1. គ្រោះមហន្តរាយ! ចិន​កំពុង​ពិចារណា​ងាក​ប្រឆាំង​នឹង​​ពូទីន​ក្រោយ​ការ​បះបោរ Wagner 

យោងតាមសារព័ត៌មាន Reuters ចុះផ្សាយថ្ងៃទី២៨ ខែមិថុនាបានអោយដឹងថា ដូចដែលព័ត៌មានបានបែកធ្លាយកាលពីថ្ងៃសៅរ៍ថា ក្រុមទាហានស៊ីឈ្នួល Wagner កំពុងបំពេញក្បួនដង្ហែឆ្ពោះទៅកាន់ទីក្រុងមូស្គូក្នុងការបះបោររយៈពេលខ្លី អ្នកជំនួញជាច្រើនមកពីភាគខាងត្បូងប្រទេសចិនបានចាប់ផ្តើមអំពាវនាវយ៉ាងក្លៀវក្លាដល់រោងចក្រឱ្យបញ្ឈប់ការដឹកជញ្ជូនទំនិញទៅកាន់ប្រទេសរុស្ស៊ី។ ខណៈពេលដែលការបះបោរ ដែលជាការសាកល្បងដ៏ធំបំផុតនៃការដឹកនាំរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន ចាប់តាំងពីការលុកលុយនៅខែកុម្ភៈ ឆ្នាំ 2022 របស់លោកទៅលើអ៊ុយក្រែន បានរសាត់បាត់ទៅយ៉ាងឆាប់រហ័ស អ្នកនាំចេញទាំងនេះមួយចំនួនកំពុងតែមានមន្ទិលលើការពឹងផ្អែកនាពេលអនាគតរបស់ពួកគេលើសម្ព័ន្ធមិត្តជិតស្និទ្ធបំផុតរបស់ទីក្រុងប៉េកាំងមួយនេះ។ លោក Shen Muhui ប្រធានស្ថាប័នពាណិជ្ជកម្មសម្រាប់ក្រុមហ៊ុននៅខេត្ត Fujian ភាគខាងត្បូងប្រទេសចិនបាននិយាយថា "យើងគិតថានឹងមានបញ្ហាធំ" ដោយបានរំឮកពីរឿងរ៉ាវរបស់សមាជិកខ្លួនដែលនាំចេញគ្រឿងបន្លាស់រថយន្ត គ្រឿងចក្រ និងសម្លៀកបំពាក់ទៅកាន់ប្រទេសរុស្ស៊ី។ លោកបានបន្ថែមថា ទោះបីជាវិបត្តិបានធូរស្រាលក៏ដោយ "មនុស្សមួយចំនួននៅតែឈរទៅម្ខាង ដោយសារពួកគេមិនប្រាកដថានឹងមានអ្វីកើតឡើងនៅពេលអនាគត" ដោយលោកបានបដិសេធមិនប្រាប់ឈ្មោះក្រុមហ៊ុនដែលផ្អាកការដឹកជញ្ជូនឡើយ។ ប៉ុន្តែមន្ត្រីកំពូលអាមេរិកម្នាក់កាលពីថ្ងៃចន្ទបាននិយាយថាការបះបោរចុងសប្តាហ៍បានធ្វើឱ្យប៉ះទង្គិចការដឹកនាំរបស់ទីក្រុងប៉េកាំង ហើយអ្នកវិភាគមួយចំនួននៅក្នុងនិងក្រៅប្រទេសចិនបានចាប់ផ្តើមចោទសួរថាតើទីក្រុងប៉េកាំងត្រូវការបន្ធូរបន្ថយទំនាក់ទំនងនយោបាយ និងសេដ្ឋកិច្ចរបស់ខ្លួនជាមួយទីក្រុងមូស្គូដែរឬទេ។

2. ណាតូ​បរាជ័យ​ក្នុង​ការ​កម្ចាត់​រុស្ស៊ី​នៅ​ពេល​ទន់ខ្សោយ

យោងតាមសារព័ត៌មាន Reuters ចុះផ្សាយថ្ងៃទី២៦ ខែមិថុនាបានអោយដឹងថា អំពើបះបោរនៅក្នុងប្រទេសរុស្ស៊ីបានបង្ហាញពីហានិភ័យដែលវិមានក្រឹមឡាំងប្រឈមមុខនឹងជម្លោះដ៏រ៉ាំរ៉ៃនៅអ៊ុយក្រែន ទោះបីជាខ្លួនមិនបាន​​​បង្ហាញទីក្រុង Kyiv អោយឃើញភ្លាមៗនៅលើសមរភូមិក៏ដោយ។ មន្ត្រីបច្ចុប្បន្ន និងអតីតក្នុងទីក្រុង Kyiv និយាយថា ការបះបោរនេះបានផ្តល់នូវការប៉ាន់ប្រមាណមើលដ៏គួរឱ្យភ្ញាក់ផ្អើលមួយទៅលើសភាពមានកំរិតនៅក្នុងប្រព័ន្ធនយោបាយរុស្ស៊ី។ វាបានបង្ហាញថាកងកម្លាំងបម្រុងរបស់រុស្ស៊ីមានសភាពថមថយ ដែលពួកគេមិនអាចព្យាយាមឆ្លើយតបទៅនឹងការគំរាមកំហែងពីការបះបោរនេះ។ មន្ត្រីក្រុង Kyiv បានព្រមានថា ទោះបីជាគ្មានអ្នកប្រយុទ្ធ Wagner ក៏ដោយ ក៏រុស្ស៊ីនៅតែរក្សាកងទ័ពដ៏ធំនៅក្នុងអ៊ុយក្រែន ហើយអាចជ្រើសរើសទាហានបន្ថែមទៀត។ លោក Mykhailo Podolyak មន្ត្រីប្រធានាធិបតីអ៊ុយក្រែន បានប្រាប់រ៉យទ័រថា ភាពចលាចលនឹងអាចប៉ះពាល់ដល់ឆន្ទៈរបស់កងទ័ពរុស្ស៊ី។ លោកបានលើកឡើងថា"ការបំបាក់ស្មារតីបន្ថែមលើទាហានរុស្ស៊ី និងភាពមិនទុកចិត្តបន្ថែមទៀតនៅក្នុងចំណោមមេទ័ពរុស្ស៊ី ដែលបានបង្ហាញភាពអាម៉ាស់មុខ នឹងធ្វើឱ្យគុណភាពការការពារជាតិកាន់តែអាក្រក់ទៅៗ"។ ភាពចលាចលនៅក្នុងប្រទេសរុស្ស៊ីមិនបានបញ្ចប់ដល់ការលុកលុយរបស់ទីក្រុងមូស្គូរយៈពេល16ខែនោះទេ ហើយភាគីទាំងពីរមិនមានឆន្ទៈក្នុងការធ្វើសម្បទានបោះបង់ដល់គ្នា។ អ្នកការទូតជាន់ខ្ពស់អឺរ៉ុបកណ្តាលម្នាក់បាននិយាយថា ពួកគេមើលឃើញថា "គ្មានឥទ្ធិពលភ្លាមៗលើសង្រ្គាមទេ" ពីការបះបោរដែលត្រូវបានរំសាយចោលរបស់ លោក Prigozhin ។ អ៊ុយក្រែន​ដែល​គាំទ្រ​ដោយ​លោកខាងលិច​គឺ​ស្ថិត​ក្នុង​ដំណាក់កាល​ដំបូង​នៃ​ការ​វាយបក​ដ៏​យូរ​អង្វែង​ដើម្បី​ដណ្ដើម​យក​ដី​ដែល​កាន់កាប់​វិញ​នៅ​ភាគ​ខាង​ត្បូង​និង​ភាគ​ខាងកើត​របស់​ខ្លួន។ ប៉ុន្តែពួកគេត្រូវបាននិយាយថា ការជំរុញនៃការវាយបកចម្បងរបស់ពួកគេមិនទាន់បាននាំមកជាមួយនោះទេ ដោយសារតែកងទ័ពភាគច្រើនរបស់ខ្លួននៅមិនទាន់មានឆន្ទៈប្រព្រឹត្ត។

3. ក្រុមទាហាន Wagner ត្រៀមប្រគល់ឧបករណ៍ធុនធ្ងន់ដល់កងទ័ពរុស្ស៊ី

យោងតាមសារព័ត៌មាន Tass ចុះផ្សាយថ្ងៃទី២៧ ខែមិថុនាបានអោយដឹងថា ក្រសួងការពារជាតិបាននិយាយកាលពីថ្ងៃអង្គារថា អាវុធ និងសម្ភារៈធុនធ្ងន់របស់ក្រុមហ៊ុនយោធាឯកជន Wagner នឹងត្រូវផ្ទេរទៅឱ្យកងកម្លាំងប្រដាប់អាវុធរុស្ស៊ី។ សេចក្តីថ្លែងការណ៍បាននិយាយថា"ការត្រៀមរៀបចំកំពុងដំណើរការសម្រាប់ការផ្ទេរឧបករណ៍យោធាធុនធ្ងន់ពីក្រុមទាហាន Wagner ទៅកាន់អង្គភាពសកម្មនៃយោធារុស្ស៊ី" ។ អ្នកនាំពាក្យវិមានក្រឹមឡាំង លោក Dmitry Peskov បាននិយាយថាសំណុំរឿងឧក្រិដ្ឋកម្មប្រឆាំងនឹងប្រធាន Wagner នឹងត្រូវបានទម្លាក់ ខណៈដែលលោក Prigozhin ខ្លួនឯងនឹងទៅប្រទេសបេឡារុស្ស។ លើសពីនេះទៀតអាជ្ញាធររុស្ស៊ីបានសន្យាថានឹងមិនកាត់ទោសអ្នកប្រយុទ្ធ Wagner ទាំងនោះដែលបានចូលរួមក្នុងការបះបោរនោះទេ ដោយគិតពី "សមិទ្ធិផលនៅទីតាំងជួរមុខ" របស់ពួកគេ។