សារព័ត៌មាននៅវៀតណាមចាប់ផ្តើមចុះកក្រើកពីលោកវណ្ណដា បន្ទាប់ពីលោកបានចូលរួមសម្តែងជាភ្ញៀវកិត្តិយសនៅក្នុងកម្មវិធី Rap Viet រដូវកាលទី៣នៅក្នុងប្រទេសវៀតណាមកាលពីសៅរ៍សប្តាហ៍មុននេះ។ បន្ទាប់ពីលោកវណ្ណដាបានបង្ហាញការសម្តែងដ៏លេចធ្លោរបស់លោករួចមក យោងតាមការចុះផ្សាយរបស់សារព័ត៌មានវៀតណាមមួយចំនួនបានអោយដឹងថា អ្នកគាំទ្រវៀតណាមជាច្រើននាក់កាន់តែរំពឹងចង់ជួយលោកវណ្ណដាផ្ទាល់កាន់តែខ្លាំងឡើង។
គួររំលឹកផងដែរថា កាលពីយប់ថ្ងៃទី០៩ ខែកញ្ញាកន្លងទៅនេះ លោកវណ្ណដាបានចូលរួមកម្មវិធី Live Performance មួយនៅឯប្រទេសវៀតណាម ដែលជាកម្មវិធីប្រកួតជ្រើសរើស Rapper របស់ប្រទេសវៀតណាមរដូវទី៣ដោយនៅក្នុងវគ្គផ្តាច់ព្រ័ត្រតែម្តង។
កត់សម្គាល់ឃើញថាលោកវណ្ណដា រួមគ្នាជាមួយនឹងកំពូល Rapper ល្បីៗឯទៀតដូចជាRapper សឹង្ហបុរី លោក Wukong និងRapper វៀតណាម អ្នកនាង Suboi ក៏បានមានវត្តមាននៅក្នុងកម្មវិធីនេះផងដែរ។ ពិតជាផ្ទុះកក្រើកយ៉ាងខ្លាំងសម្បារ ព្រោះនៅលើការ Live Stream រយៈពេលប្រមាណជា៣ម៉ោងនេះ បានបង្ហាញអោយឃើញថាមានការបុកសំរុកចូលអ្នកទស្សនារហូតទៅដល់ប្រហែលជា៨លានដងនៅលើយូធូបត្រឹមរយៈពេល១ថ្ងៃកន្លងផុតប៉ុណ្ណោះ។
គួរបញ្ជាក់ផងដែរថានៅក្នុងសម្តែងនារាត្រីនោះ លោកវណ្ណដាបានជ្រើសរើសចំនួន២បទមកសម្តែង រួមមានបទចម្រៀង Solo ដែលមានការសម្តែងលើឆាកជាមួយនឹង Dance Crew របស់លោក និងបទទី២គឺបទ Not Okay But Okay ជាបទ Remix ឡើងជាមួយនឹងបទ Sickerr របស់អ្នកនាង Suboi ដែលជាដៃគូ Collab សម្តែងរួមគ្នានៅលើឆាកតន្រ្តីនោះ។
ម្យ៉ាងវិញទៀត ខាងលោក Wukong ក៏ទើបតែបានបញ្ចេញរូបភាពរួមគ្នាជាមួយលោកវណ្ណដា និងរៀបរាប់យ៉ាងមានមោទនភាពផងដែរថា «Should Vannda and Wukong make a track together?»។ តើទស្សនិកជនយល់ឃើញយ៉ាងណាដែរចំពោះការបង្ហាញខ្លួនរបស់លោកវណ្ណដានៅក្នុងប្រទេសវៀតណាម ហើយថាតើលោកវណ្ណដាពិតជាមានគម្រោងការងារពិតប្រាកដមែនដែររឺទេជាមួយប្រទេសវៀតណាមនៅក្នុងពេលឆាប់ៗនេះ?