ផ្ទុះប្រតិកម្មឡើងជាថ្មី ខណៈពេលមានមហាជនមួយចំនួនបានធ្វើការបង្ហោះឡើងវិដេអូសកម្មភាពរបស់លោកវណ្ណដាខណៈពេលចូលរួមកម្មវិធី Sonmalai Mixtape Listening Party របស់លោក Kwan កន្លងទៅនេះ។ គួរបញ្ជាក់ផងដែរថា កម្មវិធីនេះត្រូវបានធ្វើឡើងដោយមានរយៈពេល២ម៉ោងកាលពីយប់ថ្ងៃទី១៩ ខែមករាកន្លងទៅនេះនៅឯ Legend Olympia ដោយមានវត្តមានចូលរួមពីកំពូលរ៉េបផ័រល្បីៗជាច្រើននាក់ ដូចជាលោក KingChi, លោក NPN, លោក Vito, លោកពូឃ្លាំង, ក្រុម La Cima Cartel និងក្រុម The Rapper ជាដើម។ ការជួបគ្នារវាងរ៉េបផ័រជំនាន់ថ្មី និងរ៉េបផ័រជំនាន់មុនដូចជាលោកពូឃ្លាំងនេះ បានសាងការចាប់អារម្មណ៍ខ្លះៗផងដែរសំរាប់បណ្តាអ្នកគាំទ្រមួយចំនួន។
ដោយពួកគេបានសង្កេត តាមប្រមាញ់វិដេអូ និងបង្ហាញចំណាប់អារម្មណ៍មួយជ្រុងតូចរបស់ខ្លួនថា នៅក្នុងកម្មវិធីមួយនេះ លោកវណ្ណដាហាក់ដូចជាមិនបង្ហាញការគួរសម និងស្និទ្ធស្នាលទៅកាន់លោកពូឃ្លាំងទាល់តែសោះ។ ដោយគេបានសរសេរលើកឡើងថា«អាណិតពូណាស់ ជារៀមច្បងមួយរូបដែរ ខំដាក់ខ្លួនទៅកម្មវិធីប្អូនៗតែគេធ្វើដូចមើលមិនឃើញ»។ ខណៈដែលអ្នកមានអ្នកគាំទ្រមួយភាគតូចទៀតដែលបានចូលរួមនៅក្នុងកម្មវិធីនោះដែរ ក៏បានបង្ហាញចំណាប់អារម្មណ៍ថា ជាការពិតទៅ អ្នកទាំងពីរបានរាក់ទាក់គ្នា និងអោបគ្នារួចមកហើយនៅពេលជួបគ្នាដំបូង។ យ៉ាងណាមិញក៏មានបណ្តាអ្នកគាំទ្រខ្លះទៀត ក៏បញ្ចេញមតិឡើងថា នេះក៏ព្រោះថាលោកពូឃ្លាំងធ្លាប់បានចេញបទជាមួយនឹងលោកជីដេវីតទើបបានជាលោកវណ្ណដារាងអន់ចិត្ត។ ចុះទស្សនិកជនយល់ឃើញយ៉ាងណាដែរ?
