កាលពីថ្ងៃទី២៤ ខែសីហាកន្លងទៅនេះ លោកវណ្ណដាបានចែករំលែកដំណឹងថ្មីមួយទាក់ទងនឹងមានការចូលរួមសម្តែងរបស់លោកនៅក្នុងកម្មវិធីប្រគំតន្រ្តីរបស់តៃវ៉ាន់មួយដែលមានឈ្មោះ Takao Rock Festival ដែលនឹងធ្វើឡើងរយៈពេលពីរថ្ងៃនៅក្នុងថ្ងៃទី០៨ និងទី០៩ ខែតុលាខាងមុខនេះ។
ពិតជាមានការភ្ញាក់ផ្អើលមែនទែនបន្ទាប់ពីលោកវណ្ណដាទើបតែបានចូលរួមនៅក្នុងការសម្តែងមួយនៅឯប្រទេសជប៉ុនកាលពីពាក់កណ្តាលខែកក្កដាថ្មីៗនេះទេ។ យ៉ាងណាមិញសំរាប់កម្មវិធីប្រគំតន្រ្តីថ្មីរបស់លោកវណ្ណដាមួយនេះ ក៏សង្កេតឃើញថាមានភាពថ្មីប្លែក និងទាក់ចិត្តបានដូចគ្នា។
ដោយការប្រគំតន្រ្តី Takao Rock របស់ប្រទេសតៃវ៉ាន់នេះ ត្រូវបានធ្វើឡើងនៅឯមជ្ឈមណ្ឌល Kaohsiung Pop Center ក្បែរកំពង់ផែ Kaohsiung នេះតែម្តង ជាមួយនឹងខនសេបដ៏ប្លែកគឺទាក់ទងនឹងការបង្កើតពិភពបែប Fantasy នៅតាមបណ្តោយមាត់ទន្លេ Dougoនេះតែម្តង រឺហៅម្យ៉ាងទៀតថា Love River ដែលចូលរួមបង្កើតឡើងដោយក្រុមបិសាច Alien តូចៗរីករាយទៅតាមបរិយាកាសតន្រ្តី។
យ៉ាងណាមិញផងដែរ សង្កេតឃើញថាសិល្បករនឹងចូលរួមការសម្តែងនេះគឺមានដូចជាThe Dinosaur’s Skin, The Shine&Shine&Shine&Shine, A Root, P!SCO, DSPS,Wendy Wander ជាដើម។ កាលពីព្រឹកមិញនេះ ទំព័រហ្វេសប៊ុកផ្លូវការរបស់ Takao Rock ក៏បានចែករំលែកអោយដឹងថា សំបុត្រ Pre-Sale នៃការប្រគំតន្រ្តីនេះក៏ត្រូវបានលក់អស់ផងដែរ។ ចុះចំណែកទស្សនិកជនវិញមានបំណងចូលរួមការប្រគំតន្រ្តីមួយនេះដែររឺទេ?
