កងទ័ពរំដោះប្រជាជនចិនកាលពីថ្ងៃពុធបានចាប់ផ្តើមដំណើរការការល្បាតរយៈពេលពីរថ្ងៃជាប្រចាំនៅសមុទ្រចិនខាងត្បូង ស្របពេលដែលសហរដ្ឋអាមេរិក និងហ្វីលីពីនកំពុងធ្វើសមយុទ្ធរួមគ្នាក្នុងតំបន់នោះ។ ប្រព័ន្ធផ្សព្វផ្សាយរុស្ស៊ីបានរាយការណ៍ថា អគ្គីភ័យបានឆាបឆេះនៅប៉ុស្តិ៍ស្ថានីយ៍រងថាមពលមួយក្នុងរដ្ឋធានីរបស់ប្រទេសរុស្ស៊ីកាលពីថ្ងៃទី4 ខែមករា បានបណ្តាលឱ្យដាច់ចរន្តអគ្គិសនី និងកំដៅនៅក្នុងអគារពហុជាន់ជាច្រើននៅក្នុងខណៈពេលដែលមានសីតុណ្ហភាពដ៏ត្រជាក់។ អ៊ុយក្រែន និងរុស្ស៊ីកាលពីថ្ងៃពុធបានប្រកាសការដោះដូរអ្នកទោសនៃសង្គ្រាមជាលើកដំបូងរបស់ពួកគេក្នុងរយៈពេលជិត 5 ខែមកនេះ ដោយភាគីនីមួយៗបានដោះលែងជាង 200 នាក់។

1. ចិនល្បាតសមុទ្រចិនខាងត្បូងខណៈអាមេរិក និងភីលីពីនធ្វើសមយុទ្ធរួមគ្នា

យោងតាមសារព័ត៌មាន Global Times ចុះផ្សាយថ្ងៃទី០៣ ខែមករាបានអោយដឹងថា កងទ័ពរំដោះប្រជាជនចិនកាលពីថ្ងៃពុធបានចាប់ផ្តើមដំណើរការការល្បាតរយៈពេលពីរថ្ងៃជាប្រចាំនៅសមុទ្រចិនខាងត្បូង ស្របពេលដែលសហរដ្ឋអាមេរិក និងហ្វីលីពីនកំពុងធ្វើសមយុទ្ធរួមគ្នាក្នុងតំបន់នោះ ជាមួយនឹងអ្នកជំនាញបាននិយាយថា ការល្បាតរបស់ប្រទេសចិនចង្អុលបង្ហាញពីការប្តេជ្ញាចិត្ត និងឆន្ទៈដ៏មុតមាំរបស់ចិនក្នុងការការពារអធិបតេយ្យភាពដែនដី និងដែនសមុទ្ររបស់ខ្លួន។

បញ្ជាការភាគខាងត្បូងនៃកងទ័ពរំដោះប្រជាជនចិនបានរៀបចំកងនាវាចរ និងទ័ពអាកាស ដើម្បីធ្វើការល្បាតជាប្រចាំនៅសមុទ្រចិនខាងត្បូងនោះរៀងរាល់ថ្ងៃពុធដល់ថ្ងៃព្រហស្បតិ៍ នេះបើតាមទីបញ្ជាការបានលើកឡើងនៅក្នុងសេចក្តីប្រកាសព័ត៌មានមួយកាលពីថ្ងៃពុធ។

សេចក្តីប្រកាសបានលើកឡើងថា “កងទ័ពរបស់យើងគឺមានការប្រុងប្រយ័ត្នខ្ពស់ដើម្បីការពារសន្តិសុខអធិបតេយ្យភាពជាតិ និងសិទ្ធិ និងផលប្រយោជន៍ដែនសមុទ្រ។ រាល់សកម្មភាពយោធាដែលធ្វើឱ្យស្ថានការណ៍មានភាពតានតឹង ឬបង្កើតភាពតានតឹងនៅសមុទ្រចិនខាងត្បូង នឹងត្រូវស្ថិតនៅក្រោមការគ្រប់គ្រងទាំងស្រុង។”

2. ភ្លើង​ឆេះ​​នៅ​ស្ថានីយ​រងទី​ក្រុង​មូ​ស្គូ​បង្ក​ឱ្យ​មាន​កំហឹង

យោងតាមសារព័ត៌មាន The Kyiv Independent ចុះផ្សាយថ្ងៃទី០៤ ខែមករាបានអោយដឹងថា ប្រព័ន្ធផ្សព្វផ្សាយរុស្ស៊ីបានរាយការណ៍ថា អគ្គីភ័យបានឆាបឆេះនៅប៉ុស្តិ៍ស្ថានីយ៍រងថាមពលមួយក្នុងរដ្ឋធានីរបស់ប្រទេសរុស្ស៊ីកាលពីថ្ងៃទី4 ខែមករា បានបណ្តាលឱ្យដាច់ចរន្តអគ្គិសនី និងកំដៅនៅក្នុងអគារពហុជាន់ជាច្រើននៅក្នុងខណៈពេលដែលមានសីតុណ្ហភាពដ៏ត្រជាក់។

បណ្តាញព័ត៌មាន Telegram របស់រុស្ស៊ី Mash បានរាយការណ៍ថា ភ្លើងបានឆាបឆេះនៅប៉ុស្តិ៍ស្ថានីយ៍រងថាមពលមួយនៅភាគឦសាននៃទីក្រុងមូស្គូ នៅម៉ោងប្រហែល ៦ ព្រឹកម៉ោងក្នុងស្រុក ដែលបណ្តាលឱ្យមានការដាច់ភ្លើងនៅក្នុងសង្កាត់ក្រុង Otradnoye, Bibirevo ក៏ដូចជាភាគខាងជើង និងភាគខាងត្បូង Medvedkovo ។

សីតុណ្ហភាពនៅក្នុងអគារដែលរងផលប៉ះពាល់ត្រូវបានរាយការណ៍ថាបានធ្លាក់ចុះដល់ 10-15 អង្សាសេ។ យោងតាមប្រព័ន្ធផ្សព្វផ្សាយរុស្ស៊ី យប់ថ្ងៃទី4 ខែមករានេះគឺជាយប់ត្រជាក់បំផុតនៅទីក្រុងមូស្គូចាប់តាំងពីដើមរដូវរងាមក ដោយសីតុណ្ហភាពបានធ្លាក់ចុះដល់ទៅដក 27.1 អង្សាសេ។

មូលហេតុ​នៃ​ការ​ឆេះ​នេះ​មិន​ត្រូវ​បាន​​រាយការណ៍​ឡើយ​។ កត់សម្គាល់ឃើញផងដែរថា ឧបទ្ទវហេតុនេះបានកើតឡើងនៅតែប៉ុន្មានថ្ងៃប៉ុណ្ណោះបន្ទាប់ពីការវាយប្រហាររបស់រុស្ស៊ីមកលើទីក្រុង Kyiv ដែលបានបណ្តាលអោយពលរដ្ឋអ៊ុយក្រែន 260,000 នាក់រស់នៅដោយមិនមានថាមពលប្រើប្រាស់ជាបណ្តោះអាសន្ន។

3. អារ៉ាប់រួមសម្រុះសម្រួលការដោះដូរអ្នកទោសរុស្ស៊ី និងអ៊ុយក្រែន

យោងតាមសារព័ត៌មាន Reuters ចុះផ្សាយថ្ងៃទី០៤ ខែមករាបានអោយដឹងថា អ៊ុយក្រែន និងរុស្ស៊ីកាលពីថ្ងៃពុធបានប្រកាសការដោះដូរអ្នកទោសនៃសង្គ្រាមជាលើកដំបូងរបស់ពួកគេក្នុងរយៈពេលជិត 5 ខែមកនេះ ដោយភាគីនីមួយៗបានដោះលែងជាង 200 នាក់ បន្ទាប់ពីពួកគេបានលើកឡើងថាកើតឡើងបន្ទាប់ពីការចរចាដ៏ស្មុគស្មាញដែលចូលរួមសម្រុះសម្រួលដោយប្រទេសអារ៉ាប់រួម។

ក្រសួងការពារជាតិរុស្ស៊ីបាននិយាយថា បុគ្គលិកយោធាចំនួន២៤៨នាក់ត្រូវបានប្រគល់មកវិញដោយអ៊ុយក្រែន។ ខណៈដែលទីក្រុង Kyiv ក៏បាន​និយាយ​វិញផងដែរថា ខ្លួន​បាន​នាំ​មនុស្សរបស់ខ្លួនមកវិញចំនួន ២៣០ នាក់​ ដោយក្នុង​នោះ​មាន​ទាហាន២២៤នាក់ និង​ជនស៊ីវិល ៦នាក់ ដែល​ជា​ការ​ដោះដូរ​ទាហានដ៏ធំបំផុតនៅក្នុងកំណត់ត្រាកន្លងមក។ ​

ក្រសួងការបរទេសអារ៉ាប់រួមបានទទួលស្គាល់ពីតួនាទីរបស់ខ្លួននៅក្នុងការសម្រុះសម្រួលនេះ ហើយក៏បាននិយាយនៅក្នុងសេចក្តីថ្លែងការណ៍មួយថា ការដោះដូរនេះអាចសម្រេចទៅបានគឺដោយសារ "ទំនាក់ទំនងមិត្តភាពដ៏រឹងមាំ" របស់ខ្លួនជាមួយទាំងទីក្រុងម៉ូស្គូ និងទីក្រុង Kyiv ។

អារ៉ាប់រួមបានផ្តល់ទាំងកិច្ចខិតខំប្រឹងប្រែង និងជំនួយមនុស្សធម៌បន្ថែមទៀត និងការស្វែងរកដំណោះស្រាយសន្តិភាពនៅក្នុងសង្គ្រាមនេះ។