ប្រភពព័ត៌មានពីមន្ទីរទេសចរណ៏ខេត្តសៀមរាបបានឲ្យដឹងថា នៅក្នុងព្រឹត្តិការណ៍អង្គរសង្រ្កាន្ត នៅខេត្តសៀមរាប ចាប់ពីថ្ងៃ១៤ ដល់១៦ ខែមេសា ឆ្នាំ២០២៣ ខាងមុខ  ក្រសួងប្រៃសណីយ៍ និងទូរគមនាគមន៍ បានផ្តល់ជូនការប្រើប្រាស់សេវាអ៊ីនធឺណិតដោយឥតគិតថ្លៃ ហើយល្បឿនលឿនថែមទៀតផង។ ដូច្នេះបងប្អូនប្រជាពលរដ្ឋ សាធារណជនជាតិ និងអន្តរជាតិ អាចស្វែងរកទីតាំងចំនួន១៦ទីតាំង ហើយអាចភ្ជាប់ដោយ QR Code ក្នុងរូប ឬផ្ទាំងដែលដាក់បង្ហាញនៅតាមទីតាំងជាក់ស្តែង ដែលបានកំណត់ ដើម្បីភ្ជាប់ Wi-Fi។ គួររំលឹកថា ខេត្តសៀមរាបឆ្នាំនេះ នឹងប្រារព្ធព្រឹត្តិការណ៍អង្គរសង្ក្រាន្ត គម្រប់ខួប១០ឆ្នាំ ដែលជាមហាព្រឹត្តិការណ៍ដ៏ធំមួយប្រចាំឆ្នាំ។ ជាមួយគ្នានេះផងដែរ ការរៀបចំតាមទីតាំងនីមួយៗ ក៏កំពុងតែញាប់ដៃញាប់ជើង រៀបចំតុបតែងតាមតំបន់រៀងៗខ្លួន ដើម្បីត្រៀមទទួលស្វាគមន៍ភ្ញៀវទេសចរជាតិ និងអន្តរជាតិមកពីគ្រប់ទិសទី ចាប់ពីថ្ងៃ១៤ ដល់១៦ ខែមេសា ឆ្នាំ២០២៣។ ព្រឹត្តិការណ៍អង្គរសង្រ្កាន្តនៅខេត្តសៀមរាប រៀបចំធ្វើឡើងក្រោមប្រធានបទ "ក្ដីស្រមៃ និងសង្ឃឹម"៕