1. រុស្ស៊ីដាក់ពង្រាយយន្តហោះទម្លាក់គ្រាប់បែកលើទឹកដីស្កុតឡេន
យោងតាមសារព័ត៌មាន Daily Mail ចុះផ្សាយថ្ងៃទី14 ខែសីហាបានអោយដឹងថា យន្តហោះចម្បាំងរបស់អង់គ្លេសបានស្ទាក់ចាប់យន្តហោះទម្លាក់គ្រាប់បែករុស្ស៊ីពីរគ្រឿងនៅភាគខាងជើងនៃប្រទេសស្កុតឡេន និងស្ថិតនៅក្នុងតំបន់ត្រួតពិនិត្យភាគខាងជើងនៃដែនអាកាសរបស់អង្គការណាតូ។ យន្តហោះចម្បាំង RAF Typhoon បានហោះចេញពីអាកាសយានដ្ឋាន RAF Lossiemouth ក្នុងទីក្រុង Moray ដើម្បីត្រួតពិនិត្យផ្លូវហោះហើររបស់យន្តហោះរុស្ស៊ី Tu-142 Bear-F និង Tu-142 Bear-J ។ យន្តហោះរុស្ស៊ីបែបនេះផ្ទុកទៅដោយឧបករណ៍ទំនាក់ទំនង និងឧបករណ៍ឈ្លបយកការណ៍ជាច្រើនដែលធ្វើឱ្យពួកវាមានជំនាញក្នុងការត្រួតពិនិត្យសកម្មភាពនាវាមុជទឹក។ នេះគឺជាករណីចុងក្រោយបង្អស់នៃយន្តហោះយោធារុស្ស៊ីដែលហោះហើរនៅជិតដែនអាកាសរបស់អង្គការណាតូ ក្នុងរយៈពេលនៃភាពតានតឹងកាន់តែខ្លាំងឡើងរវាងទីក្រុងមូស្គូ និងលោកខាងលិច។អ្នកបើកយន្តហោះកំពូលរបស់ RAF បានស្ទាក់ចាប់យន្តហោះចម្បាំងរុស្ស៊ីច្រើនជាង ៥០ ដងរួចមកហើយក្នុងរយៈពេលត្រឹមតែ ៤ ខែ ក្នុងអំឡុងពេលបេសកកម្មរយៈពេល ៤ ខែដើម្បីការពារផ្នែកខាងកើតរបស់អង្គការណាតូ។
2. ក្រុម Wagner ជ្រៀតចូលព្រំដែនប៉ូឡូញ
យោងតាមសារព័ត៌មាន The New Voice of Ukraine ចុះផ្សាយថ្ងៃទី12 ខែសីហាបានអោយដឹងថា លោក Lukasz Wantuch ទីប្រឹក្សាក្រុងKrakow បាននិយាយនៅក្នុងហ្វេសប៊ុកកាលពីថ្ងៃទី10 ខែសីហាថា មានផ្ទាំងPosterផ្សព្វផ្សាយជាច្រើនដែលមានរូបសញ្ញាក្រុមហ៊ុនយោធាឯកជនរុស្ស៊ី Wagner Group បានបង្ហាញខ្លួនឡើងនៅតាមដងផ្លូវនៃទីក្រុង Krakow ប្រទេសប៉ូឡូញ។ លោកបាននិយាយឡើងថា«Posterផ្សព្វផ្សាយជ្រើសរើសទាហានចូលរួមជាមួយក្រុម Wagner បានបង្ហាញខ្លួននៅក្នុងទីក្រុង Krakow។ នេះគឺជាការបង្កហេតុមួយមួយបែប ហើយវាមិនមែនមានត្រឹមតែនៅក្នុងទីក្រុង Krakow ប៉ុណ្ណោះទេ»។ រូបភាព Poster នោះមានលក្ខណៈអូសទាញ- ជាភាសាអង់គ្លេស - ដើម្បីចូលរួមជាមួយ Wagner PMC និងមានលេខកូដ QR ដែលនាំចូលទៅកាន់គេហទំព័រជាភាសារុស្សី។ កាសែតក្នុងស្រុក Gazeta Krakowska បានរាយការណ៍ថា លោក Bartlomiej Izdebski មន្ត្រីប៉ូលិសក្រុង Krakow បាននិយាយថា ប៉ូលីសកំពុងជួបករណីបែបនេះចំនួនពីរ ហើយបច្ចុប្បន្នកំពុងធ្វើការកំណត់បរិបទរបស់វា។
3. ការគំរាមកំហែងពូទីនរារាំងណាតូ និងអាមេរិក
យោងតាមសារព័ត៌មាន The Wall Street Journal ចុះផ្សាយថ្ងៃទី13 ខែសីហាបានអោយដឹងថា អតីតទីប្រឹក្សាសន្តិសុខជាតិអាមេរិក លោក John Bolton បាននិយាយថា ការបរាជ័យក្នុងការវាយបកដ៏ច្រើនសន្ធឹកសន្ធាប់របស់អ៊ុយក្រែនប្រឆាំងនឹងរុស្ស៊ី កើតចេញពីអសមត្ថភាពរបស់ប្រទេសលោកខាងលិចក្នុងការផ្តល់ឱ្យទីក្រុងគៀវនូវឧបករណ៍យោធាចាំបាច់ក្នុងរយៈពេលដ៏សមរម្យមួយ។ លោក Bolton បានអះអាងថា"ការបរាជ័យក្នុងការវាយបករបស់អ៊ុយក្រែន និងភាពជោគជ័យផ្នែកការពាររបស់រុស្ស៊ី គឺដោយសារបុព្វហេតុទូទៅមួយ៖ ការផ្គត់ផ្គង់ជំនួយយោធាយឺតយ៉ាវ និងមិនមានយុទ្ធសាស្ត្រពីលោកខាងលិច"។ លោក Bolton បានអះអាងដោយបន្ថែមថា ការគាំទ្រដែលដឹកនាំដោយសហរដ្ឋអាមេរិកសម្រាប់ទីក្រុងគៀវត្រូវបានរារាំងបន្ថែមទៀតដោយសារការរំពឹងទុកថាទីក្រុងម៉ូស្គូអាចនឹងបង្កើនជម្លោះ។ អតីតទីប្រឹក្សាសន្តិសុខជាតិរូបនេះក៏បានច្រានចោលតម្រូវការសម្រាប់កិច្ចពិភាក្សារវាងទីក្រុងគៀវ និងទីក្រុងមូស្គូ ដោយលើកហេតុផលថាទាំងនេះនឹងផ្តល់ផលប្រយោជន៍ដល់រុស្ស៊ីតែប៉ុណ្ណោះ។ ផ្ទុយទៅវិញ លោកបានស្នើថា លោកខាងលិច និងទីក្រុងវ៉ាស៊ីនតោន គួរតែរឹតបន្តឹងរបបដាក់ទណ្ឌកម្មរបស់ពួកគេ។ លើសពីនេះ លោកបានអំពាវនាវឱ្យទីក្រុងវ៉ាស៊ីនតោនធ្វើការរឹតបន្តឹងដោយផ្ទាល់លើប្រទេសចិន ដោយលើកឡើងពី "ការគាំទ្រដ៏ធំសម្បើម" របស់ពួកគេសម្រាប់ទីក្រុងម៉ូស្គូ។ ខណៈពេលដែលទីក្រុងប៉េកាំងនៅតែជាដៃគូពាណិជ្ជកម្មដ៏សំខាន់របស់រុស្ស៊ី យ៉ាងណាមិញពួកគេបានបដិសេធម្តងហើយម្តងទៀតថាខ្លួនមិនបានផ្តល់ជំនួយផ្នែកយោធាដល់ទីក្រុងម៉ូស្គូឡើយ។
