1. យន្តហោះឯកជន Wagner ចុះចតនៅប្រទេសបេឡារុស្ស
យោងតាមសារព័ត៌មាន Politico ចុះផ្សាយថ្ងៃទី២៧ ខែមិថុនាបានអោយដឹងថា យោងតាមរបាយការណ៍បានឱ្យដឹងថា យន្តហោះដែលជាកម្មសិទ្ធិរបស់ក្រុមហ៊ុន Wagner Group របស់ លោក Yevgeny Prigozhin បានចុះចតនៅអាកាសយានដ្ឋានយោធាចម្ងាយប្រហែល 20 គីឡូម៉ែត្រពីទីក្រុង Minsk ប្រទេសបេឡារុស្ស កាលពីព្រឹកថ្ងៃអង្គារ។ គម្រោង Hajun បេឡារុស្ស ដែលឃ្លាំមើលដែនអាកាសរបស់ប្រទេសនេះ បាននិយាយថា យន្តហោះ "បានចុះចតនៅអាកាសយានដ្ឋានយោធា Machulishchi ក្បែរទីក្រុង Minsk នៅម៉ោង 07:40" ។ យោងតាមទិន្នន័យពីគេហទំព័រតាមដានការហោះហើរ flightradar24 ចែករំលែកដោយគម្រោង Hajun យន្តហោះ Embraer Legacy 600 បានហោះចេញពីតំបន់ភាគនិរតីនៃប្រទេសរុស្ស៊ីជាប់ព្រំដែនអ៊ុយក្រែន។ Hajun បានបន្ថែមថា យន្តហោះឯកជនរុស្ស៊ីមួយផ្សេងទៀត ដែលបានហោះចេញពីទីក្រុង St. Petersburg បានចុះចតនៅអាកាសយានដ្ឋានយោធា រយៈពេលតិចជាង 20 នាទីបន្ទាប់ពីយន្តហោះ Wagner បានចុះចត។ លោក Prigozhin បានបញ្ចេញសកម្មភាពឡើងវិញនៅរសៀលថ្ងៃច័ន្ទដោយបង្ហោះសារជាសំឡេងទៅកាន់ប្រព័ន្ធផ្សព្វផ្សាយសង្គមបន្ទាប់ពីបានស្ងប់ស្ងាត់អស់រយៈពេលពីរថ្ងៃបន្ទាប់ពីការប៉ុនប៉ងរបស់លោកដើម្បីដឹកនាំកងទ័ពប៉ារ៉ារបស់ Wagner ទៅកាន់ទីក្រុងម៉ូស្គូត្រូវបានរំសាយចោល។ លោកមិនត្រូវបានគេឃើញចាប់តាំងពីចាកចេញពីទីក្រុង Rostov-on-Don របស់រុស្ស៊ីកាលពីល្ងាចថ្ងៃសៅរ៍។
2. លោកខាងលិចព្រមានពីការធ្វើឃាតមេបញ្ជាការWagnerបន្ទាប់ពីបរាជ័យនៃរដ្ឋប្រហារ
យោងតាមសារព័ត៌មាន Politico ចុះផ្សាយថ្ងៃទី២៧ ខែមិថុនាបានអោយដឹងថា នៅក្នុងកិច្ចប្រជុំកាលពីថ្ងៃច័ន្ទរបស់អ្នកការទូតកំពូលរបស់សហភាពអឺរ៉ុបនៅប្រទេសលុចសំបួ មន្ត្រីមកពីប្រទេសជាច្រើនបានបង្ហាញសកម្មភាពឡើងវាយតំលៃទៅលើរឿងរ៉ាវជំលោះស៊ីវិលរុស្ស៊ីថ្មីៗនេះ។ គ្មាននរណាម្នាក់ចង់ផ្តល់ឱ្យវិមានក្រឹមឡាំងនូវឳកាសទាមទារអះអាងឡើងនោះទេថាទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនជាអ្នកនៅពីក្រោយក្រុម Wagner ដែលមានបំណងកំណត់គោលដៅវាយប្រហារលើមន្ត្រីយោធាជាន់ខ្ពស់រុស្ស៊ី។ លោក Biden បាននិយាយពីសេតវិមានកាលពីថ្ងៃច័ន្ទថា «យើងបានបញ្ជាក់យ៉ាងច្បាស់ថាយើងមិនមានពាក់ព័ន្ធទេ។ យើងមិនមានអ្វីដែលត្រូវធ្វើជាមួយរឿងនេះទេ»។ទោះបីជាយ៉ាងណាក៏ដោយ រដ្ឋមន្ត្រីការបរទេសរុស្ស៊ីលោក Sergei Lavrov បានផ្ដល់សញ្ញាកាលពីថ្ងៃចន្ទថា របបរបស់លោកនឹងនៅតែពិនិត្យមើលការជាប់ពាក់ព័ន្ធដ៏មានសក្តានុពលរបស់ចារកម្មនៃលោកខាងលិចដែលអាចមានពាក់ព័ន្ធនឹងការបះបោរមួយនេះ។ ទន្ទឹមនឹងនោះ មន្ត្រីអឺរ៉ុបនឹងតាមឃ្លាំមើលរុស្ស៊ី ខណៈដែលពួកគេចាត់ទុកថាជាការថែរក្សាដល់សន្តិសុខផ្ទាល់ខ្លួនរបស់អង្គការណាតូ។ លោក Edgars Rinkēvičs រដ្ឋមន្ត្រីការបរទេស និងជាប្រធានាធិបតីជាប់ឆ្នោតរបស់ឡាតវី បានមានប្រសាសន៍ថា “ខ្ញុំគិតថាគ្មាននរណាម្នាក់យល់ច្បាស់អំពីអ្វីដែលកំពុងកើតឡើងនៅក្នុងប្រទេសរុស្ស៊ីនៅឡើយទេ– និយាយដោយត្រង់ទៅ ខ្ញុំក៏មានអារម្មណ៍ផងដែរថា សូម្បីតែអ្នកដឹកនាំនៅទីក្រុងមូស្គូក៏មិនមានតម្រុយពីអ្វីដែលកំពុងកើតឡើងនៅក្នុងប្រទេសរបស់ពួកគេដែរ»។
3. Prigozhin ថាក្បួនដង្ហែទៅកាន់ម៉ូស្គូជាការបកអាក្រាតមេទ័ពរុស្ស៊ី
យោងតាមសារព័ត៌មាន CNN ចុះផ្សាយថ្ងៃទី២៦ ខែមិថុនាបានអោយដឹងថា លោក Yevgeny Prigozhin បានបញ្ចេញសំឡេងថ្មីកាលពីថ្ងៃច័ន្ទដោយពន្យល់ពីការសម្រេចចិត្តរបស់លោកក្នុងការបង្វែរការហែក្បួនរបស់លោកទៅកាន់ទីក្រុងម៉ូស្គូ។ លោក Prigozhin បាននិយាយថា លោកចង់ចៀសវាងការបង្ហូរឈាមរបស់រុស្ស៊ី ហើយថែមទាំងបាននិយាយថា ការដើរដង្ហែរនេះគឺជាបាតុកម្មនៃការតវ៉ា និងមិនមានបំណងចង់ផ្តួលរំលំអំណាចនៅក្នុងប្រទេសនោះទេ។ នេះគឺជាសារជាសំឡេងលើកដំបូងរបស់លោក Prigozhin ចាប់តាំងពីបានប្រកាសកាលពីយប់ថ្ងៃសៅរ៍ថា ជួររបស់លោកបានត្រលប់មកវិញ "ដើម្បីចៀសវាងការបង្ហូរឈាម"។ ប្រធាន Wagner ក៏បានអះអាងនៅក្នុងសារជាសំឡេងថា យុទ្ធជនរបស់លោកប្រហែល 30 នាក់បានស្លាប់នៅក្នុងការវាយប្រហាររបស់យោធារុស្ស៊ីទៅលើក្រុមទាហានស៊ីឈ្នួលកាលពីថ្ងៃសុក្រ។ លោក Prigozhin បាននិយាយថា ការវាយប្រហារបានកើតឡើងប៉ុន្មានថ្ងៃមុនពេលលោក Wagner នឹងត្រូវចាកចេញពីទីតាំងរបស់ខ្លួននៅថ្ងៃទី 30 ខែមិថុនា ដើម្បីប្រគល់សម្ភារៈឧបករណ៍ទៅឱ្យស្រុកយោធាភាគខាងត្បូងក្នុងទីក្រុង Rostov ប្រទេសរុស្ស៊ី ប្រធាន Wagner បាននិយាយថាគោលបំណងនៃការដើរក្បួនរបស់កងកម្លាំងរបស់លោកទៅកាន់ទីក្រុងមូស្គូ គឺដើម្បីទប់ស្កាត់ "ការកំចាត់" នៃក្រុមហ៊ុនយោធាឯកជន និង "ដើម្បីកាត់ទោសអ្នកដែលតាមរយៈសកម្មភាពគ្មានវិជ្ជាជីវៈរបស់ពួកគេ បានធ្វើកំហុសជាច្រើនក្នុងអំឡុងពេលប្រតិបត្តិការយោធាពិសេស” ។
