ព្រះសីហនុ៖ នាវា Westerdam គ្រោងនឹងវិលត្រលប់មកចតនៅកម្ពុជា នាខែអំឡុងខែធ្នូខាងមុខ ខណៈនាវានេះ ធ្លាប់ត្រូវបានរាជរដ្ឋាភិបាល ជួយសង្រ្គោះក្នុងពេលដែលពិភពលោកកំពុងជួបវិបត្តិកូវីដ-១៩ធ្ងន់ធ្ងរ កាលពីពេលកន្លងទៅ។ មានប្រសាសន៍ក្នុងឱកាសបើកការដា្ឋនសាងសង់ចំណតផែកុងតឺន័រខេត្តព្រះសីហនុ និងខួបលើកទី៧០ នៃទំនាក់ទំនងការទូតកម្ពុជា-ជប៉ុន នាព្រឹកថ្ងៃទី១ ខែឧសភា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា កាលពីបីឆ្នាំមុន កំពង់ផែខេត្តព្រះសីហនុ បានទទួលនាវា Westerdam និងសង្គ្រោះជីវិតមនុស្ស ខណ:បណ្តាប្រទេសផ្សេងៗទៀតមិនឲ្យចូលចតឡើយ ដោយសារខ្លាចជំងឺកូវីដ-១៩។ សម្តេចនាយករដ្ឋមន្ត្រីកម្ពុជា មានប្រសាសន៍បញ្ជាក់ថា នៅខែធ្នូ ឆ្នាំ២០២៣នេះ នាវា Westerdam នឹងវិលត្រឡប់មកអរគុណកម្ពុជា ហើយសង្ឃឹមថា នៅក្នុងខែធ្នូខាងមុខ អ្នកដែលធ្លាប់ជាប់គាំងនៅលើនាវា ពួកគេនឹងមកម្តងទៀតដែរ។ សូមបញ្ជាក់ថា កាលពីថ្ងៃទី១៤ ខែកុម្ភៈ ឆ្នាំ២០២០ រាជរដ្ឋាភិបាលកម្ពុជា បានអនុញ្ញាតឱ្យនាវា Westerdam ដែលមានផ្ទុកមនុស្សរាប់ពាន់នាក់ បានចូលចតនៅកំពង់ផែ ខេត្តព្រះសីហនុ ខណៈបណ្ដាប្រទេសនានា មិនឲ្យនាវានេះចូលចតឡើយ ត្បិតព្រួយបារម្ភពីបញ្ហាជំងឺកូវីដ-១៩៕
