ក្រោយពីបានចូលរួមសម្តែងជាកិត្តិយសនៅក្នុងកម្មវិធី Asean Music Showcase Festivalនៅឯប្រទេសសឹង្ហបុរីកាលពីថ្ងៃទី១០ និងទី១១ខែកញ្ញាកន្លងមក លោកវណ្ណដាក៏បានបង្ហោះនូវរូបភាពមួយចំនួនទាក់ទងនឹងព្រឹត្តិការណ៍ចូលរួមសម្តែងរបស់លោក។ដោយនៅក្នុងថ្ងៃទី១៤ ខែកញ្ញាថ្មីៗមកនេះលោកវណ្ណដាបានបង្ហោះរូបភាពជាច្រើនសន្លឹកនៅលើគណនី Instagram ផ្ទាល់ខ្លួន ដែលមានឈ្មោះថា therealvannda ប៉ុន្តែនៅក្នុងនោះមានរូបថតមួយសន្លឹករបស់លោកត្រូវបានមហាជនជាច្រើនកើតផ្ទុះចំណាប់អារម្មណ៍ជាងគេដោយមានរូបរបស់លោកថតរួមគ្នាជាមួយនឹងសិល្បកររ៉េបពីរនាក់ទៀតរបស់ប្រទេសសឹង្ហបុរីគឺលោកShiggashay និងប្រទេសថៃគឺលោក F-Hero ដែលបានទៅចូលរួមនៅកម្មវិធីមួយនោះជាមួយនឹងលោកផងដែរ។ដូចគ្នានឹងនេះផងដែរ លោកShiggashayក៏បានធ្វើការចែករំលែកបន្តនៅលើ Story នូវរូបភាពមួយដែលបានថតជាមួយលោកវណ្ណដានៅក្នុងគណនី Instagram របស់លោកដែលមានឈ្មោះថា shiggashayដោយបានដាក់ទង់ជាតិនៃប្រទេសនីមួយៗ។ ជាក់ស្តែងលោកShiggashayគឺជាសិល្បកររ៉េបមួយរូបរបស់ប្រទេសសឹង្ហបុរីដែលមានភាពជោគជ័យទៅលើការងារសិល្បៈជាច្រើន ដោយក្នុងនោះក៏មានសមិទ្ធផលគួរអោយកត់សម្គាល់មួយផងដែរទៅលើការងាររួមសហការរបស់លោកជាមួយនឹងតារារ៉េបរបស់កូរ៉េ JayPark នូវបទចម្រៀង«uRight» ដែលបានចេញផ្សាយកាលពីថ្ងៃទី២៥ ខែកុម្ភៈ ឆ្នាំ២០២១កន្លងមកនេះ។
មុននឹងចេញផ្សាយបទចម្រៀងលោក Shiggashay ក៏ធ្លាប់បានបង្ហោះរូបរបស់លោករួមគ្នាជាមួយនឹងលោក Jay Park នៅក្នុងគណនី Instagram របស់លោកដូចគ្នាជាមួយនឹងខេបសិនថាuRight, I’m wrong. That’s why I wrote this Song ដើម្បី Promote ជាមួយបទចម្រៀងនេះកាលពីថ្ងៃទី២៣ ខែកុម្ភៈ ឆ្នាំ២០២១ កន្លងមក។ ជាក់ស្តែងកាលពីថ្ងៃទី01 ខែកក្តដា VannDa បានធ្វើឡើងនៅកម្មវិធី Album Listening Party ជាមួយអ្នកគាំទ្រ ដោយលោកវណ្ណដា ក៏បានធ្លាប់បង្ហើបខ្លះៗរួចមកហើយថាលោកនឹងមានសហការជាមួយនឹងតារារ៉េបរបស់កូរ៉េនាពេលអនាគត។គួរបញ្ជាក់ផងដែរថានេះមិនមែនជាលើកទីមួយនោះទេដែលលោកវណ្ណដាតែងតែលេងសើចផ្លូវអារម្មណ៍របស់អ្នកគាំទ្រដោយបានចែករំលែករូបភាពជាមួយបុគ្គលសំខាន់ៗមួយចំនួនដែលលោកមានគម្រោងសហការការងារកន្លងមកដូចជាលោក F-Hero, Sprite and 1Mill ជាដើម ដើម្បីធ្វើការពញ្ញាក់អារម្មណ៏របស់អ្នកគាំទ្ររបស់លោក។
