បន្ទាប់ពីទស្សនិកជនចង់ដឹងរឿងប្រតិកម្មឆ្លើយតបរបស់តួអង្គសំខាន់ៗទាំងពីរ គឺលោកជីដេវីត និងលោកវណ្ណដាពាក់ព័ន្ធនឹងរឿងអាវបូកគីឡូ និងនារីវប្បធម៌ លោកជីដេវីតមិនបានធ្វើអោយទស្សនិកជនខកបំណងឡើយ លោកបានទំលាក់បទរ៉េបថ្មីមួយដាក់ចំៗតែម្តងកាលពីយប់មិញនេះដោយមានចំណងជើងថា«Anh Thunh» ជាមួយនឹងរូបដៃបេះដូង។
ឃ្លោងឃ្លានៅក្នុងបទចម្រៀងមួយនេះហាក់មានអត្ថន័យស៊កសៀតកំដរអារម្មណ៍យ៉ាងឆ្ងាញ់ដែរ ដែលមិនចាញ់នឹងសង្គ្រាម Diss Track មុនៗរបស់អ្នកទាំងពីរទេ គ្រាន់តែម្តងនេះជាការច្បាំងដោយប្រយោលជាមួយនឹងកូនទ័ព។ ខណៈលេចតួអង្គជាច្រើនធ្វើអោយបរិយាកាសកាន់តែតានតឹងហើយ ស្រាប់តែកាលពីយប់មិញនេះដដែល លោកវណ្ណដាក៏ប្រកាសបើកទំព័រថ្មីឯណាណោះវិញដោយថានឹងមានដំណើរបេសកម្មការងារបន្ទាប់ទៅកាន់ប្រទេសវៀតណាម។
ជំហានដើរទៅមុខជានិច្ចរបស់លោកវណ្ណដាបែបនេះធ្វើអោយទស្សនិកជនខ្លះបង្ហាញការគាំទ្រយ៉ាងខ្លាំង ដោយលើកឡើងថាការផ្តោតសំខាន់លើរឿងរបស់ខ្លួន ក៏ដូចជាការងាររបស់ខ្លួនឯងបែបនេះទើបជារឿងត្រឹមត្រូវ។
យ៉ាងណាមិញទស្សនិកជនជាច្រើនក៏នៅចង់ដឹងព័ត៌មានបន្ថែមទៀតទាក់ទងនឹងបេសកម្មការងាររបស់លោកលើកនេះទៅកាន់ប្រទេសវៀតណាម ព្រោះអ្វីដែលបានដឹងកន្លងមកគឺត្រឹមដឹងថាលោកនឹងមានការសហការការងារជាមួយតារារ៉េបស្រីវៀតណាមដែលមានរហ័សនាមថា«Queen of Rap» អ្នកនាង Suboi តែប៉ុណ្ណោះ។
យ៉ាងណាមិញមិនថាជាជំហានរបស់លោកវណ្ណដា រឺមួយលោកជីដេវីតនោះទេ សង្កេតឃើញថារាល់សកម្មភាពរបស់អ្នកទាំងពីរទទួលបានការគាំទ្រយ៉ាងខ្លាំង ខណៈការលូកដៃចូលជួយរបស់លោកជីដេវីតក្នុងរឿងនេះហាក់បានកូររឿងនេះអោយកាន់តែល្អមើល ចំណែកការប្រកាសដើរចេញ និងចាប់ផ្តើមជំពូកថ្មីរបស់លោកវណ្ណដាក៏បាននាំយករសជាតិថ្មីមួយទៀតដែលមិនសាំញ៉ាំ។ ចុះទស្សនិកជនយល់ឃើញយ៉ាងណាដែរ?
