កាលពីពេលមុននេះបន្តិច​​​ មានការបែកធ្លាយរូបភាពរបស់លោកវណ្ណដា និងលោកជីដេវីតផ្ទាល់នឹងបង្ហាញខ្លួនជាមួយនឹងសិល្បករដ៏ច្រើនលើសលប់ទៀតនៅក្នុងកម្មវិធីប្រគំតន្រ្តីដ៏ធំមួយមានឈ្មោះថា Beyond The Games​​​ដែលជាផ្នែកមួយនៃកម្មវិធីប្រកួតកីឡា SEA GAMES និង PARA SEAGAME កម្ពុជាគឺជាម្ចាស់ផ្ទះផងដែរ។ គួរបញ្ជាក់ផងដែរថា កម្មវិធីនេះនឹងធ្វើឡើងនៅល្ងាចថ្ងៃទី២៨ ខែមេសានេះ នៅឯវិមានឈ្នះ ឈ្នះចាប់ពីម៉ោង៤រសៀលតទៅនេះបើយោងតាមការចែករំលែកពីទំព័រហ្វេសប៊ុកផ្លូវការរបស់កម្មវិធី Beyond The Games នេះផ្ទាល់។ ប៉ុន្តែប្រភពដដែលនៅមិនទាន់បានបង្ហាញរូបភាពផុសស្ទ័ររបស់លោកជីដេវីតនៅឡើយទេ ក្រៅពីលោកវណ្ណដា និងសិល្បករជាច្រើននាក់ទៀត។ យ៉ាងណាមិញផងដែរ យោងតាមប្រភពល្ហៀងចេញពីអ្នកគាំទ្រពិសេសរបស់លោកជីដេវីតម្នាក់បានអោយដឹងថាកម្មវិធីមួយនេះ លោកជីដេវីតនឹងត្រូវចូលជាពិសេសជា Special Guestតែម្តងដែលបានន័យថាពេលនេះខ្លាទាំងពីរនឹងត្រូវជួបគ្នាឆាប់ៗហើយ ថ្វីបើយើងនៅមិនបានព័ត៌មានច្បាស់ការនៅឡើយ។ ប៉ុន្តែយ៉ាងណាៗទស្សនិកជនកុំភ្លេចផងណា ថាកម្មវិធីមួយនេះអាចចូលរួមទស្សនាដោយសេរីជាមួយគោលដៅដ៏ច្បាស់លាស់ថាជាវេទិកាសំរាប់សាធារណជនទាំងអស់គ្នាអាចចូលរួមបង្ហាញក្តីស្រលាញ់ មិនថាជាអ្នកចូលរួមទស្សនា មិនថាជាសិល្បករមកពីប្រភពៗខុសគ្នា គឺអាចមកប្រមូលផ្តុំជួបជុំនៅទីនេះបាន និងដើម្បីអបអរកម្ពុជា ក៏ដូចជាគាំទ្រ និងលើកទឹកចិត្តដល់កីឡាកររបស់យើងដែលនឹងចូលរួមប្រកួតនាពេលខាងមុខ។