ក្រុមបារមីលេងមួយក្បាច់ផ្អើលអស់អ្នកនៅកូរ៉េ! កាលពីម្សិលមិញនេះ ក្រុមបារមីបានបញ្ចូន Coach និង Team The Rapper ជ័យលាភីទៅកាន់ប្រទេសកូរ៉េ។ គួរបញ្ជាក់ផងដែរថា កាលពីថ្ងៃទី២១ ខែមេសាកន្លងទៅនេះ ក្រុមហ៊ុនបារមីបានសហការរៀបចំកម្មវិធីប្រគំតន្រ្តីមហាសង្ក្រាន្តខ្មែរនៅកូរ៉េដ៏ធំមួយ ដែលធ្វើឡើងនៅឯក្រុងអានសាន ពហុកីឡដ្ឋានអានសាន ក្រោមការចូលរួមដោយកំពូលសិល្បករទាំងបីរូបរបស់ខ្លួន ដែលរួមមាន Coach Norith, លោក Yuuhai និងលោក Goofy។ តាមរយៈការចែករំលែកនៅលើ Story របស់ពួកគេ គួរអោយកត់សម្គាល់បានថា វាជាការប្រគំតន្រ្តីមួយដែលរៀបចំឡើងមានលក្ខណៈស្តង់ដាបែបកូរ៉េតែម្តងនៅលើឆាកមួយដ៏ធំ ចំណែកឯបងប្អូនទស្សនិកជនចូលរួមទស្សនា និងបង្ហាញការគាំទ្រក៏មានច្រើនសន្ធឹកសន្ធាប់ផងដែរ។
នៅក្នុងថ្ងៃដ៏អស្ចារ្យនោះផងដែរ សង្កេតឃើញថាកំពូលសិល្បកររបស់យើងបានធ្វើការសម្តែងនូវបទមួយចំនួន ដែលនៅក្នុងនោះរួមមាន បទ«ចេតនា» របស់លោក Yuuhai បទ«ក្រមុំស្រុកណា Remix» និងបទ«សង្ក្រាន្ត Jersey» របស់លោក Norith ជាដើម។ គួរបញ្ជាក់ផងដែរថា ការប្រគំតន្រ្តីនេះអាចចូលរួមទស្សនាដោយសេរី និងត្រូវបានរៀបចំដោយក្រុមប្រឹក្សាអភិវឌ្ឍន៍កម្ពុជា និងក្រសួងការងារ និងបណ្តុះបណ្តាលវិជ្ជាជីវៈ ក្រោមការឧបត្ថម្ភដោយស្រាបៀហនុមាន។ ចុះទស្សនិកជនមានចំណាប់អារម្មណ៍យ៉ាងណាដែរសំរាប់ការប្រគំតន្រ្តីដ៏ធំអស្ចារ្យនេះនៅឯប្រទេសកូរ៉េ?
