តំបន់ប្រវត្តិសាស្ត្រយោធាតេជោកោះថ្ម X-16 ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ ព្រំដែនកម្ពុជា-វៀតណាម ដែលទើបត្រូវបានរៀបចំពិធីរំលឹកដល់ដំណើរតស៊ូដ៏អង់អាចក្លាហាន ដើម្បីរំដោះជាតិប្រជាជនកម្ពុជា ព្រមទាំងសម្ពោធសមិទ្ធផលនានា ក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី២០ ខែមិថុនា ឆ្នាំ២០២២នោះ អាចនឹងត្រូវរៀបចំជាតំបន់ទេសចរណ៍ប្រវត្តិសាស្រ្ត ដូចតំបន់ទេសចរណ៍ប្រវត្តិសាស្រ្តអន្លង់វែងផងដែរ ដោយសាតែតំបន់នោះ មានសក្តានុពលផ្នែកទេសចរណ៍ នេះបើតាមគម្រោងរបស់ក្រសួងទេសចរណ៏។
បើតាមឯកសារដែលការិយាល័យយើងទទួលបាន៖
ទី១, ក្រសួងទេសចរណ៍ នឹងសហការជាមួយក្រសួងការពារជាតិ បណ្តុះមគ្គុទេសក៍ពិសេស សម្រាប់តំបន់នេះ ដើម្បីឧទ្ទេសនាមជូនភ្ញៀវទេសចរឲ្យបានយល់ច្បាស់ពីតំបន់នេះ។
ទី២, ក្រសួងទេសចរណ៍ នឹងសហការជាមួយវិស័យឯកជនក្នុងការផ្សព្វផ្សាយអំពីតំបន់ នេះឲ្យបានទូលំទូលាយ និងជម្រុញឲ្យវិស័យឯកជនបញ្ចូលតំបន់នេះ ទៅក្នុងកញ្ចប់ទស្សនកិច្ច សម្រាប់លក់ដល់ភ្ញៀវទេសចរ។
ទី៣, ក្រសួងទេសចរណ៍ នឹងរៀបចំវីដេអូផ្សព្វផ្សាយតំបន់នេះ ឲ្យបានទូលំទូលាយទាំងសម្រាប់ភ្ញៀវទេសចរជាតិ និងអន្តរជាតិ។
ទី៤, ក្រសួងទេសចរណ៍ នឹងរៀបចំឲ្យមានដំណើរទស្សនកិច្ចសិក្សា ពិសេស FAM Trip របស់បណ្តាញព័ត៌មានអន្តរជាតិ ដែលជាដៃគូរបស់ក្រសួងទេសចរណ៍ ដើម្បីរៀបចំ ជាវីដេអូ បទយកការណ៍ និងកម្មវិធីនានា ដើម្បីផ្សព្វផ្សាយនៅលើទីផ្សារអន្តរជាតិ។
ទី៥, ក្រសួងទេសចរណ៍ នឹងបញ្ចូលតំបន់នេះ ទៅក្នុងឧបករណ៍ផ្សព្វផ្សាយនានា របស់ក្រសួង ទេសចរណ៍ (Promotional Materials) ដើម្បីផ្សព្វផ្សាយតំបន់នេះ។
ទី៦, ក្រសួងទេសចរណ៍ នឹងរៀបចំឲ្យមានក្រុមការងារពិសេសមួយ ដើម្បីជម្រុញការអភិវឌ្ឍ និងផ្សព្វផ្សាយតំបន់នេះឲ្យបានទូលំទូលាយ។
តំបន់ប្រវត្តិសាស្ត្រយោធាតេជោកោះថ្ម X16 គឺជាកន្លែងតស៊ូរបស់សម្តេចតេជោ ហ៊ុន សែន ក្នុងដំណើរឆ្ពោះទៅការផ្តួលរំលំរបបប៉ុតពត ថ្ងៃទី២០ ខែមិថុនា ឆ្នាំ១៩៧៧។ ការសាសង់សមិទ្ធផលនានានៅទីតាំងនោះវត្ថុបំណង៖
ទី១. ដើម្បីចារទុកប្រវត្តិសាស្ត្រសម្រាប់មនុស្សគ្រប់ជំនាន់ ពិសេសអប់រំយុវជន និងមនុស្សជំនាន់ ក្រោយឲ្យបានដឹង និងចងចាំព្រឹត្តិការណ៍ជាប្រវត្តិសាស្ត្រដែលប្រទេសកម្ពុជាបាន ឆ្លងកាត់នូវសោកនាដកម្មដ៏ព្រៃផ្សៃ។
ទី២. ដើម្បីរំលឹកដឹងគុណស្ថាបនិកមគ្គុទ្ទេសក៍ឯក និងប្រតិបត្តិករនយោបាយឈ្នះ-ឈ្នះ។
ទី៣. ប្រែក្លាយតំបន់ប្រវត្តិសាស្ត្រកោះថ្ម X16 ឲ្យមានតម្លៃជារមណីយដ្ឋានបម្រើឲ្យវិស័យ វប្បធម៌ ទេសចរណ៍ សេដ្ឋកិច្ច ទំនាក់ទំនងមិត្តភាពរវាងប្រទេស និងប្រជាជនប្រទេស ជិតខាងទាំង២ កម្ពុជា និងវៀតណាម តាមប្រសាសន៍របស់សម្តេចតេជោ៖ “ប្រែក្លាយសមរភូមិ ឲ្យទៅជាទីផ្សារ កសាងព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍន៍”។
សូមបញ្ជាក់ថា កាលពីថ្ងៃទី២០ ខែមិថុនា ឆ្នាំ ២០២២ នេះគឺជាគំរប់៤៥ឆ្នាំ (២០ មិថុនា ១៩៧៧ - ២០ មិថុនា ២០២២) ដែលសម្ដេចតេជោ ហ៊ុន សែន ក្នុងវ័យ២៥ ឆ្នាំរួមជាមួយយុទ្ធមិត្តស្ម័គ្រស្មោះចំនួន៤ រូបផ្សេងទៀតរួមមាន៖ សមមិត្ត នុច ថន, សមមិត្ត ញឹក ហួន, សមមិត្ត សាន សាញ់, និងសមមិត្ត វ៉ា ប៉ោអ៊ាន បានសម្រេចចិត្តចាកចេញពីទឹកដី ចាកចេញពីឧត្តមភរិយា ចាកចេញពីកូនជាទីស្រឡាញ់ ឆ្លងកាត់ព្រំដែនដ៏គ្រោះថ្នាក់បំផុតទៅកាន់ប្រទេសវៀតណាម ដើម្បីស្វែងរកការគាំទ្រក្នុងការរំដោះជាតិ និងប្រជាជនចេញពីរបស់ប្រល័យពូជសាសន៍ ប៉ុល ពត ដ៏សាហាវយង់ឃ្នង។
មានប្រសាសន៏នៅក្នុងពិធីនោះ សម្តេចបានអះអាងថា និយាយជាមួយនាយករដ្ឋមន្ត្រីវៀតណាមរួចហើយ អំពីបំណង ក្នុងការបើកតំបន់នោះ ជាច្រកទ្វារអន្តរជាតិ។ ជាមួយគ្នានោះ សម្តេចតេជោ បានស្នើឲ្យលោក ស៊ុន ចាន់ថុល រដ្ឋមន្រ្តីក្រសួងសាធារណការ ចាប់ផ្ដើមពង្រីកផ្លូវទៅកាន់ទីនោះ ពីព្រោះសម្តេចជឿថា ថ្ងៃក្រោយតំបន់នោះ នឹងក្លាយជាតំបន់ផ្លាស់ប្ដូរសេដ្ឋកិច្ចហើយសម្តេចក៏បានសម្រេចបង្កក់ដីនៅទីនោះប្រមាណជាង១០០០ហិកតា ដើម្បីត្រៀមបម្រុងទុកការបង្កើតតំបន់សេដ្ឋកិច្ចពិសេសផងដែរ។
បើតាមសម្តេចតេជោ ហ៊ុន សែន ការធ្វើដូច្នេះដើម្បីទាក់ទាញអ្នកវិនិយោគទុន បើទោះបីជាពេលនេះ គេមិនទាន់ចាប់អារម្មណ៍ ប៉ុន្តែថ្ងៃក្រោយគេនឹងចាប់អារម្មណ៍ ហើយសម្ដេចក៏បានស្នើឲ្យមានការរៀបចំប្រព័ន្ធទឹក ប្រព័ន្ធភ្លើង សេវាទូរស័ព្ទ ឬសេវាកម្មផ្សេងៗផងដែរ ដើម្បីបម្រើដល់សេចក្តីត្រូវការនៅតំបន់នោះ៕ (មានជ័យ)
