បទថ្មីពីរបទ “រង្វង់ក្រចក និង ជីវិតគឺជាល្បែង” របស់ តារារ៉េបដ៏ល្បីរបស់កម្ពុជាគឺលោក វណ្ណដា ទើបតែបានរសាត់ទៅមិនទាន់បានយូរប៉ុន្មានផងស្រាប់តែពេលនេះលោកបានប្រកាសត្រៀមចេញបទថ្មីមួយទៀតបាត់ទៅហើយ។ ជាការពិតបទថ្មីទាំងពីរបទរបស់លោក ដែលបានចេញកាលពីខែមុនបើគិតត្រឹមថ្ងៃនេះ ទើបតែមានអាយុ ២សប្តាហ៍ប៉ុណ្ណោះ ហើយចំនួន View របស់បទទាំងពីរគឺឡើងស្មើគ្នាតែម្តង ដែលមានចំនួន ១.២ M ដូចគ្នា។ បទទាំងពីរខាងលើភាគច្រើនលោក និយាយរៀបរាប់អំពីជីវិត ភាពស្រ្តេស នឿយហត់ និងអារម្មណ៍តប់ប្រមល់នៅក្នុងជីវិត ហើយឋិតនៅក្នុងអាល់ប៊ុម Skull ២ រដូវកាលទី ១ នៅក្នុង Episode ១។
សម្រាប់បទថ្មី ដែលលោកត្រៀមនឹងចេញនៅចុងសប្តាហ៍នេះគឺ ជាបទដែលឋិតនៅក្នុង អាល់ប៊ុម Skull ២ រដូវកាល ទី១ ក្នុង Episode ១.៥។ បើតាមការសរសេរបង្ហោះនៅលើគណនី ហ្វេសប៊ុក និង YouTube ផ្លូវការរបស់លោក កាលពីម្សិលមិញ បានសរសេរថា បទថ្មីចេញអាទិត្យនេះហើយគឺជាបទមួយដែលខ្ញុំចូលចិត្ដជាងគេនៅក្នុងរដូវកាលទី ១ នេះ។ ម្យ៉ាងវិញទៀត បទថ្មីនេះ ដែលនឹងចេញនៅចុងសប្តាហ៍នេះ ប្រហែលអាចជាបទដែលច្រៀងរួមគ្នាក៏ថាបាន ពីព្រោះនាពេលថ្មីៗនេះ យើងបានឃើញលោក វណ្ណដា បានបង្ហោះរូបថតបីសន្លឹកដែលមានរូបលោក ថតរួមគ្នាជាមួយលោក OG Bobby ដែលជាសិល្បករទោល និងជាតារារ៉េបដ៏ល្បីម្នាក់មកពីប្រទេសថៃ។ ចំណុចដែលគួរឲ្យកត់សម្គាល់ខ្លាំងជាងហ្នឹងទៀតនោះគឺ Short Video ដែលលោកទើបតែបានបង្ហោះកាលពីមិ្សលមិញ។
នៅក្នុង វីដេអូនេះ យើងឃើញមានទាំងសកម្មភាពនៃការថត MV ចាស់ និង MV ថ្មី ដូចជា សកម្មភាពនៃការប្រគុំតន្រ្តីរបស់លោក ការថតនៅក្នុងបទ Run the Town សកម្មភាពលោកកោសដូង សកម្មភាពដើរផ្សារ និងសកម្មភាពជិះម៉ូតូ ATV ជាដើម។ ទោះបីជាយ៉ាង ណាក៏ដោយ បើតាមការសន្និដ្ធាន យើងអាចនិយាយបានថា បទលើកនេះ គឺអាចជាបទចម្រុះដែលលាយបញ្ចូលគ្នានូវសកម្មភាពជាច្រើន។ សម្រាប់មតិរបស់ ហ្វែនៗវិញ ជាពិសេស បើតាមការខំមិននៅខាងក្រោម ពួកគាត់ បាននិយាយបែបកំប្លែងថា “តាំងមកបង្អើល Fans ឲ្យជ្រួលជ្រើមទៀតហើយ”។ សម្រាប់អ្នកខ្លះទៀតបានខំមិនថា “ Wow! Can’t Wait!” “So excited; can’t wait” “ Always Proud of You My Love” និង “Surprise! Surprise! Everybody, the King is Back” ជាដើម។
អត្ថបទដោយ KuyDorng