លោក ចាង សៅឡុង (Zhang Xiaolong) ឬឈ្មោះជាភាសាអង់គ្លេសថា​អាលែន ចាង (English Name: Allen Zhang) គឺជាអ្នកបង្កើតកម្មវិធី កុំព្យូទ័រដ៏ល្បីល្បាញម្នាក់ ហើយនិងជាស្ថាបនិករបស់ ហ្វក់ស៍ម៉េល (Foxmail) វីឆាត (Wechat) ព្រមទាំងជាអនុប្រធានជាន់ខ្ពស់របស់ក្រុមហ៊ុន ថេនសេន​ថ៍ (Tencent Company)។ ទោះបីជាយ៉ាងណាក៏ដោយ ជីវប្រវត្តិរបស់លោក ចាង សៅឡុង មិនសូវបានលាតត្រដាងជាសាធារណៈ ឬឲ្យបានលំអិតនោះទេ ពីព្រោះលោកជាមនុស្សស្ងាត់ស្ងៀមនិងអាថ៍កំបាំងម្នាក់បើទោះបីជាលោកក្លាយជាបុគ្គលល្បីខ្លាំងទាំងនៅក្នុងប្រទេសចិន​ និងនៅលើពិភពលោកក៏ដោយ។ ដូច្នេះនៅក្នុង “ទំព័រនៃជីវិតជោគជ័យ” របស់យើងថ្ងៃនេះនិងនិយាយរៀបរាប់អំពីប្រវត្តិរបស់លោកខ្លះៗដោយផ្អែកទៅលើឯកសារស្រាវជ្រាវនៅតាមបណ្តាញវេបសាយថ៍ Google ។ 

ជីវប្រវត្តិសង្ខេប 

លោក ចាង សៅឡុង កើតនៅថ្ងៃទី៣ ខែសីហា​ ឆ្នាំ១៩៦៩ នៅក្នុងស្រុក​ ដុងគូ (Dongkou county) ក្រុង សៅយ៉ាង (Shaoyang city) ខេត្ត ហូ៊ណាន (Hunan province) ប្រទេសចិន​ ហើយសព្វថ្ងៃលោកមានអាយុ ៥៣ឆ្នាំ។ លោកបានបញ្ចប់ការសិក្សាទាំងថ្នាក់បរិញ្ញាបត្រ និងអនុបណ្ឌិត ជំនាញខាង ទូរគមនាគមន៍​ (Telecommunications) ពីសាកលវិទ្យាល័យ វិទ្យាសាស្ត្រ និងបច្ចេកវិទ្យា ហួចុង (Huazhong University of Science and Technology) ក្នុងឆ្នាំ១៩៩៤។ 

ប្រវត្តិបទពិសោធន៍ការងារ​

1. ការបង្កើត Foxmail 

ក្នុងឆ្នាំ១៩៩៤ លោក​ចាងសៅឡុងបានចូលធ្វើការនៅគ័ងជូ​ហើយបានចូលរួមក្នុងការអភិវឌ្ឍន៍កម្មវិធី​ Software ។​ ចាប់តាំងពីនោះមក លោកបានបង្កើត ហ្វក់ស៍ម៉េល ដែលជាកម្មវិធី អុីម៉ែលអតិថិជនក្នុងស្រុកដ៏ល្អមួយ។ ក្នុងខែមករា ឆ្នាំ១៩៩៧ ហ្វក់ម៉េល១.០បេតា (FoxMail1.0beta) ត្រូវបានចេញផ្សាយ​និងប្រកាសនៅ វីនសាយត៍​ (Winsite) ហើយលោក ចាង​ សៅឡុង បានក្លាយជាអ្នកបង្កើតកម្មវិធីអុិនធឺណេតជំនាន់ទី១ នៅក្នុងប្រទេសចិន។ Foxmail ត្រូវបានគេស្គាល់ថាជាកម្មវិធី អុីម៉េល ដែលអាចប្រកួតប្រជែងជាមួយ កម្មវិធី Outlook របស់ក្រុមហ៊ុន Microsoft ។ នៅថ្ងៃទី១៨ ខែមេសា ឆ្នាំ២០០០ លោកចាង សៅឡុង បានលក់ Foxmail ទៅឲ្យក្រុមហ៊ុនប៊ូដា (BodaCompany) សម្រាប់តម្លៃ១៨,១៥៨,៩៨០ដុល្លារ ($18,158,980) ហើយបានក្លាយជាអនុប្រធានរបស់ក្រុមហ៊ុននេះ។ នៅថ្ងៃទី១៦ ខែមីនា​ ឆ្នាំ២០០៥ ក្រុមហ៊ុន Tencent បានទិញកម្មវិធី Foxmail ហើយចាង សៅឡុង បានចូលរួមជាមួយថេនសេនថ៍។ លោកគឺជាអ្នកគ្រប់គ្រងទូទៅនៃនាយកដ្ធាន R& D គ័ងជូរបស់ក្រុមហ៊ុន ថេនសេនថ៍។

2. ការបង្កើត Wechat 

Wechat មុនដំបូងត្រូវបានគេគិតថាជាគំនិតរបស់ លោក ប៉ូនី ម៉ា (Pony Ma) ដែលជាស្ថាបនិករបស់ ក្រុមហ៊ុន Tencent តែតាមការពិតវាគឺជាគំនិត និងចក្ខុវិស័យរបស់លោក ចាង សៅឡុង និងក្រុម R& D របស់លោកនៅទីក្រុង គ័ងជូ។ ត្រឡប់ទៅឆ្នាំ២០១០ លោក ចាង សៅឡុង បានរៀបចំក្រុមតូចដំបូងរបស់លោកដែលមានគ្នា១០នាក់ ហើយសុទ្ធតែជាអ្នកអភិវឌ្ឍន៍កម្មវិធីដើម្បីធ្វើការទៅលើ App ផ្ញើរសារតាមទូរស័ព្ទស្មាតហ្វូន។ ជាការពិតមានមនុស្សតិចណាស់ដែលសង្ឃឹមថា​ វីឆាតនឹងទទួលបានជោគជ័យហើយបន្តមានអ្នកប្រើប្រាស់ជាង៦០លាននាក់ ហើយដែលជះឥទ្ធិពលយ៉ាងខ្លាំងដល់សង្គមចិននាពេលបច្ចុប្បន្ន។ ម្យ៉ាងវិញទៀតនៅពេលចាប់ផ្តើមមុនដំបូង មនុស្សជាច្រើនបានយល់ច្រឡំថា Wechat ជាកម្មវិធីរបស់លោកខាងលិច (Western App) ហើយមិនតែប៉ុណ្ណោះ គេសឹងតែមិនជឿថា Wechat ត្រូវបានបង្កើតឡើងដោយក្រុមហ៊ុនតែមួយ។ បន្ទាប់មកនៅឆ្នាំ២០១១ Wechat បានចាប់ផ្តើមដំណើរការហើយបានក្លាយជាកម្មវិធីផ្ញើសារពហុគោលបំណង (Multi-Purpose Messaging) ជា ​App ប្រព័ន្ធផ្សព្វផ្សាយសង្គម និងជាកម្មវិធីទូទាត់ប្រាក់ចល័តហើយវាបានផ្ទុះនិងចាប់ផ្តើមល្បីល្បាញខ្លាំងនៅឆ្នាំ២០១៨ ក្នុងនាមជាកម្មវិធីទូរស័ព្ទចល័តតែមួយគត់ដ៏ធំបំផុតរបស់ពិភពលោក ដោយមានអ្នកប្រើប្រាស់សកម្មប្រចាំខែជាង១ពាន់លាននាក់។ ភាពជោគជ័យនេះ បានធ្វើឲ្យ Wechat ត្រូវបាន ហ្វប់ (Forbes) ដែលជាទស្សនាវដ្តីជំនួញរបស់អាមេរិក (American Business Magazine) បានចាត់ទុកថាជា កម្មវិធីដ៏មានឥទ្ធិពលបំផុតមួយរបស់ពិភពលោក ហើយនៅក្នុងប្រទេសចិន វាគឺជាកម្មវិធីសម្រាប់អ្វីៗគ្រប់យ៉ាង (China’s App for Everything) ហើយជាកម្មវិធីកំពូល (A Super App) ដោយសារតែមុខងារនិងវេទិការដ៏ធំទូលាយរបស់វា។​ Wechat ផងដែរក៏ជា កម្មវិធីផ្ញើសារដ៏ពេញនិយមបំផុតនៅក្នុងប្រទេសប៊ូតាន (Bhutan) ។ 

ពានរង្វាន់ដែល លោក ចាង​​ សៅឡុង​ ទទួលបាន

នៅចុងឆ្នាំ២០១២ គាត់ត្រូវបានជ្រើសរើស ដោយទស្សនាវដ្តី Wall Street ជាភាសាចិន ជាអ្នកឈ្នះពានរង្វាន់វិទ្យាសាស្ត្រនិងបច្ចេកវិទ្យា​នៃពានរង្វាន់មនុស្សច្នៃប្រឌិតរបស់ប្រទេសចិនសម្រាប់ឆ្នាំ២០១២ (The Science and Technology Winner of the 2012 China Creative People Award)។ នៅថ្ងៃទី១១ ខែកុម្ភៈឆ្នាំ២០១៥ លោកចាង​សៅឡុងត្រូវបានជ្រើសរើសជាអ្នកឈ្នះនៅក្នុងព្រឹត្តិការណ៍ “មនុស្សអុិនធឺណេតចិនប្រចាំឆ្នាំ២០១៤” (2014 China Internet Person of the Year)។ នៅថ្ងៃទី១១ ខែឧសភា​ ឆ្នាំ២០១៧ លោក ចាង សៅឡុង បានទទួលពានរង្វាន់ “អតីតនិស្សិតឆ្នើមនៃសាកលវិទ្យាល័យវិទ្យាសាស្ត្រ និងបច្ចេកវិទ្យា ហួចុង (Huazhong)” (Outstanding Alumnus of Huazhong University of Science and Technology)។ 

គោលការណ៍ទាំង ៧របស់លោក ចាង សៅឡុង សម្រាប់បុគ្គលិក

ខាងក្រោមនេះ គឺគោលការណ៍ណែនាំទាំង៧ ចំណុចរបស់លោក ចាង សៅឡុង ផ្ញើជូនបុគ្គលិកទាំងអស់៖ 

1. ចូរធ្វើនូវអ្វីដែលមានតម្លៃសម្រាប់អ្នកប្រើប្រាស់។

2. ចូរប្រកាន់ឲ្យបានខ្ជាប់នូវតម្លៃរបស់យើងពីព្រោះវា​នឹងត្រូវបានឆ្លុះបញ្ចាំងឲ្យឃើញនៅក្នុងផលិតផល និងសេវាកម្មរបស់យើង។ 

3. ចូររក្សាក្រុមឲ្យតូច និងឲ្យមានប្រសិទ្ធភាព។ 

4. ការរៀនសូត្រ និងការធ្វើឱ្យប្រសើរឡើងគឺមានសារៈសំខាន់ជាងបទពិសោធន៍ពីមុន។

5. ចូរប្រើវិធីគិតជាប្រព័ន្ធ

6. ចូរកសាងកេរ្តិ៍ឈ្មោះឲ្យល្អ និងទាក់ទាញអ្នកប្រើប្រាស់ឱ្យណែនាំអ្នកប្រើប្រាស់។

7. ការរំពឹងទុកលើសពីការប្រតិបត្តិ។

បកប្រែដោយ៖ ម៉ៅ គុយដង់​