តារាចម្រៀងប្រភេទ R&B លោក Van Chesda កាលពីថ្ងៃទី១៤ ខែកុម្ភៈកន្លងទៅនេះបានធ្វើការទំលាក់បទចម្រៀងថ្មីបែបមនោសញ្ចេតនាមួយបទក្រោមចំណងជើងថា«Caress»នៅលើឆាណែលយូធូបផ្លូវការរបស់លោក។ គួរបញ្ជាក់ផងដែរនេះគឺជាបទចម្រៀងទី១ហើយបន្ទាប់ពីការចេញផ្សាយអាល់ប៊ុម Badboi របស់លោកដែលត្រូវបានទំលាក់ពេញនៅថ្ងៃទី២៤ ខែវិច្ឆិកា ឆ្នាំ២០២២កន្លងទៅនេះ។ 

គួររំលឹកផងដែរកាលពីខែមេសា ឆ្នាំ២០២២កន្លងទៅនេះ លោក Van Chesda ក៏បានចូលរួមសម្តែងនៅក្នុងកម្មវិធីប្រគំតន្រ្តី Hanuman Khmer New Year នៅឯខេត្តសៀមរាបផងដែរជាមួយនឹងលោកវណ្ណដា និងតារារ៉េបផ័រល្បីៗជាច្រើនទៀតនៅក្នុងប្រទេសកម្ពុជារហូតដល់ទស្សនិកជនជាច្រើនចង់អោយពួកគេមានបទសហការជាមួយគ្នាថែមទៀតផង។ 

ត្រលប់ទៅដើមឆ្នាំ២០២២ លោក Van Chesda ក៏បានផ្ទុះនូវបទចម្រៀងរួមគ្នាមួយជាមួយនឹងលោក Tena និង Gloomy Vincent មានចំណងជើងថា«ស្ទាវខេត្ត» ដែលមកទល់ពេលនេះមានចំនួនទស្សនារហូតដល់១៥លានដងហើយនៅលើយូធូប។​​​ ម្ចាស់បទចម្រៀង«មេឃស្រទុំ» រូបនេះក៏បានចែករំលែកការបង្ហោះផងដែរទាក់ទងនឹងបទចម្រៀងថ្មីរបស់លោកនៅលើហ្វេសប៊ុកថា«ផ្ញើបទនេះទៅកាន់មិត្តស្រីរបស់អ្នកផង បើមិនអ៊ីចឹងទេអ្នកផ្សេងនឹងធ្វើមែនទេ? កុំអោយអ្នកផ្សេងដណ្តើមកន្លែងអ្នកអោយសោះ»។ តើទស្សនិកជនពេញចិត្តបទចម្រៀងថ្មីរបស់លោក Van Chesda ដែររឺទេ? Let me know in your comment below!