រៀន Podcast របស់ពូជ្រួញមួយរយៈចុងក្រោយនេះពិតជាបានក្លាយទៅជាវេទិកាដ៏ប្រសើរមួយដែលអាចអោយភ្ញៀវកិត្តិយសចូលរួមដូចជាសិល្បករ និង Influencer មកពីគ្រប់មជ្ឈដ្ឋានមានឳកាសធ្វើការបកស្រាយទៅលើគំនិតរបស់ខ្លួន និងចែករំលែកគំនិតល្អៗទៅកាន់អ្នកទស្សនាបាន។ ដូចជាពេលថ្មីៗនេះ លោកវណ្ណដាដែលបានអញ្ជើញចូលរួមជាវាគ្មិនកិត្តិយសក៏មានឳកាសបកស្រាយទៅលើគំនិតរបស់មហាជនមួយចំនួនចោទប្រកាន់ថាបទចម្រៀង «J+O» និង «Catch me if you can» របស់លោកបានដកស្រង់ Loop ពីបទចម្រៀងដទៃយកមកប្រើប្រាស់។ 

លោកវណ្ណដាក៏បានបកស្រាយឡើងថាវាមិនមែនជាបញ្ហានោះទេដែលការយក Loop ពីបទចម្រៀងដទៃយកមកប្រើនោះគឺជារឿងខុស ព្រោះថាសិល្បកររ៉េបទូទាំងសកលលោកគឺចាំបាច់ត្រូវការធ្វើបទភ្លេងដោយយក Loop ផ្សេងៗយកមកប្រើប្រាស់ ប្រៀបដូចជាការរើសយករបស់បោះចោលផ្សេងៗ មកកែច្នៃចូលគ្នាធ្វើជាបទចម្រៀងថ្មីនោះឯង ម្ល៉ោះហើយមិនថាប្រើគ្រឿងផ្សំដូចគ្នា រឺខុសគ្នា គឺស៊ីសងទៅលើទេពកោសល្យរបស់សិល្បករម្នាក់ៗនោះទេដែលអាចធ្វើអោយសមិទ្ធផលចុងក្រោយនៃបទចម្រៀងនោះពិរោះរឺមិនពិរោះ ល្អរឺក៏មិនល្អ។ 

បន្ថែមទៅលើនេះលោកវណ្ណដាក៏បានបញ្ជាក់ទៀតថានេះគឺជារឿងទូទៅ និងប្រើប្រាស់ដោយសេរីទៅហើយដែលសិល្បករហ៊ីបហប់អាចធ្វើការ Mix &Master បទភ្លេងរបស់ខ្លួនដោយកំរិតទៅតាមប្រេកង់សំលេងផ្លាស់ប្តូរខុសៗគ្នាដោយមិនអាស្រ័យយកពីគេទាំងស្រង់ឡើយដែលនោះទើបហៅថាជាការថតចម្លង។ ម្យ៉ាងវិញទៀតនៅក្នុង Podcast មួយនោះផងដែរលោកវណ្ណដាក៏បានបញ្ជាក់ពីសកម្មភាពប្រចាំថ្ងៃដែលលោកតែងតែធ្វើផងដែរ ហើយនោះគឺជាការធ្វើបទភ្លេងនោះឯង។ នេះហើយទើបធ្វើអោយទស្សនិកជនកាន់តែបានស្គាល់ពីលោកវណ្ណដាកាន់តែច្បាស់ និងជឿជាក់មុតមាំលើការបកស្រាយរបស់លោក។