កាលពីថ្ងៃទី១៣ ខែមេសាកន្លងទៅនេះ អ្វីដែលអ្នកគាំទ្រទន្ទឹងរង់ចាំបានមកដល់ ទីបំផុតលោកវណ្ណដាបានអញ្ជើញចូលរួមសម្តែងការប្រគំតន្រ្តីនៅក្នុងកម្មវិធី Rolling Loud Thailand ហើយដោយអមដំណើរមានការចូលរួមពីសំណាក់ដៃគូរបស់លោកគឺលោកវណ្ណថាន និងក្រុមការងារបារមីមួយចំនួនទៀត។ គួរបញ្ជាក់ផងដែរ កម្មវិធីមួយនេះត្រូវបានរៀបចំធ្វើឡើងរយៈពេល៣ថ្ងៃចាប់ពីថ្ងៃទី១៣ រហូតដល់ថ្ងៃទី១៥នៅឯ Legend Siam នៃទីក្រុង Pattaya ប្រទេសថៃ ។ កត់សម្គាល់ឃើញថា ដោយលោកវណ្ណដាត្រូវមានវត្តមានសម្តែងនៅក្នុងថ្ងៃដំបូងតែម្តងដែលស្ថិតនៅចំថ្ងៃព្រហស្បតិ៍ ទី១៣ និងមានការចូលរួមសម្តែងពីតារារ៉េបល្បីៗជាច្រើនរូបទៀតនៅក្នុងថ្ងៃជាមួយគ្នានេះ ដែលមានដូចជា Cardi B, F.Hero, Sprite, OG Bobby និងលោក Eskimo ជាដើម។ យោងទៅតាមការចែករំលែករូបភាព និងវិដេអូរបស់អ្នកចូលរួមផ្ទាល់នៅក្នុងកម្មវិធីមួយនេះបានអោយដឹងថា លោកវណ្ណដាបានលើកយកជំរើសបទចម្រៀងរបស់លោកទាំង៦បទមកសម្តែងនៅក្នុងព្រឹត្តិការណ៍មួយនេះ។ ដោយនៅក្នុងនោះរួមមានបទ «You’re already dead» ដែលបានចេញផ្សាយកាលពី២ឆ្នាំមុន បទ«Bong» ដែលសម្តែងរួមគ្នានឹងលោក OG Bobby បទ«Time to Rise» បទ«កំលោះស្រុកខ្មែរ» ដែលសម្តែងរួមគ្នានឹងលោកវណ្ណថាន បទ«Run the town» ដែលសម្តែងរួមគ្នានឹងតារារ៉េបល្បីៗជាច្រើននាក់ និងបទ«Hot Boy» របស់លោក។ ចុះទស្សនិកជនវិញបានដឹងអ្វីខ្លះទៀតអំពីការប្រគំតន្រ្តីនៅក្នុងប្រទេសថៃរបស់លោកវណ្ណដា តោះខមមែនប្រាប់អេដមីនផងណា!