កម្មវិធី The Rapper Cambodia បានឈានចូលមកដល់វគ្គ Final និងបញ្ចប់ទៅដោយរលូនកាលពីយប់ម្សិលមិញនេះ ដោយបានរកឃើញហើយម្ចាស់ជ័យលាភីប្រាក់ 10000$ នារដូវកាលទី១នេះ ដែលបានទៅលើលោក Yuuhai កូនក្រុម Team NoNo របស់ Coach Norith តាមរយៈការបោះឆ្នោតរបស់ទស្សនិកជន។ 

យ៉ាងណាមិញក៏សង្កេតឃើញថាមានទស្សនិកជនជាច្រើនបង្ហាញការសោកស្តាយដែលបេក្ខជនសំណព្វចិត្តរបស់ពួកគេដទៃទៀតមិនអាចទទួលពានបាន ដូចជាលោក Goofy, លោក Nightee និងលោក Zedes ជាដើម។ មិនមានការអាក់អន់ចិត្តអ្វីនោះទេ ព្រោះបន្ទាប់មកក៏ឃើញលោក Goofy ដែលជាកូនក្រុមមួយរូបទៀតរបស់ Coach Norith បានបង្ហោះស្តេធឺសឡើងសុំទោសទៅកាន់ហ្វេន និងបង្ហាញការអបអរសាទរដល់មិត្តរបស់ខ្លួនគឺលោក Yuuhai ផងដែរ។ 

ចំណែកលោក Nightee គឺជាបេក្ខជនជើងខ្លាំងមួយរូបទៀត ដែលធ្វើបានយ៉ាងល្អកាលពីម្សិលមិញ ក៏បានបង្ហោះស្តេធឺសអបអរសាទរទៅកាន់លោក Yuuhai ដូចគ្នា រួមទាំងបានបញ្ជាក់ប្រាប់អ្នកគាំទ្ររបស់លោកផងដែរថាលោកបានប្រឹងប្រែងអស់ពីសមត្ថភាពហើយសម្រាប់ការប្រកួតវគ្គផ្តាច់ព្រ័ត្រនេះ។ 

យ៉ាងណាមិញកត់សម្គាល់ឃើញថា នៅក្នុងបទសម្ភាសន៍មួយជាមួយសារព័ត៌មាន Popular Magazine កន្លងទៅនេះ Top7នៃវគ្គផ្តាច់ព្រ័ត្ររបស់យើង ក៏បានធ្វើការទំលាយឡើងទៅនឹងសំណួរមួយដែលបានសួរថាតើនរណាដែលពួកគេយល់ថាជាគូប្រជែងខ្លាំងជាងគេបំផុតរបស់ពួកគេ។ ខណៈពេលនោះផងដែរ សមាជិកភាគច្រើនក៏បានឆ្លើយថាជាលោក Yuuhai នេះឯងដែលជាគូប្រជែងធំជាងគេបំផុត ដែលនេះសបញ្ជាក់អោយឃើញថាសក្តិសមទៅនឹងតំណែងដែលលោកបានគ្រងពិតមែន។

ក្នុងចំណោមនោះដែរ លោក Goofy ក៏បានឆ្លើយចំលើយដែលគួរអោយចាប់អារម្មណ៍ថា លោកសង្ឃឹមថាជា Yuuhai ជាអ្នកលើកពាន ព្រោះកន្លងមកមានគ្នាតែពីរនាក់លោក Yuuhai នេះហើយ ដែលតស៊ូជាមួយគ្នានៅក្នុង Team Nono។ រីឯចំលើយរបស់លោក Yuuhai វិញក៏បានឆ្លើយថា បើលោក​​​មិនបានលើកពាន លោកក៏សង្ឃឹមថាអ្នកដែលលើកពានគឺជាលោក Goofy វិញដែរ។​​​ ចុះទស្សនិកជនយល់ឃើញយ៉ាងណាដែរចំពោះមិត្តភាពរបស់សមាជិក Rapper Cambodia រដូវកាលទី១នេះ?