វណ្ណថាន ចេញបទថ្មី “One Night With You” នៅថ្ងៃទី១៨ ខែវិច្ឆិកា នេះដើម្បីអបអរប្រវត្តិសាស្ត្រតន្ត្រីថ្មីមួយបន្ទាប់ពីត្រូវបានអញ្ចើញទៅសម្តែងនៅកម្មវិធីមហោស្រពតន្ត្រីយក្ស Maho Rasop & Wonderfruit នៅប្រទេសថៃ
លោក វណ្ណថាន ដែលជាតារាចម្រៀង អ្នកនិពន្ធ និងតន្ត្រីករដ៏មានទេពកោសល្យនៅផលិតកម្ម បារមី កំពុងមានសន្ទុះប្រជាប្រិយភាពកើនឡើងនាពេលបច្ចុប្បន្ននេះ ត្រៀមបញ្ចេញបទចម្រៀង “One Night With You” នៅថ្ងៃទី១៨ ខែវិច្ឆិកា ដើម្បីអបអរប្រវត្តិសាស្ត្រតន្ត្រីថ្មីមួយជាមួយអ្នកគាំទ្ររបស់ខ្លួនមុននឹងចេញទៅសម្តែងនៅកម្មវិធីមហោស្រពតន្រ្តីយក្ស “Maho Rasop Festival” ដែលជាកម្មវិធីមួយក្នុងចំណោមកម្មវិធីតន្រ្តីធំៗ បំផុតនៅប្រទេសថៃ។ វណ្ណថាន នឹងឡើងសម្តែងដោយមានទាំងយកឧបករណ៏តន្រ្តីខ្មែររបស់ខ្លួនទៅជាមួយផងដែរ នៅថ្ងៃទី១៩ ខែវិច្ឆិកាដែលជាថ្ងៃទីមួយរបស់កម្មវិធីដែលមានរយៈពេល២ថ្ងៃនេះ ហើយក៏មានការចូលរួមសម្តែងពីសិល្បករល្បីៗជុំវិញពិភពលោកក៏ដូចជាតារាក្នុងតំបន់ដែលមានឈ្មោះបោះសម្លេងជាច្រើនរូបដោយមហោស្រពតន្រ្តីនេះគឺមានការសម្តែងបែបប្រគំផ្ទាល់ទាំងការលេងឧបករណ៏តន្រ្តី ក៏ដូចជាការច្រៀង។ គួរបញ្ជាក់ផងដែរថា លោកជាសិល្បករខ្មែរដំបូងគេដែលត្រូវបានអញ្ជើញទៅសម្តែងនៅកម្មវិធីនេះ។
ទន្ទឹមនឹងនោះផងដែរ លោក វណ្ណថាន ក៏បានអោយដឹងបន្ថែមទៀតថាលោកក៏ត្រូវបានអញ្ចើញអោយទៅសម្តែងបន្តទៀតនៅមហោស្រពតន្រ្តី Wonderfruit Music Festival ដែលនឹងប្រព្រឹត្តទៅ៤ថ្ងៃ ចាប់ពីថ្ងៃទី១៥ដល់១៨ ខែធ្នូ ខាងមុខនេះ។ មហោស្រពតន្រ្តីនេះមានអ្នកចូលរួមទស្សនាច្រើនជាង២៥០០០នាក់ ហើយមានសិល្បករល្បីៗ មកពីតំបន់ផ្សេងៗគ្នាជាច្រើនចូលរួមសម្តែងនៅលើឆាកចំនួន២០ផ្សេងៗគ្នាដែលគេបានរៀបចំឡើងក្នុងទីតាំងកម្មវិធី។ នេះជាកម្មវិធីមហោស្រពតន្រ្តីដ៏ធំ និងមានឥទ្ធិពលជាខ្លាំងហើយត្រូវបានគេទទួលស្គាល់នៅតំបន់អាសុីទាំងមូល។
លោក វណ្ណថាន ទទួលបានការអញ្ជើញពីកម្មវិធីមហោស្រពតន្រ្តីធំៗដល់ទៅ២បន្ទាប់ពីគាត់បានបង្ហាញសមត្ថភាពការសម្តែងដ៏លេចធ្លោរបស់គាត់ជាមួយនឹងឧបករណ៏ភ្លេងខ្មែរក្នុងកម្មវិធីមហោស្រពតន្ត្រីអាស៊ាន ASEAN Music Showcase Festival ក្នុងប្រទេសសិង្ហបុរីកាលពីថ្ងៃទី៩ដល់ទី១១នាខែកញ្ញាកន្លងទៅនេះ។ អ្នករៀបចំកម្មវិធីមហោស្រពតន្ត្រីជាច្រើននាក់បានចូលរួមទស្សនា ដើម្បីមើលការសម្តែង និងជ្រើសរើសអ្នកដែលមានទេពកោសល្យហើយអញ្ជើញពួកគេទៅសម្តែងនៅឆាកអន្តរជាតិផ្សេងៗទៀត។ ទោះបីជាវណ្ណថាន មិនបានចេញបទចម្រៀងថ្មីចាប់តាំងពីបទ "Tomorrow Forever" ដែលមានការចូលរួមវត្តមានពី វណ្ណដា និង ឡូរ៉ា ម៉ម ក្នុងឆ្នាំ2021ក៏ដោយ ក៏វណ្ណថាន មានអ្នករៀបចំកម្មវិធីជាច្រើនចាប់អារម្មណ៏ ដោយសារតែសមត្ថភាពគួរអោយស្ញើចសសើររបស់គាត់ និងសម្លេងសិល្បៈតន្រ្តីខ្មែរជាពិសេសតែម្តង។ នេះជាសមិទ្ធិផលដ៏សំខាន់មួយសម្រាប់អតីតនិស្សិតហ្វារពន្លឺសិល្បៈរូបនេះ ព្រោះថាជាលើកទីមួយហើយដែលយើងមានសិល្បករខ្មែរឡើងសម្តែងក្នុងមហោស្រពតន្រ្តីល្បីៗលើពិភពលោកទាំងនេះ។
លោក វណ្ណថាន បានបង្ហាញចំណាប់អារម្មណ៏ថា “ខ្ញុំពិតជារំភើបដែលបាននាំយកសិល្បៈ និងឧបករណ៏តន្រ្តីភ្លេងខ្មែរទៅបង្ហាញនិងសម្តែងអោយពិភពលោកបានឃើញនៅលើឆាកតន្រ្តីធំៗដូចពេលនេះ។ វាជាក្តីសុបិនរបស់ខ្ញុំមួយដែល ខ្ញុំចង់សម្រេចអោយបានជាយូរមកហើយដូចនេះខ្ញុំក៏រីករាយនឹងចេញបទចម្រៀង "One Night With You" ជូនទៅដល់ អ្នកគាំទ្ររបស់ខ្ញុំបានរីករាយនឹងសណ្តាប់នៅចុងសប្តាហ៍នេះ! ខ្ញុំក៏សង្ឃឹមថានឹងឃើញអ្នកគាំទ្រជាច្រើនចូលរួមទស្សនាការប្រគំតន្ត្រីប្រសិនជាអាច ឬអាចចូលរួមគាំទ្ររូបខ្ញុំបាទដោយការចូលរួមស្តាប់ចម្រៀងថ្មីរបស់ខ្ញុំនេះ”។
