1. ឯកសារ Vulkan បង្ហាញអាថ៌កំបាំងរបស់លោក វ្ល៉ាឌីមៀ ពូទីន
សង្គ្រាមនៅអ៊ុយក្រែនបានសាកល្បងសមត្ថភាពរុស្ស៊ី ខណៈដែលលោកខាងលិចអះអាងថារដ្ឋរុស្ស៊ីបានចុះខ្សោយ ប៉ុន្តែនោះគ្រាន់តែជាការបង្វិលរបស់ពួកគេទេ។ ការពិតទៅរដ្ឋរុស្ស៊ីកំពុងតែបង្កើនអំណាចយោធារបស់ខ្លួនយ៉ាងខ្លាំងក្លា។ ម៉ាស៊ីនសង្គ្រាមរបស់លោកពូទីនកំពុងទទួលបានការធ្វើឱ្យកាន់តែប្រសើរឡើង ដោយជាមួយនឹងការបែកធ្លាយដ៏ធំបានបង្ហាញពីភស្តុតាងលម្អិតថ្មីៗនេះតាមរយៈឯកសារជាង 5000 ច្បាប់បានលាតត្រដាងឡើង។ ពួកគេបង្ហាញពីរបៀបដែលរុស្ស៊ីកំពុងតែបោះជំហាននៅក្នុងសង្គ្រាមអ៊ីនធឺណិត។ ទីក្រុងម៉ូស្គូឥឡូវនេះមានសមត្ថភាពជាច្រើន។ អ្វីដែលគួរអោយចាប់អារម្មណ៍មួយនៅក្នុងនោះគឺក្រុមអ្នកជំនាញ IT មានមូលដ្ឋាននៅទីក្រុង Moscow ដែលហៅខ្លួនឯងថាជាក្រុមហ៊ុន NTC Vulcan។ តើពួកគេគឺជាអ្វី? ពួកគេបានបង្កើតកម្មវិធីបើកការវាយប្រហារតាមអ៊ីនធឺណិត ហើយដំណើរការជាគូជាមួយនឹងយោធារុស្ស៊ីរុស្ស៊ីផងដែរ ប៉ុន្តែ NTC Vulcan នេះគឺគ្រាន់តែជាចំណែកមួយនៅក្នុងប្រព័ន្ធចក្រវាឡយក្សរបស់អំណាចអ៊ីនធឺណិតរុស្ស៊ីប៉ុណ្ណោះទេ។ រុស្ស៊ីបានចាត់ក្រុម Hacker និងអ្នកលេងសម្ងាត់ជាច្រើននាក់ទៀតដូចជា Vulcan នេះដើម្បីធ្វើការជាមួយគ្នា និងកំណត់អត្តសញ្ញាណគោលដៅសំខាន់រួមគ្នា ដើម្បីរកចំនុចខ្សោយរបស់សត្រូវ ហើយធ្វើការដោះស្រាយជាមួយគ្នាជាតាមប្រភេទនៃបេសកកម្មនីមួយៗ។
2. ល្បែងអំណាច NATO របស់លោក Erdogan
ណាតូគឺជាសម្ព័ន្ធសន្ធិសញ្ញាអាត្លង់ទិកខាងជើង និងសម្ព័ន្ធយោធាត្រូវបានដឹកនាំដោយសហរដ្ឋអាមេរិក។ ហ្វាំងឡង់បានព្យាយាមចូលរួមជាច្រើនខែរួចមកហើយ ហើយទីបំផុតគេក៏អាចចូលរួមបានសំរេច។ នោះក៏ព្រោះតែប្រទេសទួរគីបានបើកសញ្ញាភ្លើងខៀវរួចហើយ ដែលជាឧបសគ្គចុងក្រោយរបស់ពួកគេ។ ណាតូមានសមាជិកទាំងអស់30 ប្រទេស រួមទាំងទួរគី និងប្រទេសដទៃទៀត។ សមាជិកទាំងអស់ត្រូវតែយល់ព្រមជាមុន ទើបប្រទេសថ្មីអាចអនុញ្ញាតឱ្យចូលរួមបាន។ ទាំងហ្វាំងឡង់និងស៊ុយអែតបានសម្រេចចិត្តស្វែងរកការការពារពីណាតូដើម្បីប្រឆាំងនឹងការអាចចូលឈ្លានពានបានរបស់រុស្ស៊ី ដោយសារតែណាតូបានកំណត់ថាបើមានការវាយប្រហារលើសមាជិកណាម្នាក់របស់ខ្លួន នោះគឺស្មើនឹងការវាយប្រហារលើសមាជិកទាំងអស់។ ដូច្នេះប្រទេសហ្វាំងឡង់ និងស៊ុយអែតដែលចង់ចូលរួម ប៉ុន្តែត្រូវប្រឈមមុខនឹងផ្លូវបិទពីរដោយសំណាក់ប្រទេសហុងគ្រី និងប្រទេសទួរគី ដោយសារទាំងពីរប្រទេសនេះចង់ប្រើប្រាស់ប្រទេសមកពីអឺរ៉ុបខាងជើងដូចជាហ្វាំងឡង់ និងស៊ុយអែតនេះជាកូនអុកយោបាយរបស់ពួកគេ ទើបរារាំងការចូលរបស់ពួកគេ។ ហេតុអ្វីបានជាប្រធានាធិបតីទួរគីលោក Erdogan ធ្វើបែបនេះ? លោកមានទំនាក់ទំនងល្អជាមួយនឹងទីក្រុងម៉ូស្គូ។ លោក Erdogan ក៏បានបដិសេធមិនគាំទ្រលោកខាងលិចដែរក្នុងការដាក់ទណ្ឌកម្មលើទីក្រុងមូស្គូ បន្ទាប់មកពួកគេក៏បានទិញប្រព័ន្ធការពារកាំជ្រួច s 400 របស់រុស្ស៊ីផងដែរ ដែលបង្កអោយមានកំហឹងយ៉ាងខ្លាំងនៅក្នុងអង្គការណាតូ។ ចុះហេតុអ្វីបានជាពួកគេមិនអាចត្រឹមតែបណ្តេញតួកគីចេញពីណាតូ? នេះក៏ព្រោះតែទួរគីជាសមាជិកដែលកើតឡើងពីដំបូងៗ ហើយបានបញ្ជូនដ្រូនទួរគីជួយអ៊ុយក្រែនក្នុងសង្គ្រាមផងដែរ និងមានកងកម្លាំងប្រដាប់អាវុធដ៏ធំជាងគេទី២នៅក្នុងអង្គការណាតូ។
3. រថក្រោះណាតូកំពុងធ្វើដំណើរចូលមកដល់អ៊ុយក្រែន
ណាតូកាន់តែពង្រីកវិសាលភាពទឹកដីរបស់ខ្លួនកៀកនឹងព្រំដែនរបស់រុស្ស៊ីហើយ ខណៈដែលពេលនេះប្រទេសហ្វាំងឡង់បានក្លាយខ្លួនជាសមាជិកថ្មីមួយរបស់ណាតូ។ស្របពេលជាមួយគ្នានេះដែរ ប្រទេសណាតួក៏កំពុងតែចូលរួមយ៉ាងសកម្មក្នុងការផ្គត់ផ្គង់ផ្តល់ជំនួយសព្វាវុធដល់ប្រទេសអ៊ុយក្រែន។ បន្ទាប់ពីច្រើនសប្តាហ៍នៃការរង់ចាំ អ៊ុយក្រែននៅទីបំផុតបានទទួលនូវរថក្រោះដែលពួកគេចង់បានហើយដោយមានដូចជារថក្រោះ leopard ពីប្រទេសអាល្លឺម៉ង់ និងរថក្រោះ Challenger មកពីប្រទេសអង់គ្លេស។ ចក្រភពអង់គ្លេសបានបញ្ជូនសរុបចំនួន១៤ គ្រឿង ចំណែកអាល្លឺម៉ង់បានបញ្ជូន ១៨ គ្រឿង។ ប្រទេសអាល្លឺម៉ង់គឺដំបូងមានការស្ទាក់ស្ទើរ ប៉ុន្តែស្ថិតនៅក្រោមសម្ពាធពីសហរដ្ឋអាមេរិក និងសម្ព័ន្ធមិត្ត ពួកគេក៏បានផ្លាស់ប្តូរចិត្ត និងយល់ព្រមចែករំលែករថក្រោះជាមួយអ៊ុយក្រែន។ មុននេះន័រវេសបានបញ្ជូនរថក្រោះចំនួនប្រាំបីរួចមកហើយ ខណៈដែលសហរដ្ឋអាមេរិកនៅមិនទាន់បានបញ្ជូននៅឡើយ។ កាលពីសប្តាហ៍មុនសហរដ្ឋអាមេរិកបានសន្យាថានឹងបង្កើនល្បឿននៃការបញ្ជូនទៅនេះ។ តើរថក្រោះចំនួនប៉ុន្មានហើយ ដែលអាមេរិចធ្លាប់បានបញ្ជូនមកកាន់អ៊ុយក្រែន? យោងទៅតាមរបាយការណ៍ មានយ៉ាងហោចណាស់ 31 គ្រឿងហើយ ចុះតើរថក្រោះចំនួនប៉ុន្មានដែល អ៊ុយក្រែនរំពឹងនឹងទទួលបានសរុប? ទីក្រុងគៀវរំពឹងថានឹងទទួលបានរថក្រោះយ៉ាងតិច១២០គ្រឿងនៅក្នុងការនាំចូលលើកដំបូងនេះ។ តើពួកគេនឹងប្រើវាដោយរបៀបណានៅក្នុងសមរភូមិ? អ៊ុយក្រែនបាននិយាយថាពួកគេនឹងចាប់ផ្តើមប្រើប្រាស់វាឆាប់ៗនៅក្នុងសមរភូមិ ខណៈដែលរថក្រោះទាំងនេះបានជួយបង្កើនសមត្ថភាពកំលាំងការពារ និងគុណតំលៃរបស់កងទ័ពពួកគេ។
4. បន្ទុះគ្រាប់បែកនៅហាងកាហ្វេរុស្ស៊ីបណ្តាលអោយស្លាប់ Blogger យោធាម្នាក់
អាជ្ញាធរបាននិយាយថា ការសម្លាប់អ្នកសរសេរប្លុកយោធារុស្ស៊ីលោក Vladlen Tatarsky កំពុងត្រូវបានស៊ើបអង្កេតថាជា "ឃាតកម្មកម្រិតខ្ពស់" ។ លោក Tatarskyដែលជាអ្នកគាំទ្រសំលេងនៃសង្គ្រាមរុស្ស៊ីនៅអ៊ុយក្រែនបានស្លាប់នៅក្នុងការផ្ទុះនៅហាងកាហ្វេ St Petersburg កាលពីល្ងាចថ្ងៃអាទិត្យ។ ក្រសួងសុខាភិបាលបាននិយាយថា មានមនុស្ស ២៤ នាក់ផ្សេងទៀតត្រូវបានគេបញ្ជូនទៅមន្ទីរពេទ្យ និង ៦ នាក់ស្ថិតក្នុងស្ថានភាពធ្ងន់ធ្ងរ។ វីដេអូដែលបានបង្ហោះលើបណ្តាញសង្គមបានបង្ហាញពីការផ្ទុះនិងរបួសមនុស្សនៅតាមផ្លូវ។ គេនៅមិនទាន់ដឹងច្បាស់នៅឡើយទេថានរណាជាអ្នកទទួលខុសត្រូវចំពោះការវាយប្រហារនោះ។ ប៉ុន្តែទីប្រឹក្សាប្រធានាធិបតីអ៊ុយក្រែនលោក Mykhailo Podolyak បានស្តីបន្ទោសការផ្ទុះនេះលើ "ជំលោះនយោបាយផ្ទៃក្នុងរបស់រុស្ស៊ី" ដោយសរសេរនៅលើបណ្តាញសង្គម Twitter ថា "សត្វពីងពាងកំពុងស៊ីគ្នាឯងទៅវិញទៅមកនៅក្នុងក្រឡហើយ" ។ មន្ត្រីក្រសួងមហាផ្ទៃបាននិយាយថា ប៉ូលីសត្រូវបានហៅទៅកាន់ Street Food Bar No 1 - នៅជិតទន្លេ Neva - នៅម៉ោង15:13 GMT ។ លោក Tatarsky គឺជាវាគ្មិននៅក្នុងកម្មវិធីមួយដែលរៀបចំឡើងដោយហាងកាហ្វេនៅពេលដែលគ្រាប់បែកបានបំផ្ទុះនោះ។ មានរបាយការណ៍ចម្រូងចម្រាស់មួយចំនួននៅក្នុងប្រព័ន្ធផ្សព្វផ្សាយរុស្ស៊ីទាក់ទងនឹងឧបករណ៍បំផ្ទុះនោះ។ យោងតាមប្រភពផ្លូវការដកស្រង់ដោយប្រព័ន្ធផ្សព្វផ្សាយរដ្ឋរបស់រុស្ស៊ីបានបំភ្លឺថា លោក Tatarsky ត្រូវបានប្រគល់រូបសំណាកតូចមួយជាកាដូដាក់នៅខាងក្នុងប្រអប់មួយមានលាក់នូវគ្រាប់បែកខាងក្នុងនោះ។ ប៉ុន្តែទោះជាយ៉ាងណាក្តី សារព័ត៌មាន BBC មិនអាចផ្ទៀងផ្ទាត់បាននៅឡើយទេថា តើវាពិតជាឧបករណ៍គ្រឿងផ្ទុះពិតមែនដែររឺអត់។
5. លោក Donald Trump នឹងថ្លែងសុន្ទរកថាដំបូងរបស់លោកចាប់តាំងពីការចោទប្រកាន់
លោក Donald Trump នឹងថ្លែងសុន្ទរកថានៅក្នុងថ្ងៃអង្គារនេះ ដែលជាសុន្ទរកថាដំបូងបំផុតរបស់លោកបន្ទាប់ពីចាប់តាំងពីការចោទប្រកាន់ដោយគណៈវិនិច្ឆ័យធំនៅ Manhattan ហើយនៅថ្ងៃជាមួយគ្នានោះផងដែរ លោកក៏ត្រូវបានគេរំពឹងថានឹងត្រូវកាត់ទោសនៅទីក្រុងញូវយ៉កផងដែរ។ យោងតាមសេចក្តីប្រកាសពីយុទ្ធនាការឆ្នាំ 2024 របស់លោក បានកត់សម្គាល់ទុកថា លោក Trump នឹងឡើងថ្លែងសុន្ទរកថាពីក្លឹប Mar-a-Lago របស់លោកនៅ Palm Beach រដ្ឋ Florida នៅថ្ងៃទី 4 ខែមេសានេះវេលាម៉ោង 8:15 យប់។ នេះបង្ហាញអោយឃើញថា អតីតប្រធានាធិបតីរូបនេះ ជឿជាក់ថាខ្លួនលោកនឹងអាចត្រលប់មកផ្ទះរបស់លោកវិញនៅក្នុងរដ្ឋផ្លរីដានៅពេលល្ងាចថ្ងៃអង្គារបាន បើទោះបីជាមានការកាត់ក្តីនៅទីក្រុង New York ដែលជាអតីតទីក្រុងកំណើតរបស់លោកនៅមុននេះបន្តិចនៅក្នុងថ្ងៃជាមួយគ្នាក៏ដោយ។ ខណៈពេលដែលលោក Trump នឹងត្រូវបានតុលាការកាត់ទោសនៅថ្ងៃអង្គារនៅទីក្រុងញូវយ៉កនោះផងដែរ តំណាងរាស្រ្តហ្សកហ្ស៊ីលោក Marjorie Taylor Greene ដែលជាអ្នកគាំទ្ររបស់អតីតប្រធានាធិបតីរូបនេះ នឹងស្ថិតនៅក្នុងការប្រមូលផ្តុំគ្នាជាមួយនឹងប្រជាជនទីក្រុងញូវយ៉កមកពីគណបក្សសាធារណរដ្ឋនៅឯ Big Apple នៅសួនច្បារក្បែរតុលាការនោះផងដែរ។
