ ខណៈដែលមនុស្សទី 5 បានស្ថិតនៅក្នុងការឃុំឃាំងក្នុងផ្ទះរួចហើយ។ កាលពីសប្តាហ៍មុន ប្រភពបានប្រាប់រ៉យទ័រថា អ៊ីរ៉ង់អាចដោះលែងពលរដ្ឋអាមេរិកចំនួន 5 នាក់ដែលត្រូវបានឃុំខ្លួនជាផ្នែកមួយនៃកិច្ចព្រមព្រៀងដើម្បីលែងបង្កកប្រាក់ចំនួន 6 ពាន់លានដុល្លារបស់អ៊ីរ៉ង់នៅកូរ៉េខាងត្បូង។

3. ចិន​សាងសង់​ផ្លូវអាកាស​លើ​កោះ​​ជិត​បំផុត​របស់ខ្លួន​ទៅកាន់​​វៀតណាម

យោងតាមសារព័ត៌មាន The Drive ចុះផ្សាយថ្ងៃទី១៥ ខែសីហាបានអោយដឹងថា ប៉ុន្មានសប្តាហ៍ចុងក្រោយនេះ ប្រទេសចិនបានចាប់ផ្តើមសាងសង់នូវស្ថាបត្យកម្មអាកាសថ្មីនៅលើកោះមួយក្នុងចំណោមកោះដែលខ្លួនបានគ្រប់គ្រងនៅក្នុងសមុទ្រចិនខាងត្បូង។ តាមរយៈទំហំនៃផ្លូវអាកាស ដូចដែលបានឃើញនាពេលបច្ចុប្បន្ននេះ វាពិបាកនឹងដឹងច្បាស់ណាស់ថាបំរើក្នុងគោលបំណងអ្វី។ ទោះជាយ៉ាងណាក៏ដោយ ការសាងសង់សំណង់ប្រភេទនេះនៅទីតាំងជាក់លាក់នៃកោះ Triton បែបនេះ ដែលជាកោះមួយនៅជិតបំផុតក្នុងចំណោមប្រជុំកោះ Paracels ដែលធ្លាប់មានជម្លោះជាមួយប្រទេសវៀតណាម គឺអាចថាប្រាកដជាមានសារៈប្រយោជន៍អ្វីម្យ៉ាង។ ដោយសារកោះ Triton នៅជិតបំផុតនៅក្នុងខ្សែក្រវាត់កោះ Paracels ទៅកាន់ប្រទេសវៀតណាម វាក៏អាចមានប្រតិកម្មពីទីក្រុងហាណូយផងដែរ។ ទោះបីជាចិនជាដៃគូពាណិជ្ជកម្មដ៏ធំបំផុតរបស់វៀតណាម ហើយយោធារបស់ប្រទេសទាំងពីរមានទំនាក់ទំនងជិតស្និទ្ធក្នុងរយៈពេលប៉ុន្មានឆ្នាំមកនេះ ជម្លោះទឹកដីរបស់ពួកគេនៅសមុទ្រចិនខាងត្បូងគឺធ្ងន់ធ្ងរ ដែលភាគីទាំងពីរបានផ្ទុះឡើងនាពេលកន្លងមក។ វាជាការប៉ះទង្គិចគ្នាក្នុងឆ្នាំ 1974 រវាងចិន និងវៀតណាមខាងត្បូង ដែលនាំឱ្យប្រជុំកោះ Paracels ស្ថិតនៅក្រោមការគ្រប់គ្រងជាក់ស្តែងរបស់រដ្ឋាភិបាលនៅទីក្រុងប៉េកាំង។ វៀតណាមខាងជើង និងខាងត្បូងបានបង្រួបបង្រួមគ្នាជាផ្លូវការនៅឆ្នាំ ១៩៧៦។ ក្នុងប៉ុន្មានឆ្នាំថ្មីៗនេះ វៀតណាមក៏កំពុងតែបានពង្រឹងកងជីវពលដែនសមុទ្ររបស់ខ្លួនដើម្បីប្រកួតប្រជែងនឹងការទន្ទ្រានកាន់កាប់របស់ចិនផងដែរ។