ផ្ទុះការចាប់អារម្មណ៍ខ្លាំងបន្ទាប់ពីលោកទេពពិសិដ្ឋបានធ្វើការ Add Story វិដេអូឡើងរួមគ្នាជាមួយលោកវណ្ណដានៅឯក្លឹបកម្សាន្តមួយកន្លែងខណៈដែលពួកគេទាំងពីរនាក់សុទ្ធតែបានចូលរួមនៅក្នុងការសម្តែងរបស់លោកខ្មែរមួយជីវិតដូចគ្នាកាលពីយប់ថ្ងៃទី០៨ ខែសីហាកន្លងទៅនេះ។

គួររំលឹកផងដែរថា កាលពីយប់ថ្ងៃអង្គារ៍កន្លងទៅនេះ លោកខ្មែរមួយជីវិតបានមានការសម្តែងមួយជាលើកដំបូងនៅឯក្លឹបកម្សាន្ត Drip 13 បន្ទាប់ពីដំណើរវិលមកកាន់ការងារសិល្បៈវិញនៅក្នុងប្រទេស។ ដូច្នេះហើយ សង្កេតឃើញថាមានបណ្តាសិល្បករជាច្រើននាក់ ក៏ដូចជាក្រុមការងារបារមី និងក្រុមការងារ The Rapper Cambodia ផ្ទាល់បានអញ្ជើញចូលរួមគាំទ្រ និងផ្តល់ការទទួលស្វាគមន៍យ៉ាងកក់ក្តៅមកកាន់រ៉េបផ័រជើងចាស់របស់យើង។ 

មិនតែប៉ុណ្ណោះ អ្វីដែលកាន់តែផ្ទុះលើសការរំពឹងទុកទៀតនោះ គឺថាមិនត្រឹមតែវត្តមានរបស់លោកខ្មែរមួយជីវិតប៉ុណ្ណោះទេ តែថាក៏មានវត្តមានរបស់កំពូលរ៉េបផ័រជើងខ្លាំង២ដួងទៀតក៏បានអញ្ជើញចូលរួមដូចគ្នា បណ្តាលអោយមានជើងខ្លាំងទាំង៣ជំនាន់ប៉ះគ្នាតែម្តងនៅក្នុងក្លឹបកម្សាន្តនារាត្រីនោះ។ 

ជាក់ស្តែងក្នុងនោះគឺមានលោកវណ្ណដា ដែលទស្សនិកជននិយមហៅថាត្រូវជា«គ្រូរបស់លោកទេពពិសិដ្ឋ» និងលោកទេពពិសិដ្ឋខ្លួនឯងផ្ទាល់ ដែលទស្សនិកជននិយមហៅថាជា«កូនសិស្សរបស់លោកវណ្ណដា» វិញ ដោយយល់ថាលោកជារ៉េបផ័រជំនាន់ក្រោយមកទៀត។

គួរបញ្ជាក់ផងដែរថា បន្ទាប់ពីបែកធ្លាយវិដេអូនៅលើ Story របស់លោកទេពពិសិដ្ឋរួចមក​​​ បណ្តាអ្នកគាំទ្រជាច្រើននាក់ក៏បានចាប់ផ្តើមចែករំលែកបន្តនូវវិដេអូទាំងនោះយ៉ាងរីកសុសសាយនៅលើបណ្តាញសង្គម Tik Tok ថែមទៀត និងផ្ទុះចំណាប់អារម្មណ៍ពេញចិត្តជាខ្លាំងចំពោះវត្តមានរបស់ពួកគេទាំងពីរនាក់ជាមួយគ្នា និងរំពឹងថាសម្ព័ន្ធភាពរវាងអ្នកទាំងពីរអាចនឹងមានអ្វីពិសេស។

 វាមិនមែនជារឿងញឹកញាប់ទេដែលសិល្បករល្បីៗបានចែករំលែកពីទំនាក់ទំនងរបស់ពួកគេ នេះជាឳកាសមួយដែលទស្សនិកជនបានដឹងពីសម្ព័ន្ធភាពថ្មីមួយរវាងកំពូលរ៉េបផ័រទាំងពីរផងដែរ។