មួយប៉ព្រិចភ្នែកសោះ លោក Yuuhai បានឈានជើងចូលផលិតកម្មបារមីជាផ្លូវការហើយតាមរយៈកម្មវិធីចុះហត្ថលេខាជាផ្លូវការនៃកិច្ចព្រមព្រៀងទូតសុឆន្ទៈរវាងក្រុមហ៊ុនស្រាបៀហនុមាន និងផលិតកម្មបារមីដែលធ្វើឡើងកាលពីថ្ងៃទី០១ ខែកុម្ភៈកន្លងទៅនេះ។ ក្រៅពីនេះផងដែរ លោក Yuuhai ក៏បានសម្ពោធទម្លាក់បទដំបូងបំផុតរបស់លោកនៅក្នុងថ្ងៃនេះផងដែរ ដែលមានចំណងជើងថា«Going All In»។ ផលិតកម្មបារមីបានបង្ហាញតាមរយៈស្តេធឺសអោយដឹងថា ពួកគេពិតជារីករាយ និងបានត្រៀមខ្លួនរួចជា​​​ស្រេចក្នុងការចែករំលែក ទេពកោសល្យ និងតន្រ្តីរបស់លោក Yuuhai មកកាន់អ្នកគាំទ្រក្នុងវិស័យហ៊ីបហប់។ 

យ៉ាងណាវិញ ខាងលោក Yuuhai វិញផងដែរ ក៏បានអោយដឹងថា រូបលោក និងក្រុមការងារបារមីនឹងមានអ្វីថ្មីៗជាច្រើន ដែលត្រៀមនឹងយកមកបង្ហាញអ្នកគាំទ្រទាំងអស់នៅក្នុងឆ្នាំនេះផងដែរ។ គួរអោយកត់សម្គាល់ផងដែរ តាមរយៈកម្មវិធីចុះហត្ថលេខាជាផ្លូវការនៃកិច្ចព្រមព្រៀងនេះ សង្កេតឃើញថា មានសិល្បករThe Rapper តែមួយចំនួនប៉ុណ្ណោះដែលបានចូលរួមជាមួយនឹងផលិតកម្មបារមី ដោយក្នុងនោះរួមមានកញ្ញា Roxy លោក Goofy និងលោក Yuuhai នេះឯង។ 

ដែលបានធ្វើអោយបណ្តាអ្នកគាំទ្រមួយចំនួនផ្ទុះប្រតិកម្ម និងចោលចង្ងល់ឡើងថាមូលហេតុអ្វីបានជាលោក Zedes ដែលលោកក៏បានជាប់នៅក្នុងចំណោម Top 3 មិនបានបង្ហាញវត្តមាននៅក្នុងកម្មវិធីនេះយ៉ាងដូច្នេះ បែរទៅជាកញ្ញា Roxy វិញបង្ហាញវត្តមានឡើងនៅក្នុងចំណោម Top3 ជាមួយនឹងលោក Yuuhai និងលោក Goofy។ ខណៈនោះផងដែរ ក៏មានបណ្តាអ្នកគាំទ្រមួយចំនួនទៀតបានអះអាងឡើងថា នេះក៏ព្រោះតែដោយសារកញ្ញា Roxy បានទទួលពាន Fan Favorite ផងដែរ។ ចុះទស្សនិកជនវិញយល់ឃើញយ៉ាងណាដែរ?