1. អាមេរិក​នឹង​ដាក់​អាវុធ​នុយក្លេអ៊ែរ“​ខ្លាំង​ជាង​គ្រាប់បែក​ហ៊ីរ៉ូស៊ីម៉ា៣ដង”នៅ​មូលដ្ឋាន​ទ័ព​អាកាស​អង់គ្លេស

យោងតាមសារព័ត៌មាន​​​ Telegraph បានអោយដឹងថា អាមេរិក​គ្រោង​ដាក់​អាវុធ​នុយក្លេអ៊ែរ​នៅ​ចក្រភព​អង់គ្លេស​ជា​លើក​ដំបូង​ក្នុង​រយៈពេល ១៥​ឆ្នាំ នៅខណៈពេល​មាន​ការ​គំរាម​កំហែង​ពី​រុស្ស៊ី​កាន់​តែ​ខ្លាំង។ ឯកសារមន្ទីរបញ្ចកោណដែលត្រូវបានឃើញដោយ Telegraph បានបង្ហាញពីកិច្ចសន្យាទិញទីបរិក្ខារថ្មីនៅមូលដ្ឋានទ័ព RAF Lakenheath ក្នុងស្រុក Suffolk នៃចក្រភពអង់គ្លេស។

សារព័ត៌មាន Telegraph បាននិយាយថា សហរដ្ឋអាមេរិកមានបំណងដាក់ក្បាលគ្រាប់នុយក្លេអ៊ែរមានទំហំបីដងខ្លាំងជាងគ្រាប់បែក Hiroshima នៅឯមូលដ្ឋានទ័ពអាកាសនេះ។ មូលដ្ឋានទ័ព RAF Lakenheath ត្រូវបានរំពឹងថានឹងមានគ្រាប់បែកទំនាញ B61-12 នេះដែលអាចផលិតបានថាមពលរហូតដល់ 50 គីឡូតោន ដែលលើសពីថាមពលរបស់គ្រាប់បែក Hiroshima បីដង។

គួររំលឹកផងដែរថា សហរដ្ឋអាមេរិកបានដកកាំជ្រួចនុយក្លេអ៊ែរចេញពីមូលដ្ឋានអាកាស Lakenheath របស់ចក្រភពអង់គ្លេសនេះក្នុងឆ្នាំ 2008 ដោយវិនិច្ឆ័យថាការគំរាមកំហែងនៃសង្គ្រាមត្រជាក់ពីទីក្រុងម៉ូស្គូបានថយចុះរួចទៅហើយ។ រុស្ស៊ីបានព្រមានថា ការដាក់អាវុធរបស់អាមេរិកក្នុងប្រទេសអង់គ្លេស នឹងត្រូវបានទីក្រុងមូស្គូយល់ថាជា"ការកើនឡើងនៃសង្គ្រាម" ហើយបានប្តេជ្ញាថានឹងផ្តល់សំណងតាមវិធានការប្រឆាំង។

2. ក្រុមហ៊ូធីវាយប្រហារនាវាដឹកប្រេង Marlin Luanda អង់គ្លេសនៅឈូងសមុទ្រ Aden

យោងតាមសារព័ត៌មាន BBC ចុះផ្សាយថ្ងៃទី២៧ ខែមករាបានអោយដឹងថា កប៉ាល់ដឹកប្រេងដែលមានទំនាក់ទំនងជាមួយចក្រភពអង់គ្លេសបានឆាបឆេះអស់ជាច្រើនម៉ោងនៅក្នុងឈូងសមុទ្រ Aden បន្ទាប់ពីរងការវាយប្រហារដោយមីស៊ីលដែលបាញ់ឡើងដោយក្រុម Houthi ។ ចលនាគាំទ្រដោយអ៊ីរ៉ង់ដែលមានមូលដ្ឋាននៅយេម៉ែន បាននិយាយថា ខ្លួនបានកំណត់គោលដៅលើនាវា Marlin Luanda កាលពីថ្ងៃសុក្រ ដើម្បីឆ្លើយតបទៅនឹង"ការឈ្លានពានរបស់អាមេរិក-អង់គ្លេស"។

សហរដ្ឋ​អាមេរិក និង​ចក្រភព​អង់គ្លេស​បាន​បើក​ការ​វាយ​ប្រហារ​ផ្លូវ​អាកាសមក​លើ​គោលដៅនៃ​ក្រុមឧទ្ទាម Houthi វិញដើម្បី​ជា​ការ​ឆ្លើយ​តប​នឹង​ការ​វាយ​ប្រហារ​លើ​កប៉ាល់​នៅ​ក្នុង​តំបន់​សមុទ្រ​ក្រហម។ នាវាកងទ័ពជើងទឹកបារាំង ឥណ្ឌា និងអាមេរិកបានផ្តល់ជំនួយដល់នាវានេះផងដែរ។ រដ្ឋមន្ត្រីការពារជាតិចក្រភពអង់គ្លេសលោក Grant Shapps បានហៅការវាយប្រហារនេះថា "ជាការមិនអាចទទួលយកបាន និងខុសច្បាប់"។

3. ពូទីនចំអកអឺរ៉ុបនៅពិធីរំលឹកសង្គ្រាមលោកលើកទី២

យោងតាមសារព័ត៌មាន CTV News ចុះផ្សាយថ្ងៃទី២៧ ខែមករាបានអោយដឹងថា ប្រធានាធិបតីរុស្ស៊ីលោកវ្ល៉ាឌីមៀពូទីន បានថ្កោលទោសអឺរ៉ុបកាលពីថ្ងៃសៅរ៍ចំពោះ“ភាពស្អប់នៃជាតិនិយមរុស្ស៊ី” និងបានរិះគន់រដ្ឋបាល់ទិកជុំវិញបញ្ហាសិទ្ធិមនុស្សនៅឯពិធីបង្ហាញរំលឹកនៃសង្គ្រាមលោកលើកទីពីរ។

ចាប់តាំងពីលោកបានបញ្ជូនទាហានរុស្ស៊ីចូលទៅក្នុងអ៊ុយក្រែនជិតរយៈពេល 2 ឆ្នាំមុនមក លោកពូទីនបានធ្វើការប្រៀបធៀបទៅនឹងការប្រយុទ្ធប្រឆាំងនឹងពួក Nazis ដើម្បីប្រមូលផ្តុំនៃប្រទេសរបស់លោក។

លោកពូទីនបាននិយាយនៅក្នុងតំបន់ Leningrad សម្រាប់ខួបលើកទី 80 នៃការបញ្ចប់នៃការឡោមព័ទ្ធរបស់ណាស៊ីថា "របបនៅទីក្រុងគៀវកំពុងតែជួយសមគំនិតកងទ័ពរបស់ហ៊ីត្លែរ ម្យ៉ាងទៀតនៅក្នុងបណ្តាប្រទេសមួយចំនួននៅអឺរ៉ុប ក៏បានបណ្តុះអោយមានការស្អប់ជាតិនិយមរុស្ស៊ីរួចទៅហើយផ្សព្វផ្សាយជាគោលនយោបាយរបស់រដ្ឋ។ លោកបាននិយាយថា គោលបំណងរបស់អាល្លឺម៉ង់នៅពេលនោះ គឺដើម្បីលួចធនធានរបស់សហភាពសូវៀត និងលុបបំបាត់ប្រជាជនរបស់ប្រទេសនេះ។