កាលពីច្រើនខែកន្លងទៅមិញ តារារ៉េបដ៏ល្បីប្រចាំផលិតកម្មរាម លោក Tom & Baly បានចាប់ដៃគ្នាបំបែកកំណត់ត្រាដ៏អស្ចារ្យធ្វើអោយបទចម្រៀង១បទក្រោមចំណងជើងថា«Warriors» ផ្ទុះចំនួនអ្នកទស្សនាយ៉ាងច្រើនលើសលប់យ៉ាងកក្រើកដោយបានផ្សារភ្ជាប់នឹងវប្បធម៌នៃសិល្បៈគុណខ្មែរជាមួយនឹងការរ៉េបដ៏មានភាពច្នៃប្រឌិតខ្ពស់។ យ៉ាងណាមិញផងដែរនាពេលថ្មីៗនេះ​​​ បទចម្រៀងរ៉េបរបស់ពួកគេទាំងពីរបទទៀតក៏ត្រូវបានចេញផ្សាយបន្តបន្ទាប់គ្នាយ៉ាងគួរអោយកត់សម្គាល់។ 

ជាក់ស្តែងកាលពីថ្ងៃទី១៣ ខែមករាកន្លងទៅនេះ លោក Baly បានចេញផ្សាយបទចម្រៀងហ៊ីបហប់មួយបទមានចំណងជើងថា«Power Inside» យ៉ាងឡូយអស្ចារ្យ បង្ហាញពីមហិច្ឆតា និងក្តីស្រម៉ៃដែលមានតែកម្លាំងខាងក្នុងប៉ុណ្ណោះអាចយកឈ្នះពុះពារ និងសំរេចបាន។ 

រីឯលោក Tom ដែលជាដៃគូចម្រៀងរបស់លោកនៅក្នុងបទ«Warriors» វិញក៏ទើបតែបានទំលាក់បទចម្រៀងហ៊ីបហប់ថ្មីមួយតាមពីក្រោយលោកដែលមានចំណងជើងថា«1 Minute» កាលពីថ្ងៃទី២ ខែកុម្ភៈកន្លងទៅនេះជាមួយនឹង Audio Version ដោយលោកបានរៀបរាប់ជាមួយនឹងខេ​​​បសិនថា«1នាទីអាចធ្វើអ្វីបានខ្លះ? កុំទុកពេលវេលាចោល ត្រូវធ្វើអោយ១នាទីមានតំលៃ»។

យ៉ាងណាមិញផងដែរសង្កេតឃើញថាបទចម្រៀងទាំងពីរបទនេះកំពុងតែផ្ទុះឡើងកក្រើកនៅលើបណ្តាញសង្គម Tik Tok ផងដែរ ដែលធ្វើអោយបទនេះហាក់ដូចជាមានការប្រកួតប្រជែងគ្នាយ៉ាងខ្លាំង ដោយសារអស់រំលងពីមួយនឹងចូលមួយទៀតឆ្លាស់គ្នាជារឿយៗយ៉ាងគួរអោយកត់សម្គាល់។​​​ ចុះទស្សនិកជនយល់ឃើញយ៉ាងណាដែរ តើដៃគូចម្បាំងដ៏ស្មោះស្ម័គ្ររបស់យើង Tom និង Baly នឹងអាចប្រែក្លាយជាដៃគូប្រជែងរ៉េបគ្នានាពេលខាងមុខដែរទេ? Let me know in your comment below!