មន្ទីរបញ្ចកោណបានប្រកាសថា រដ្ឋមន្ត្រីការពារជាតិលោក Lloyd Austin បាននិយាយជាមួយសមភាគីអារ៉ាប៊ីសាអូឌីតគឺព្រះអង្គម្ចាស់ Khalid bin Salman ពីការគំរាមកំហែងរបស់ ក្រុម Houthi ទៅលើសេរីភាពនៃការធ្វើនាវាចរណ៍នៅសមុទ្រក្រហម"។ ខណៈដែលឧត្តមសេនីយ៍លោក Charles Brown Jr., ប្រធាននៃអគ្គសេនាធិការចម្រុះក៏បានធ្វើការសន្ទនាស្រដៀងគ្នានេះជាមួយសមភាគីបារាំងរបស់លោក ហើយបន្ទាប់មកកាលពីថ្ងៃសៅរ៍នាវាចម្បាំងបារាំងបានបាញ់ទម្លាក់ដ្រូនចំនួនពីរដែលត្រូវបានចោទប្រកាន់ថាបាញ់ចេញពីប្រទេសយេម៉ែន។
-
រដ្ឋមន្រ្តីអាមេរិក និងអារ៉ាប៊ីសាអូឌីតពិភាក្សាគ្នាពីការគំរាមកំហែងរបស់ក្រុម Houthi
យោងតាមសារព័ត៌មាន Alarabiya ចុះផ្សាយថ្ងៃទី០៧ ខែធ្នូបានអោយដឹងថា មន្ទីរបញ្ចកោណបាននិយាយកាលពីថ្ងៃព្រហស្បតិ៍ថា រដ្ឋមន្ត្រីការពារជាតិអាមេរិក និងអារ៉ាប៊ីសាអូឌីតបានពិភាក្សាគ្នាអំពីការវាយប្រហាររបស់ក្រុម Houthi នាពេលថ្មីៗនេះនៅសមុទ្រក្រហម តាមរយៈការសន្ទនាតាមទូរស័ព្ទ។
ព្រះអង្គម្ចាស់ Khalid bin Salman បាននិយាយនៅលើការបង្ហោះលើបណ្តាញសង្គម X ថាទ្រង់បាននិយាយជាមួយរដ្ឋមន្ត្រីការពារជាតិលោក Lloyd Austin អំពីទំនាក់ទំនងទ្វេភាគី និងការអភិវឌ្ឍន៍នៅក្នុងតំបន់។
មន្ទីរបញ្ចកោណបានសង្កត់ធ្ងន់លើសំដីរបស់លោកឧត្តមសេនីយ៍ Pat Ryder ថា “លោក Austin បាននិយាយថាការឈ្លានពានរបស់ក្រុម Houthi នឹងធ្វើអោយនាវាដែលឆ្លងកាត់ផ្លូវទឹកសំខាន់ៗមានហានិភ័យ និងប៉ះពាល់ដល់លំហូរពាណិជ្ជកម្មសេរី និងឧស្សាហកម្មដឹកជញ្ជូនអន្តរជាតិ"។ លោក Austin ក៏បានសង្កត់ធ្ងន់លើ "តួនាទីដ៏គ្រោះថ្នាក់" របស់អ៊ីរ៉ង់ ផងដែរក្នុងការផ្តល់ប្រឹក្សា បំពាក់អាវុធ និងបណ្តុះបណ្តាលក្រុម Houthis។
-
ប្រតិបត្តិការអ៊ីស្រាអែលនៅហ្គាហ្សាជិតឈានចូលមកដល់ទីបញ្ចប់
យោងតាមសារព័ត៌មាន Axios ចុះផ្សាយថ្ងៃទី០៨ ខែធ្នូបានអោយដឹងថា អ៊ីស្រាអែលរំពឹងថានឹងបញ្ចប់ប្រតិបត្តិការយោធារបស់ខ្លួននៅភាគខាងត្បូងទីក្រុង Gaza នៃតំបន់ Khan Younis ក្នុងរយៈពេលត្រឹមតែពី 3 ទៅ 4 សប្តាហ៍ទៀតប៉ុណ្ណោះ។
រដ្ឋបាលលោក Biden បានគាំទ្រប្រតិបត្តិការរបស់អ៊ីស្រាអែលនៅតំបន់ហ្គាហ្សា ហើយនិយាយថាខ្លួនគាំទ្រគោលដៅក្នុងការបណ្តេញក្រុមហាម៉ាសពីតំបន់ហ្គាហ្សា ប៉ុន្តែសេតវិមានកំពុងស្ថិតនៅក្រោមសម្ពាធអន្តរជាតិ និងក្នុងស្រុកអោយអាមេរិកប្រាប់អ៊ីស្រាអែលឱ្យបញ្ចប់សង្រ្គាមអោយបានកាន់តែរហ័ស។
មន្ត្រីជាន់ខ្ពស់អ៊ីស្រាអែលបាននិយាយថា កងកម្លាំងការពារអ៊ីស្រាអែល "បានឈានទៅមុខគួរឱ្យកត់សម្គាល់"នៅតំបន់ភាគខាងជើងនៃហ្គាហ្សាស្ទ្រីប ប៉ុន្តែថាប្រតិបត្តិការនៅក្នុងទីក្រុងភាគខាងត្បូងនៃ Khan Younis ដែលអ៊ីស្រាអែលជឿថាជាកន្លែងដែលក្រុមមេដឹកនាំហាម៉ាសកំពុងស្ថិតនៅ"ទើបតែបានចាប់ផ្តើម"ប៉ុណ្ណោះ ។
មន្ត្រីការពារជាតិអ៊ីស្រាអែលបាននិយាយថា សហរដ្ឋអាមេរិកនឹងពេញចិត្ត ប្រសិនបើអ៊ីស្រាអែលបញ្ចប់ដំណាក់កាលប្រតិបត្តិការវាយលុកខ្លាំងនៅចុងខែធ្នូនេះ ខណៈដែលអ៊ីស្រាអែលកំពុងកំណត់គោលដៅនៅចុងខែមករានេះវិញ។
-
អាមេរិកស្វែងរកទាហានស៊ីឈ្នួលរបស់UAEនៅយេម៉ែនប្រឆាំងនឹង Houthi
យោងតាមសារព័ត៌មាន The Cradle ចុះផ្សាយថ្ងៃទី០៨ ខែធ្នូបានអោយដឹងថា ទីក្រុងវ៉ាស៊ីនតោនកំពុងធ្វើការជ្រើសរើសក្រុមទាហានស៊ីឈ្នួលដែលគាំទ្រដោយប្រទេសអារ៉ាប់រួម នៅក្នុងប្រទេសយេម៉ែនដើម្បី "បង្វែរចំណាប់អារម្មណ៍ទីក្រុង Sanaa នៃប្រទេសយេម៉ែន" ពីប្រតិបត្តិការយោធារបស់ខ្លួនប្រឆាំងនឹងអ៊ីស្រាអែល។
យោងតាមរបាយការណ៍ បេសកជនពិសេសរបស់សហរដ្ឋអាមេរិកសម្រាប់ប្រទេសយេម៉ែនលោក Tim Lenderking បានជួបជាមួយប្រធានក្រុមប្រឹក្សាអន្តរកាលភាគខាងត្បូង (STC) ដែលគាំទ្រដោយអារ៉ាប់រួមគឺលោក Aidarous al-Zubaidi នៅក្នុងកិច្ចប្រជុំដែលធ្វើឡើងនៅក្នុងរដ្ឋធានី Abu Dhabi។
កិច្ចប្រជុំរបស់លោក Lenderking ជាមួយលោក Zubaidi ត្រូវបានរាយការណ៍ថាបានផ្តោតលើការកេណ្ឌ"កងជីវពលដែលមានទំនាក់ទំនងនឹងក្រុម STC និងស្ថិតក្រោមមូលនិធិរបស់អារ៉ាប់រួមដើម្បីអនុវត្តប្រតិបត្តិការប្រឆាំងនឹងគូសត្រូវរបស់អ៊ីស្រាអែលនៅក្នុងប្រទេសយេម៉ែន" ។
