កាលពីថ្ងៃទី០៧ ខែកញ្ញាកន្លងទៅនេះ វត្តមាន Coach និង Producer ទាំង៦រូបនៅក្នុងសន្និសីទសារព័ត៌មាន The Rapper Cambodia បានធ្វើអោយផ្ទុះយ៉ាងកក្រើកនៅឯផ្សារទំនើបអ៊ីអន៣។ ម្យ៉ាងវិញទៀតផងដែរ ក្រៅពីការឆ្លើយនឹងសំណួរ និងការជជែកសំណេះសំណាលគ្នាជាច្រើនជាមួយនឹងបណ្តាអ្នកគាំទ្រចូលរួមទស្សនា អ្វីរឹតតែពិសេសទៀតនោះ គឺបទចម្រៀង Theme Song របស់កម្មវិធី The Rapper Cambodia ក៏ត្រូវបានបញ្ចេញទម្លាយអោយដឹងមុននៅថ្ងៃនោះផងដែរក្រោមបរិយាកាសដ៏សប្បាយរីករាយរាំច្រៀង និងគគ្រឹកគគ្រេង។ 

គួរបញ្ជាក់ផងដែរថា បទប្រចាំកម្មវិធីនេះមានឈ្មោះថា​​​«Who’s Next?» ហើយជាការចូលរួមបកស្រាយដោយកំពូលតារារ៉េបល្បីៗទាំង៦ដួងនេះផ្ទាល់ដែលមានលោក VannDa, Juvie Lin, Khmer1Jivit, KingChi, Norith និងលោក RuthKo។

ចំណែកកាលពីថ្មីៗនេះផងដែរ​​​ ខាងផលិតកម្មបារមីក៏ទើបតែបានបញ្ចេញអោយដឹងថា បទTheme Song «Who’s Next?» នេះនឹងត្រូវបានបញ្ចេញ M/V ជាផ្លូវការនៅក្នុងថ្ងៃទី១៥ ខែកញ្ញាឆាប់ៗនេះហើយ ខណៈដែលកម្មវិធីទាំងមូលនឹងត្រូវចាប់ផ្តើមចាក់បញ្ចាំងឡើងពីថ្ងៃទី១៧ ខែកញ្ញាតទៅ រៀងរាល់ថ្ងៃអាទិត្យចាប់ពីម៉ោង៩ ដល់ម៉ោង ១០:៣០យប់នៅលើកញ្ចក់ទូរទស្សន៍ប៉ុស្តិ៍បាយ័ន និងទំព័រផ្លូវការរបស់ The Rapper Cambodia និងHanuman Beer។

កត់សម្គាល់ផងដែរថា នៅលើឆាណែល Tik Tok របស់ផលិតកម្មបារមីផ្ទាល់ក៏បានបញ្ចេញខេបសិនទាក់ទាញមួយចំនួនអំពីកម្មវិធីនេះ ដូចជា«Big Group Big Thing» និង«ជាលើកដំបូងបំផុតក្នុងវិស័យហ៊ីបហប់ ដែលកំពូលតារាចម្រៀងរ៉េបមកពីផលិតកម្មទាំង៤ធ្វើបទចម្រៀងប្រចាំកម្មវិធីរួមគ្នា»។ ចុះទស្សនិកជនយល់ឃើញយ៉ាងណាដែរ? សូមកុំភ្លេចរង់ចាំទស្សនាកម្មវិធីនេះនៅចុងសប្តាហ៍នេះផងណា!