កាលពីពេលកន្លងមកនៅក្នុងរៀន Podcast មានសិល្បករជាច្រើនរូបបានចូលរួមធ្វើបទសម្ភាសន៍រួចមកហើយដែលមានដូចជាក្មេងខ្មែរ លោកជីដេវីត លោក Megamind និងថ្មីៗផងដែរក៏មានគូស្នេហ៍ Net Idol ដ៏ល្បីល្បាញគឺកញ្ញាស្រីនានិងលោកហេងវិសាលផងដែរ។ យ៉ាងណាមិញលោកវណ្ណដានៅមិនទាន់ដែលបានចូលរួមនៅក្នុងកម្មវិធី Podcast ណាមួយនៅក្នុងប្រទេសកម្ពុជានៅឡើយទេ ធ្វើអោយទស្សនិកជនជាច្រើនយល់ឃើញថាលោកគឺសិល្បករមួយរូបដែលមានពិភពផ្ទាល់ខ្លួនរបស់លោកខ្លាំង និងមិនងាយនឹងលាតត្រដាងជីវិតឯកជនរបស់លោកទៅកាន់សាធារណជននោះទេ។ អ្វីដែលគ្រប់គ្នាស្មានមិនដល់ កាលពីពេលថ្មីៗនេះ នៅលើឆាណែលយូធូប Rean Thort របស់ពូជ្រួញដែលជាម្ចាស់ Host នៃកម្មវិធីទើបតែបង្ហាញ Screenshot ដ៏ទាក់ទាញចំណាប់អារម្មណ៍មួយដែលជាការខមមែនរបស់លោកវណ្ណដានៅក្នុងការ Live មួយរបស់លោកនៅលើ​​​គណនី​​​ Instagram ថា«See you soon bong, Thanks for inviting me and I got lots to tell»។ តាមរយៈខមមែនមួយនេះបានធ្វើអោយទស្សនិកជនមានការរំភើបរីករាយជាខ្លាំងនឹងជិតបានឃើញលោកវណ្ណដាបង្ហាញខ្លួនឆាប់ៗនៅក្នុងកម្មវិធីរៀនថតរបស់លោកពូជ្រួញហើយដែលកំរនឹងបានឃើញលោកវណ្ណដាចែករំលែករឿងរ៉ាវផ្ទាល់ខ្លួនជាលក្ខណៈ Podcast ដែលមានរយៈពេលវែងបែបនេះពីមុនមកទេ។ យ៉ាងណាមិញលោកវណ្ណដាក៏ដូចជាហាក់មានរឿងរ៉ាវក្នុងចិត្តជាច្រើនចង់ចែករំលែកប្រាប់ទស្សនិកជនវិញដូចគ្នាទើបនេះហើយកាន់តែធ្វើអោយទស្សនិកជនអន្ទះសារចង់ដឹងដូចគ្នា។ ជាងនេះទៅទៀតពូជ្រួញក៏បានរៀបរាប់បន្ថែមថាប្រហែលជាមួយរយៈទៀតទើប Podcast មួយនេះនឹងអាចចេញជាសាធារណៈ ព្រោះពេលនេះលោកវណ្ណដាកំពុងតែសំរាកលំហែកាយពីការងារមួយរយៈសិន។ ម្យ៉ាងទៀតលោកក៏បានបញ្ជាក់ថានឹងប្រាប់ថ្ងៃកាលបរិច្ឆេទចេញអោយបានច្បាស់លាស់នៅពេលវីដេអូ Podcast មួយនេះនឹងបានរួចរាល់។