1. រុស្សីវាយប្រហាររ៉ូម៉ានីនៅខណៈពេលណាតូស្ងៀមស្ងាត់
យោងតាមសារព័ត៌មាន Reuters ចុះផ្សាយថ្ងៃទី០៤ ខែកញ្ញាបានអោយដឹងថា អ៊ុយក្រែនបាននិយាយកាលពីថ្ងៃចន្ទថា ដ្រូនរបស់រុស្ស៊ីបានបំផ្ទុះនៅលើទឹកដីនៃសមាជិកណាតូរ៉ូម៉ានីក្នុងអំឡុងពេលការវាយប្រហារតាមផ្លូវអាកាសនាពេលយប់នៅលើកំពង់ផែអ៊ុយក្រែនដោយឆ្លងកាត់ទន្លេ Danube ប៉ុន្តែទីក្រុង Bucharest បានបដិសេធថាទឹកដីរបស់ខ្លួនមិនត្រូវបានវាយប្រហារឡើយ។ ទីក្រុងមូស្គូបានធ្វើការវាយប្រហារតាមអាកាសក្នុងរយៈចម្ងាយឆ្ងាយទៅលើគោលដៅនានាក្នុងប្រទេសអ៊ុយក្រែនចាប់តាំងពីការចាប់ផ្តើមនៃការលុកលុយរបស់ខ្លួនកាលពីឆ្នាំមុនមកម្ល៉េះ។ ចាប់តាំងពីខែកក្កដា នៅពេលដែលទីក្រុងមូស្គូបានបោះបង់ចោលកិច្ចព្រមព្រៀងដែលដកការបិទច្រកសមុទ្រខ្មៅរបស់អ៊ុយក្រែន ពួកគេបានវាយប្រហារកំពង់ផែទន្លេអ៊ុយក្រែនម្តងហើយម្តងទៀតដែលឆ្លងកាត់ទន្លេ Danube ពីប្រទេសរូម៉ានី។ រុស្ស៊ីបានបើកការវាយប្រហារតាមអាកាសរបស់ខ្លួនជាច្រើនម៉ោងមុនពេលប្រធានាធិបតីលោកវ្ល៉ាឌីមៀពូទីននឹងបានត្រូវពិភាក្សាអំពីការស្តារឡើងវិញនូវកិច្ចព្រមព្រៀងសមុទ្រខ្មៅជាមួយអ្នកឧបត្ថម្ភនៃកិច្ចព្រមព្រៀងនេះគឺប្រធានាធិបតីទួរគីលោក Tayyip Erdogan ។ អ្នកនាំពាក្យក្រសួងការបរទេសលោក Oleg Nikolenko បានលើកឡើងដោយសំដៅលើដ្រូនដែលផលិតដោយអ៊ីរ៉ង់ថា“យោងតាមសេវាឆ្មាំព្រំដែនរដ្ឋរបស់ប្រទេសអ៊ុយក្រែនកាលពីយប់មិញ ក្នុងអំឡុងពេលនៃការវាយប្រហារដ៏ធំរបស់រុស្ស៊ីនៅជិតកំពង់ផែ Izmail ដ្រូន Shakheds របស់រុស្ស៊ីបានធ្លាក់ និងបំផ្ទុះនៅលើទឹកដីនៃប្រទេសរូម៉ានី។” លោកបានសរសេរនៅលើFacebookថា “នេះគឺជាការបញ្ជាក់មួយទៀតដែលថាភេរវកម្មកាំជ្រួចរបស់រុស្ស៊ីបង្កការគំរាមកំហែងយ៉ាងធំមិនត្រឹមតែដល់សន្តិសុខរបស់អ៊ុយក្រែនប៉ុណ្ណោះទេ ប៉ុន្តែថែមទាំងដល់សន្តិសុខនៃប្រទេសជិតខាង រួមទាំងរដ្ឋជាសមាជិកណាតូផងដែរ”។
2. ក្រុមហ៊ុន Huawei របស់ចិនបើកមជ្ឈមណ្ឌល Cloud នៅអារ៉ាប៊ីសាអូឌីត
យោងតាមសារព័ត៌មាន Reuters ចុះផ្សាយថ្ងៃទី០៤ ខែកញ្ញាបានអោយដឹងថា ក្រុមហ៊ុនបច្ចេកវិទ្យាយក្សរបស់ចិនបាននិយាយកាលពីថ្ងៃចន្ទថាក្រុមហ៊ុន Huawei Technologies (HWT.UL) បានបើកមជ្ឈមណ្ឌលទិន្នន័យ Cloud នៅក្នុងរដ្ឋធានី Riyadh នៃប្រទេសអារ៉ាប៊ីសាអូឌីតក្នុងគោលបំណងដើម្បីពង្រីកការផ្តល់សេវាអនឡាញរបស់ខ្លួននៅក្នុងតំបន់មជ្ឈិមបូព៌ា និងអាហ្វ្រិកខាងជើង។ មជ្ឈមណ្ឌលទិន្នន័យ Cloudនៅទីក្រុងRiyadhដែលជាទី30ទូទាំងពិភពលោករបស់ក្រុមហ៊ុន Huaweiនឹងគាំទ្រសេវាកម្មរដ្ឋាភិបាលសម្រាប់ព្រះរាជាណាចក្រអារ៉ាប៊ីសាអូឌីតនិងអនុញ្ញាតឱ្យមានកម្មវិធីAIនិងគំរូភាសាជាភាសាអារ៉ាប់នេះបើតាមមន្ត្រីក្រុមហ៊ុនបានប្រាប់សន្និសីទសារព័ត៌មានខ្លីមួយ។ លោក Steven Yi ដែលជាប្រធានប្រចាំតំបន់របស់ក្រុមហ៊ុនបាននិយាយថា "ការអនុវត្តរបស់ Huawei cloud មិនមែនសម្រាប់ត្រឹមតែយើងប៉ុណ្ណោះទេ ប៉ុន្តែវាជាស្ពានចម្លងដែលនឹងនាំក្រុមហ៊ុនចិនផ្សេងទៀតទៅកាន់អារ៉ាប៊ីសាអូឌីត" ។ លោកបានមានប្រសាសន៍ថាជំហាននេះនឹងរួមចំណែកដល់ការអភិវឌ្ឍន៍សេដ្ឋកិច្ចឌីជីថលរបស់ប្រទេសនេះ ដោយលោកបានបន្ថែមថា Huawei បានបើកការិយាល័យកណ្តាលរបស់ខ្លួនក្នុងតំបន់នៅក្នុងរដ្ឋធានីអារ៉ាប៊ីសាអូឌីតនៅឆ្នាំនេះ។ អារ៉ាប៊ីសាអូឌីតធ្លាប់បាននិយាយថាខ្លួននឹងមិនចុះកិច្ចសន្យាជាមួយក្រុមហ៊ុនបរទេសដែលមិនមានទីស្នាក់ការកណ្តាលក្នុងតំបន់នៅក្នុងព្រះរាជាណាចក្របន្ទាប់ពីឆ្នាំនេះឡើយ។
3. ការដកមូលធនដ៏ច្រើនពីស្វីសទៅមជ្ឈិមបូព៌ា
យោងតាមសារព័ត៌មាន The Press United ចុះផ្សាយថ្ងៃទី០១ ខែកញ្ញាបានអោយដឹងថា SwissInfo បានរាយការណ៍កាលពីថ្ងៃសុក្រថា ការដាក់ទណ្ឌកម្មរបស់ប្រទេសស្វីសប្រឆាំងនឹងអ្នកមានទ្រព្យសម្បត្តិស្តុកស្តម្ភនិងអាជីវកម្មរបស់ពួកគេបានបង្ខំឱ្យពួកគេផ្លាស់ទីប្រាក់របស់ពួកគេទៅកាន់កន្លែងផ្សេងទៀត ជាពិសេសគឺប្រទេសអារ៉ាប់រួម។ ទោះបីជាមិនមែនជាសមាជិកសហភាពអឺរ៉ុបក៏ដោយ ស្វីសបានបោះបង់ចោលអព្យាក្រឹតភាពតាមប្រពៃណីរបស់ខ្លួនកាលពីឆ្នាំមុនហើយបានចូលរួមជាមួយប្លុកនេះក្នុងការអនុម័តទណ្ឌកម្មប្រឆាំងនឹងបុគ្គល ក្រុមហ៊ុន និងអង្គការរបស់រុស្ស៊ី និងការបង្កកទ្រព្យសម្បត្តិរបស់រុស្ស៊ី ជាការសងសឹកចំពោះប្រតិបត្តិការយោធារបស់ទីក្រុងម៉ូស្គូនៅអ៊ុយក្រែន។ យោងតាម Swissinfo ដោយដកស្រង់ការសិក្សាពី Boston Consulting Group (BCG) បានអោយដឹងថា "ការចាកចេញយ៉ាងច្រើននៃទ្រព្យសម្បត្តិរបស់រុស្ស៊ី" បណ្តាលឱ្យមានការកើនឡើងចំនួន$100ពាន់លានដុល្លានៃទ្រព្យសម្បត្តិដែលដាក់ក្នុងប្រទេសអារ៉ាប់រួមកាលពីឆ្នាំមុន។ របាយការណ៍នេះបានចង្អុលបង្ហាញថាធនាគារឯកជនស្វីសមានការព្រួយបារម្ភថានិន្នាការនេះមិនរីករាលដាលដល់អតិថិជនមកពីប្រទេសដទៃទៀត។ Swissinfo បានសរសេរថា "គន្លឹះគឺជាការបញ្ចុះបញ្ចូលពួកឥស្សរជនដែលមានទ្រព្យសម្បត្តិថាការដាក់ទណ្ឌកម្មប្រឆាំងនឹងរុស្ស៊ីមិនធ្វើឱ្យប៉ះពាល់ដល់អព្យាក្រឹតភាពរបស់ប្រទេសស្វីស ដែលជាចំណុចលក់ដ៏សំខាន់សម្រាប់អ្នកមានដែលរស់នៅក្នុងប្រទេសដែលមិនមានស្ថិរភាពនយោបាយ"។ លោក Gregoire Bordier ប្រធានសមាគមធនាគារឯកជនស្វីសបានប្រាប់អ្នកយកព័ត៌មានថា“ពួកគេមិនចោទសួរថាហេតុអ្វីបានជាការដាក់ទណ្ឌកម្មសំដៅលើក្រុមមនុស្សមួយចំនួនទេ។ សំណួរគួរតែសួរថា "តើអ្នកគួរតែតំរង់ទៅទីណា" ជាជាង "តើអ្នកកំពុងនៅឯណាឥឡូវនេះ" ។ ការបដិសេធរបស់ UAE ក្នុងការថ្កោលទោសប្រតិបត្តិការយោធារបស់រុស្ស៊ីនៅអ៊ុយក្រែននៅឯក្រុមប្រឹក្សាសន្តិសុខអង្គការសហប្រជាជាតិហាក់ដូចជាការអញ្ជើញសំរាប់ជនជាតិរុស្ស៊ីដែលមានទ្រព្យសម្បត្តិស្តុកស្តម្ភ នេះបើយោងតាមរបាយការណ៍ប្រព័ន្ធផ្សព្វផ្សាយ។ ប្រភពបានប្រាប់រ៉យទ័រថា ពលរដ្ឋរុស្ស៊ីបាននិងកំពុងផ្លាស់ទីមូលធនរបស់ពួកគេពីប្រទេសស្វីស និងចក្រភពអង់គ្លេសទៅកាន់ទីក្រុងឌូបៃ បន្ទាប់ពីប្រទេសទាំងពីរបានដាក់ទណ្ឌកម្មលើប្រទេសរុស្ស៊ីនិងបានគំរាមបង្កកទ្រព្យសម្បត្តិរបស់អ្នកជំនួញនិងអ្នកនយោបាយដ៏លេចធ្លោរបស់រុស្ស៊ី។
