ទស្សនិកជនជាច្រើនដែលធ្លាប់តែខកខានឳកាសចូលទស្សនាការប្រគំតន្រ្តី របស់លោកវណ្ណដា រួមគ្នាជាមួយលោកសង្ហា ក៏ដូចជាក្រុមលោក La Cima Cartel ច្បាស់ជាបានពេញភ្នែកតែម្តងកាលពីថ្ងៃអាទិត្យសប្តាហ៍មុននេះ ដោយលើសពីការរំពឹងទុកកំពូលរ៉េបផ័រល្បីៗអញ្ជើញមកទាំងក្រុមជាកញ្ចប់តែម្តងនៅក្នុងពិធីមង្គលការរបស់លោក Vlogger Raven Blaze និងគូស្នេហ៍អ្នកនាង ​​​YaYa Shushi។ ការចូលរួមស្ងាត់ៗរបស់កំពូលរ៉េបផ័រកម្ពុជាស្រស់សង្ហាទាំងនេះត្រូវបានទម្លាយដោយអ្នកសារព័ត៌មាន Sovann Sethey ដែលលោកក៏ត្រូវបានអញ្ជើញចូលរួមក្នុងនាមជាភ្ញៀវកិត្តិយសដូចគ្នា។ 

យ៉ាងណាមិញគួរបញ្ជាក់ផងដែរថា លោក Sovann Sethey ក៏ជាសិល្បករមួយរូបផងដែរ​​​ដែលធ្វើអោយមហាជនស្គាល់លោកតាមរយៈបទ«បាញ់ទឹក»​​​ ផលិតឡើងដោយTeam ACHARAYAK។ 

សង្កេតឃើញថាក្រៅពីក្រុមកំពូលសិល្បកររ៉េបអញ្ជើញចូលរួមហើយ ក្នុងនោះក៏មានប្រជុំដោយក្រុម Vlogger ល្បីៗឯទៀតដូចជាលោក Seak,រៀនថត,លោកHeng Visal,កញ្ញាស្រីនា និងកញ្ញា Jasmine ជាដើម រួមទាំងក្រុមកំពូល Gamer ល្បីៗផងដែរនៅលើប្រព័ន្ធបណ្តាញសង្គម។ 

ទស្សនិកជនដែលបានឃើញការចែករំលែកនោះហើយ ក៏បានបង្ហាញចំណាប់អារម្មណ៍ឡើងថាទាំងនេះគឺជារូបភាពកំរដែលសិល្បករជាក្រុមៗរបស់យើងបានជួបជុំ និងថតរូបជាមួយគ្នាបែបនេះ។ 

គួរបញ្ជាក់ថានេះក៏ជាលើកដំបូងផងដែរថាលោកវណ្ណដា និងលោកសង្ហាបានជួបគ្នាជាសាធារណៈបែបនេះចាប់តាំងពីការចាកចេញរបស់លោកសង្ហាពីផលិតកម្មបារមីមក។ ខណៈដែលមហាជនជាច្រើនក៏តែងតែទន្ទឹងរង់ចាំរូបភាពកំររួមគ្នារបស់លោកវណ្ណដា និងក្រុម La Cima Cartel នៅប្លង់តែមួយបែបនេះជាយូរមកហើយ ទោះបីជាកើតឡើង ក៏មិនមែនញឹកញាប់នេាះដែរ។