ឡូយកប់! ការពិតតំរុយមួយចំនួននៃពាក្យថា«ពេញលេងហើយធីមយើង»របស់លោកវណ្ណដា ក៏ដូចជារូបភាពប្រូហ្វាលរបស់លោកវណ្ណដាដែលឈរនៅពីមុខរថយន្ត Off-Road មួយគ្រឿងយ៉ាងសង្ហាផងនោះ ត្រូវបានលាតត្រដាងឡើងហើយថាសុទ្ធសឹងតែមានទំនាក់ទំនងទៅនឹងបទថ្មីរបស់លោកវណ្ណដាទាំងអស់! យ៉ាងគួរអោយចាប់អារម្មណ៍ជាទីបំផុត។
រូបផ្គុំ Puzzle ត្រូវបានបញ្ចប់កាលពីម្សិញមិញនេះ បន្ទាប់ពីនៅទីបំផុតបទថ្មីរបស់លោកវណ្ណដា«មហិច្ឆតា» ត្រូវបានចេញផ្សាយជាផ្លូវការ និងធ្វើអោយបណ្តាអ្នកគាំទ្រផ្អើលទស្សនា និងចែករំលែកដូចទឹកបាក់ទំនប់! ក្នុងរយៈពេលមិដល់២៤ម៉ោងផង លោកវណ្ណដាទទួលបានចំនួនទស្សនានៅលើហ្វេសប៊ុករហូតដល់១លាន View ទៅហើយ! នេះក៏ព្រោះតែបទថ្មីមួយនេះឆក់ទាញចំណាប់អារម្មណ៍ទស្សនិកជនជាខ្លាំង ទាំងអត្ថន័យ ទាំងបរិយាកាស ទាំងគុណភាពនៃបទចម្រៀង គឺមួយអេមតែម្តង!
ជាក់ស្តែងសង្កេតឃើញថាមួយបទនេះ មិនថាឡើយជា Vibe បទចម្រៀង ទាំងGraphic ទាំងConcept ក្តីគឺហាក់ដូចជាផ្តល់អារម្មណ៍ចូលគ្នាតែមួយបានយ៉ាងល្អ នេះក៏ព្រោះប្រហែលជាដោយសារតែបទចម្រៀងមួយនេះកើតចេញពីការបំផុសគំនិត និងអារម្មណ៍ផ្ទាល់ពីលោកវណ្ណដា ក៏ដូចជាក្រោមការដឹកនាំពីលោកវណ្ណដាតែម្នាក់គត់ប៉ុណ្ណោះ!
នេះបើផ្អែកលើការរៀបរាប់នៅពីក្រោមវិដេអូចម្រៀងនោះបានបង្ហាញឡើងស្រាប់ថាក្នុងនោះការងារស្ទើរតែទាំងស្រុងហើយដែលលោកវណ្ណដាកាន់លើដែលរួមមានដូចជាការផលិត ការនិពន្ធតាក់តែង ការធ្វើភ្លេង ទាំងការធ្វើ Artwork និងរួមទាំងការដឹកនាំផលិតផងដែរ។ ចុះទស្សនិកជនទាំងអស់គ្នាយល់ឃើញយ៉ាងណាដែរចំពោះបទចម្រៀងមួយនេះ?