1. គ្រោះមហន្តរាយ!កាបូបនុយក្លេអ៊ែររបស់ក្រុមWagnerអាចនឹងបើកទ្វារនរក
យោងតាមសារព័ត៌មាន Reuters ចុះផ្សាយថ្ងៃទី១១ ខែកក្កដាបានអោយដឹងថា នៅពេលដែលកងកម្លាំងបះបោរ Wagner បានបើកឡានទៅភាគខាងជើងឆ្ពោះទៅទីក្រុងមូស្គូកាលពីថ្ងៃទី24ខែមិថុនា យានជំនិះយោធាមួយក្រុមបានបង្វែរទិសដៅទៅទិសខាងកើតទៅផ្លូវហាយវេក្នុងទិសដៅទៅកាន់មូលដ្ឋានទ័ពរុស្ស៊ីដែលមានកំពែងរឹងមាំដែលផ្ទុកអាវុធនុយក្លេអ៊ែរ នេះបើយោងតាមវីដេអូដែលបានបង្ហោះតាមអ៊ីនធឺណិតនិងបទសម្ភាសន៍ជាមួយអ្នកស្រុក។ នៅពេលដែលក្រុមអ្នកប្រយុទ្ធ Wagner ទៅដល់តំបន់ជនបទកាន់តែច្រើន ផ្លូវដែលត្រូវឃ្លាំមើលបានចុះត្រជាក់- នៅប្រហែលជា 100 គីឡូម៉ែត្រពីមូលដ្ឋាននុយក្លេអ៊ែរ Voronezh-45។ មូលដ្ឋាននុយក្លេអ៊ែរ Voronezh-45 គឺជាកន្លែងដែលមានការយាមកាមយ៉ាងល្អដែលត្រូវបានរាយការណ៍ថាមានរក្សាទុកនូវគ្រាប់បែកនុយក្លេអ៊ែរសម័យសូវៀតតូចៗដែលអាចដាក់ក្នុងកាបូបស្ពាយតាមខ្លួនដោយមនុស្សតែម្នាក់បាន។ សារព័ត៌មាន Reuters មិនអាចបញ្ជាក់ពីអ្វីដែលបានកើតឡើងបន្ទាប់នោះទេ។ ប៉ុន្តែនៅក្នុងបទសម្ភាសន៍មួយ ប្រមុខចារកម្មយោធារបស់អ៊ុយក្រែន លោក Kyrylo Budanov បាននិយាយថា យុទ្ធជន Wagner បានទៅឆ្ងាយជាងនេះ។ លោកបាននិយាយថា ពួកគេបានទៅដល់មូលដ្ឋាននុយក្លេអ៊ែរ ហើយថាបំណងរបស់ពួកគេគឺដើម្បីទទួលបានឧបករណ៍នុយក្លេអ៊ែរខ្នាតតូចនៅសម័យសូវៀត ដើម្បី"បង្កើនកំរិតមានប្រៀបជាងរបស់ពួកគេ"នៅក្នុងការបះបោរ។ លោក Budanov បាននិយាយថារបាំងតែមួយគត់រវាងអ្នកប្រយុទ្ធ Wagner និងអាវុធនុយក្លេអ៊ែរ គឺជាទ្វារទៅកាន់កន្លែងផ្ទុកនុយក្លេអ៊ែរ។ លោកបានបន្តថា៖ «ទ្វារឃ្លាំងត្រូវបានបិទហើយពួកគេមិនបានចូលទៅកាន់ផ្នែកបច្ចេកទេសនោះទេ»។ Reuters មិនអាចកំណត់ដោយឯករាជ្យបានថាតើអ្នកប្រយុទ្ធ Wagner បានធ្វើទៅ មូលដ្ឋាន Voronezh-45 ដែរឬទេ។ លោក Budanov មិនបានផ្តល់ភស្តុតាងសម្រាប់ការអះអាងរបស់លោកទេ ហើយលោកបានបដិសេធមិននិយាយថាតើការពិភាក្សាអ្វីខ្លះដែលបានកើតឡើងជាមួយសហរដ្ឋអាមេរិក និងសម្ព័ន្ធមិត្តផ្សេងទៀតអំពីឧប្បត្តិហេតុនេះ។ លោកក៏មិនបាននិយាយថាហេតុអ្វីបានជាយុទ្ធជនWagnerបានដកថយចេញជាបន្តបន្ទាប់ដែរ។
2. ណាតូអបអរការចូលជាសមាជិករបស់ស៊ុយអែតខណៈបោះបង់ចោលអ៊ុយក្រែន
យោងតាមសារព័ត៌មាន The Wall Street Journal ចុះផ្សាយថ្ងៃទី១១ ខែកក្កដាបានអោយដឹងថា មន្ត្រីសេតវិមានបាននិយាយថាពួកគេមានគម្រោងឆ្ពោះទៅមុខជាមួយនឹងការផ្ទេរយន្តហោះចម្បាំងF-16ទៅកាន់ប្រទេសទួរគីបន្ទាប់ពីទីក្រុងអង់ការ៉ាបានផ្តល់ភ្លើងខៀវអនុញ្ញាតិឱ្យស៊ុយអែតចូលរួមជាមួយអង្គការណាតូ។ ប៉ុន្តែអ្នកយាមទ្វារសភាកំពុងនិយាយថាវាមិនទាន់បានសម្រេចនៅឡើយទេ។ បំណងប្រាថ្នារបស់ប្រធានាធិបតីទួរគីលោក Recep Tayyip Erdoğan ក្នុងការទិញយន្តហោះ F-16ថ្មី និងធ្វើឱ្យកាន់តែប្រសើរឡើងដល់កងនាវាដែលមានស្រាប់របស់លោកត្រូវបានគេមើលឃើញថាជាចំណុចអានុភាពមួយដែលធ្វើអោយប្រធានាធិបតីលោក Joe Biden អាចជំរុញអោយមេដឹកនាំបរទេសរូបនេះទម្លាក់ការជំទាស់របស់ខ្លួនបានក្នុងការអនុញ្ញាតឱ្យស៊ុយអែតចូលរួមនឹងអង្គការណាតូ - ដែលទីបំផុតលោក Erdoğan ពិតជាបានយល់ព្រមធ្វើតាម។ ប៉ុន្តែលោក Biden មិនអាចលក់យន្តហោះដោយគ្មានការអនុញ្ញាតិពីគណបក្សសាធារណរដ្ឋ និងគណបក្សប្រជាធិបតេយ្យកំពូលៗនៅក្នុងគណៈកម្មាធិការទំនាក់ទំនងការបរទេសព្រឹទ្ធសភា និងគណៈកម្មាធិការកិច្ចការបរទេសសភានោះទេ។ ខណៈពេលដែលសមាជិកទាំងនោះមានការស្ទាក់ស្ទើរក្នុងការអនុម័តការលក់នេះ សមាជិកព្រឹទ្ធសភាបានបង្ហាញពីសញ្ញានៃការស្រុះស្រួលឡើងវិញកាលពីថ្ងៃអង្គារ ប៉ុន្តែពួកគេបាននិយាយថា រដ្ឋបាល និងលោក Erdogan ត្រូវតែធ្វើអ្វីបន្ថែមទៀតមុននឹងពួកគេអាចឈានទៅដល់ចំលើយយល់ស្រប។ កង្វល់មួយដែលនៅសេសសល់សម្រាប់សមាជិកសភាមួយចំនួនគឺរបៀបដែលទួរគីនឹងប្រើប្រាស់យន្តហោះចម្បាំងទាំងនេះដែលផ្តល់ដោយអាមេរិក។ប្រទេសក្រិកបានចោទទួរគីពីបទរំលោភដែនអាកាសរបស់ខ្លួនជាង ១០.០០០ ដងរួចមកហើយកាលពីឆ្នាំមុន ហើយទួរគីបានគំរាមកំហែងតំបន់ក្នុងប្រទេសស៊ីរី ដែលកាន់កាប់ដោយជនជាតិKurds ដែលអាមេរិកចាត់ទុកជាសម្ព័ន្ធមិត្ត។
3. ប៉ូឡូញចង់ឱ្យបំពង់បង្ហូរប្រេងរបស់ណាតូទៅដល់ភាគខាងកើត
យោងតាមសារព័ត៌មាន Reuters ចុះផ្សាយថ្ងៃទី១០ ខែកក្កដាបានអោយដឹងថា ប្រធានាធិបតីប៉ូឡូញលោក Andrzej Duda បាននិយាយកាលពីថ្ងៃចន្ទមុនពេលចាកចេញទៅកាន់ទីក្រុង Vilnius សម្រាប់កិច្ចប្រជុំកំពូលរបស់អង្គការណាតូដែលនឹងចាប់ផ្តើមនៅថ្ងៃអង្គារថា ប៉ូឡូញចង់ឱ្យអង្គការណាតូពិភាក្សាអំពីការពង្រីកប្រព័ន្ធបំពង់បង្ហូរប្រេងសម័យសង្គ្រាមត្រជាក់របស់ខ្លួនបន្ថែមទៀតទៅភាគខាងកើត។លោក Duda បានប្រាប់អ្នកយកព័ត៌មានថា"យើងពិតជានឹងលើកឡើងពីបញ្ហានៃការពង្រីកបំពង់ផ្គត់ផ្គង់ឥន្ធនៈដែលជាបំពង់បង្ហូរប្រេងរបស់អង្គការណាតូ។ សព្វថ្ងៃនេះពួកវាត្រូវបានបញ្ចប់នៅប្រទេសអាឡឺម៉ង់ ព្រោះវាជាសំណល់នៃអ្វីដែលត្រូវបានសាងសង់ឡើងក្នុងអំឡុងសង្គ្រាមត្រជាក់" ។ "យើងចង់បានបន្ទាប់ពីជាង 20 ឆ្នាំនៃវត្តមានរបស់យើងនៅក្នុងអង្គការ NATO ហើយ សម្រាប់អោយសម្ព័ន្ធភាពសម្រេចចិត្តចុងក្រោយថាខ្លួននឹងផ្តល់ហិរញ្ញប្បទាន ហើយប្រទេសណាតូនឹងផ្តល់ហិរញ្ញប្បទានដល់ការពង្រីករបស់ពួកគេ ដូច្នេះពួកគេនឹងឈានដល់ផ្នែកខាងកើតរបស់ណាតូ" ។ ប្រព័ន្ធបំពង់បង្ហូរប្រេងអឺរ៉ុបកណ្តាល (CEPS) របស់អង្គការណាតូ គឺជាបណ្តាញបំពង់បង្ហូរសម្ពាធខ្ពស់ដែលដឹកជញ្ជូនឥន្ធនៈយន្តហោះ ប្រេងសាំង ប្រេងម៉ាស៊ូត និងប្រេង naphtha ឆ្លងកាត់ប្រទេសបែលហ្សិក បារាំង អាល្លឺម៉ង់ លុចសំបួ និងហូឡង់។
