អង្គការសុខភាពពិភពលោក បានជំរុញឱ្យប្រជាជនលុបចោលផែនការថ្ងៃឈប់សម្រាករបស់ពួកគេមួយចំនួន ដើម្បីការពារសុខភាពសាធារណៈ នៅពេលដែលជំងឺបម្លែងថ្មីអូមីក្រុង មានការរីករាលដាលទូទាំងពិភពលោក។ប្រធានអង្គការសុខភាពពិភពលោក លោកវេជ្ជបណ្ឌិត Tedros Adhanom Ghebreyesus បាននិយាយថា "ព្រឹត្តិការណ៍ដែលត្រូវបានលុបចោល គឺប្រសើរជាងជីវិតដែលត្រូវបានលុបចោល" ដោយបន្ថែមថា "ការសម្រេចចិត្តដ៏លំបាក" ត្រូវតែធ្វើឡើង។
លោកបានបន្តថា៖ ក្នុងករណីខ្លះវានឹងមានន័យថា ការលុបចោល ឬការពន្យារពេលព្រឹត្តិការណ៍។ ឥឡូវនេះមាន "ភស្តុតាងដែលថា ជំងឺបម្លែងថ្មីអូមីក្រុង កំពុងរីករាលដាលលឿនជាង... Delta" ។ ការអត្ថាធិប្បាយរបស់លោកវេជ្ជបណ្ឌិត Tedros បានកើតឡើង នៅពេលដែលប្រទេសមួយចំនួន រួមទាំងប្រទេសបារាំង និងអាល្លឺម៉ង់ ចេញការរឹតបន្តឹងការធ្វើដំណើរ ដើម្បីព្យាយាមបញ្ឈប់ការរីករាលដាលនៃជំងឺទម្រង់ថ្មីនេះ។ ប្រទេសហូឡង់បានដាក់បម្រាមគោចរយ៉ាងតឹងរ៉ឹងក្នុងអំឡុងពេលបុណ្យណូអែល។
សេតវិមានបាននិយាយកាលពីថ្ងៃចន្ទថា ប្រធានាធិបតី Joe Biden មិនមានផែនការលើ "ការដាក់បម្រាមគោចរក្នុងប្រទេស" នោះទេ។ អ្នកជំនាញជំងឺឆ្លងកំពូលរបស់ប្រទេស គឺលោកវេជ្ជបណ្ឌិត Anthony Fauci មុននេះ បានព្រមានថា ការធ្វើដំណើរបុណ្យណូអែលនឹងបង្កើនការរីករាលដាលនៃជំងឺបម្លែងថ្មីអូមីក្រុង សូម្បីតែក្នុងចំណោមអ្នកទទួលថ្នាំ បង្ការពេញលេញក៏ដោយ។ មជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC) និងក្រសួងការបរទេស បានណែនាំប្រជាជនអាមេរិកប្រឆាំងនឹងការធ្វើដំណើរទៅកាន់កន្លែងចំនួន 8 រួមមានប្រទេសអេស្ប៉ាញ ហ្វាំងឡង់ ឆាដ និងលីបង់។
អ្នកជំនាញសុខភាពបាននិយាយថា ជំងឺបម្លែងថ្មីអូមីក្រុង ឥឡូវនេះគឺជាជំងឺដែលមានអ្នកឆ្លងច្រើនបំផុតនៅក្នុងសហរដ្ឋអាមេរិក។
នៅចក្រភពអង់គ្លេស នាយករដ្ឋមន្ត្រី Boris Johnson បាននិយាយកាលពីថ្ងៃចន្ទថា រដ្ឋាភិបាលចាំបាច់ត្រូវ "រក្សាលទ្ធភាព" នៃការនាំយកច្បាប់ថ្មីនៅក្នុងប្រទេសអង់គ្លេស ខណៈដែលករណីជំងឺបម្លែងថ្មីអូមីក្រុង បានកើនឡើង ប៉ុន្តែមិនបានប្រកាសពីការរឹតបន្តឹងបន្ថែមទៀតទេ។ អភិបាលក្រុង Sadiq Khan បាននិយាយថា ការប្រារព្ធពិធីចូលឆ្នាំសកលនៅទីលាន Trafalgar ទីក្រុងឡុងដ៍ ត្រូវបានលុបចោល "ដើម្បីផលប្រយោជន៍សាធារណៈ" ។
ថ្លែងនៅក្នុងសន្និសីទសារព័ត៌មានកាលពីថ្ងៃចន្ទ លោកវេជ្ជបណ្ឌិត Tedros បាននិយាយថា “យើងទាំងអស់គ្នាឈឺដោយសារជំងឺរាតត្បាតនេះ។ យើងទាំងអស់គ្នាចង់ចំណាយពេលជាមួយមិត្តភក្តិ និងក្រុមគ្រួសារ។ យើងទាំងអស់គ្នាចង់វិលមករកភាពប្រក្រតីឡើងវិញ។ មធ្យោបាយលឿនបំផុតដើម្បីធ្វើរឿងនេះ គឺសម្រាប់យើងទាំងអស់គ្នា អ្នកដឹកនាំ និងបុគ្គលម្នាក់ៗ ដើម្បីធ្វើការសម្រេចចិត្តដ៏លំបាកដែលត្រូវធ្វើដើម្បីការពារខ្លួនយើង និងអ្នកដទៃ។”
"ក្នុងករណីខ្លះវានឹងមានន័យថា ការលុបចោល ឬពន្យារពេលនៃព្រឹត្តិការណ៍... វាល្អប្រសើរជាជាង ដើម្បីអបអរឥឡូវហើយសោកសៅពេល ក្រោយ"។ លោកវេជ្ជបណ្ឌិត Tedros ក៏បានសង្កត់ធ្ងន់ថា ជំងឺរាតត្បាតអាចនឹងត្រូវបញ្ចប់នៅឆ្នាំ 2022 ដោយធានាថា 70% នៃចំនួនប្រជាជននៅគ្រប់ប្រទេសនៃពិភពលោក ត្រូវបានចាក់វ៉ាក់សាំងនៅពាក់កណ្តាលឆ្នាំក្រោយ។
អត្ថបទដកស្រង់ពី BBC
បកប្រែនិងកែសម្រួលដោយ Mr. Blue