កាលពីថ្ងៃទី២៦ ខែកុម្ភៈកន្លងទៅនេះ ដោយមានចំនួនអ្នក Followers នៅលើទំព័រហ្វេសប៊ុកផ្លូវការរបស់អ្នកនាងឳកសុគន្ធកញ្ញារហូតទៅដល់ក្បែរ៤លាននាក់បានចែករំលែកដំណឹងថ្មីមួយទាក់ទងនឹងការរៀបចំព្រឹត្តិការណ៍សប្បុរសធម៌ដ៏អស្ចារ្យខាងមុខនេះនៅថ្ងៃទី៧ និងទី៨ ខែមីនា ដែលកម្មវិធីនេះមានឈ្មោះថា«ខួប៣ឆ្នាំលេខពិសេសផ្ទាល់ខ្លួន» ក្រោមការផ្តួចផ្តើមឡើងដោយក្រសួងសាធារណការ និងដឹកជញ្ជូនផងដែរធ្វើឡើងនៅសួនច្បារវត្តបទុមវតី ចាប់ពីម៉ោង៨ព្រឹករហូតដល់ម៉ោង៩យប់។ គួរបញ្ជាក់ទៀតសោតនៅក្នុងកម្មវិធីមួយនេះដែរក៏មានផ្សារភ្ជាប់ជាមួយការប្រគំតន្រ្តីដែលមានការចូលរួមឡើងដោយកំពូលសិល្បករល្បីៗនៃប្រទេសកម្ពុជាជាច្រើនរូបដែលមានដូចជាលោកវណ្ណដា វណ្ណថាន ក្រុម Polarix ក្រុម La Cima Cartel អ្នកនាងឳកសុគន្ធកញ្ញា អ្នកនាងសុគន្ធនីសា​​​ កញ្ញា Sophia Kao អេណាវីតា និងរ៉ូលីនជាដើម។

យ៉ាងណាមិញផងដែរតាមរយៈព័ត៌មាននេះក៏បានអោយដឹងថានឹងមានការដាក់តាំងពិព័រណ៍ផ្លាកលេខរថយន្ត ការលក់ និងដេញថ្លៃលេខពិសេសផ្ទាល់ខ្លួន ដើម្បីរកថវិកាជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ ហើយក៏មានការផ្សារភ្ជាប់ទៅនឹងការផ្សព្វផ្សាយសុវត្ថិភាពចរាចរណ៍ផ្លូវគោកផងដែរ។ ដូច្នេះអ្នកចូលរួមអាចមកទស្សនាស្តង់ពិព័រណ៍ ការប្រគំតន្រ្តី និងលេងល្បែងកំសាន្តផ្សេងៗដើម្បីឈ្នះរង្វាន់អនុស្សាវរីយ៍ដោយសេរី។ គួររំលឹកផងដែរថាការប្រគំតន្រ្តីនឹងធ្វើឡើងរយ:ពេល​2ថ្ងៃ​​​​ នៅថ្ងៃទី2នៃការប្រគំតន្រ្តី ត្រូវនឹងថ្ងៃទី៨ ចាប់ពីម៉ោង៦ល្ងាចរហូតដល់ម៉ោង៩យ​ប់។ ចង់ដឹងថាលោកវណ្ណដា និងតារាហ៊ីបហប់កម្ពុជាដទៃទៀត មានអ្វីប្លែកចែកជូនទស្សនិកជនទស្សនា កុំភ្លេចចូលរួមទាំងអស់គ្នា!