កាលពីពេលថ្មីៗនេះ រូបភាពពិធីមង្គលការរបស់គូស្វាមីភរិយាត្រកូលអភិជនមួយគូដែលត្រូវបានបង្ហោះឡើងនៅលើទំព័រហ្វេសប៊ុក The Ring Wedding Cambodia កំពុងទទួលបានការចាប់អារម្មណ៍ជាច្រើនពីអ្នកប្រើប្រាស់បណ្តាញសង្គម។ រាប់ចាប់តាំងពីការនិម្មិតរៀបចំកម្មវិធីមួយនេះឡើង និងវិសាលភាពនៃទីតាំងទាំងមូលសុទ្ធតែមានភាពទាក់ទាញខ្លាំងបំផុត ព្រោះត្រូវបានរចនាឡើងតាមបែបបទខ្មែរបុរាណនៅលើផ្ទៃដីសម័យយ៉ាងគួរអោយចាប់អារម្មណ៍។ អ្វីដែលគួរអោយកត់សម្គាល់មួយទៀត គឺថាហាក់ដូចជាអោយតែរបស់ល្អៗកំពូលៗប្រណីតគឺសុទ្ធតែត្រូវបានរាប់បញ្ចូលនៅក្នុងកម្មវិធីនេះទាំងអស់ មិនថាឡើយជាភ្ញៀវអញ្ជើញចូលរួមដែលសុទ្ធជាថ្នាក់កំពូល និងសូម្បីតែសិល្បករផ្តល់ការសម្តែងនៅក្នុងកម្មវិធីនេះផ្ទាល់។

ជាក់ស្តែងកាលពីថ្ងៃទី០១ ខែមិថុនានេះ លោកវណ្ណដាជាសិល្បករលំដាប់កំពូលមួយរូបដែលត្រូវបានមកពន្ញាក់អារម្មណ៍នៅក្នុងកម្មវិធីនេះ និងផ្តល់ការសម្តែងពិសេសជូនភ្ញៀវអញ្ជើញចូលរួមទស្សនា។ ជាមួយនឹងកូនកំលោះលោក ហែម សុវត្ថិ និងកូនក្រមុំអ្នកនាង Neth Vichhuna ដែលជាកូនប្រុសស្រីស្វាមីភរិយានៃគ្រួសារឯកឧត្តមនេត សាវឿន បានធ្វើអោយមហាជននឹកកោតសរសើរថាលោកវណ្ណដាមានអ្នកគាំទ្រនៅគ្រប់ស្រទាប់ជាន់ថ្នាក់តែម្តងហើយ ហើយម្តងនេះគឺប៉ះខាងខ្សែអ្នកគាំទ្រអភិជនតែម្តង។ 

គួរបញ្ជាក់ផងដែរថា នៅក្នុងការសម្តែងនោះ លោកវណ្ណដាបានបកស្រាយបទចំរៀងមួយចំនួនដូចជាបទបូកគីឡូ និងនារីជឿនលឿនជាដើម ហើយក៏ត្រូវបានភ្ញៀវអញ្ជើញចូលរួមថត និងចែករំលែកយ៉ាងព្រោងព្រាតនៅលើបណ្តាញសង្គមផងដែរ។ តើទស្សិកជនយល់ឃើញយ៉ាងណាដែរចំពោះវត្តមានរបស់លោកវណ្ណដា?