ធ្លាប់តែបានដឹងមកល្ហៀងៗថាលោកវណ្ណដាកំពុងតែរកវិស្សមកាលសំរាកមួយរយៈ ដូចអ្វីដែលលោកបាននិយាយមកកាន់អ្នកគាំទ្ររបស់លោកថាលោកអាចនឹងការទំលាក់បទចម្រៀងណាមួយរបស់លោកមុននឹងការធ្វើ Vacation របស់លោក កន្លងទៅមិនបានប៉ុន្មានថ្ងៃផងលោកវណ្ណដាពិតជាបានទំលាក់បទចម្រៀងរបស់លោកធ្វើស៊ីផ្លូវអារម្មណ៍របស់អ្នកគាំទ្រលោកមែនទែន។ កាលពីថ្ងៃទី០៦ ខែតុលាកន្លងទៅនេះ លោកវណ្ណដាបានទំលាក់វីឌីអូ Teaserបទចម្រៀង ”CODA” របស់លោករួចមកហើយនៅលើបណ្តាញសង្គមហ្វេសប៊ុក និងយូធូបជាមួយនឹងខេបសិនសរសេរឡើងថា«ស្អែកនេះ…» ដែលបញ្ជាក់អោយដឹងកាលបរិច្ឆេទលោកនឹងចេញបទចម្រៀងនេះជាផ្លូវការ។ វីឌីអូ Teaser មួយនេះមិនធ្វើអោយខុសពីការដៅទុករបស់អ្នកគាំទ្រស្មគ្រ័ស្មោះរបស់លោកវណ្ណដាមួយចំនួននោះទេ ដែលពួកគេដូចទាយត្រូវរួចមកហើយថានៅក្នុង MV បទចម្រៀង CODA របស់លោកវណ្ណដាអាចនឹងពាក់ពន្ធ័នឹងព្រឹត្តិការណ៍នៅក្នុងការប្រគំតន្រ្តី Skull Tour របស់លោកវណ្ណដា ពិតដូចជាការគូសបញ្ជាក់មែន ព្រោះនៅក្នុង Teaser បទចម្រៀង CODA​​​មានដកស្រង់បង្ហាញស្រាប់នូវទិដ្ឋភាពក្នុងការប្រគំតន្រ្តីទាំងនោះ។ 

សំរាប់បទចម្រៀង ”CODA”នេះផងដែរមានសហការផលិតនាំមកជូនឡើងដោយសែលកាតផងដែរ។ មានអ្នកគាំទ្ររបស់លោកវណ្ណដាជាច្រើននាក់ថាពួកគេទន្ទឹងរង់ចាំបទចម្រៀងមួយនេះពីក្នុងអាល់ប៊ុម Skull2​​យូរណាស់មកហើយ ហើយពួកគេពេញចិត្តនូវប៉ារូលចំរៀងថា«ខ្ញុំរៀនតាមផ្លូវច្រើនជាងក្នុងថ្នាក់»។ ចំនែកដោយសារតែបទចម្រៀងមួយនេះមានចងក្រងព្រឹត្តិការណ៍នៅក្នុងការប្រគំតន្រ្តី Skull Tour ទើបបណ្តាហ្វេនមួយចំនួនទៀតយល់ឃើញថាវាត្រូវការប្រើប្រាស់ពេលវេលាច្រើនដើម្បីធ្វើវា ហើយពួកគេក៏សង្ឃឹមថានឹងបានឃើញខ្លួនឯងនៅក្នុង MV របស់លោកវណ្ណដាផងចុះ។ ចង់ដឹងថាបទចម្រៀងវីដេអូមួយនេះនឹងមានភាពប្លែកពីបទមុនៗរបស់លោកយ៉ាងណាខ្លះកុំភ្លេចតាមដានទស្សនាទាំងអស់គ្នានៅយប់នេះ!