នៅមួយថ្ងៃបន្ទាប់ពីការវាយប្រហារលើមូលដ្ឋានសម្ងាត់"Tower22"ក្នុងប្រទេសហ្ស៊កដានីបានសម្លាប់ទាហានអាមេរិកបីនាក់ មានការអះអាងថ្មីដែលបានបង្កឱ្យមានការព្រួយបារម្ភ។ សមាជិកសភារុស្ស៊ីម្នាក់បានស្នើឲ្យលោកពូទីនដាក់អាវុធនុយក្លេអ៊ែររបស់ទីក្រុងមូស្គូនៅក្នុង«ប្រទេសជាមិត្ត»ដែលនៅក្បែរសហរដ្ឋអាមេរិក។ ប្រធានាធិបតីឆេកបានជំរុញឱ្យអង្គការណាតូត្រៀមខ្លួនសម្រាប់ការអាចវិលត្រឡប់របស់លោក Donald Trump ទៅកាន់សេតវិមាន និងការផ្លាស់ប្តូរយុទ្ធសាស្ត្ររបស់ទីវ៉ាស៊ីនតោនសម្រាប់អឺរ៉ុប។
-
តើដ្រូនអ៊ីរ៉ង់ចូលមូលដ្ឋាន Tower 22 នៅហ្ស៊កដានីដោយរបៀបណា?
យោងតាមសារព័ត៌មាន Straight Arrow News ចុះផ្សាយថ្ងៃទី៣១ ខែមករាបានអោយដឹងថា នៅមួយថ្ងៃបន្ទាប់ពីការវាយប្រហារលើមូលដ្ឋានសម្ងាត់"Tower 22" ក្នុងប្រទេសហ្ស៊កដានីបានសម្លាប់ទាហានអាមេរិកបីនាក់ មានការអះអាងថ្មីដែលបានបង្កឱ្យមានការព្រួយបារម្ភ។ របាយការណ៍បាននិយាយថាការការពារដែនអាកាសរបស់សហរដ្ឋអាមេរិកទំនងជាបរាជ័យក្នុងការស្ទាក់ចាប់ដ្រូនវាយប្រហារនៅខណៈពេលមានការភាន់ច្រឡំអំពីអត្តសញ្ញាណរបស់ដ្រូនដែលខិតចូលមកជិត។
មន្ត្រីអាមេរិកបានបញ្ជាក់ប្រាប់ Fox News ថា ដ្រូនប្រូកស៊ីរបស់អ៊ីរ៉ង់បានឆ្លងកាត់ប្រព័ន្ធការពារដែនអាកាសមូលដ្ឋាន Tower 22 ព្រោះវាត្រូវបានយល់ច្រឡំថាជាដ្រូនរបស់អាមេរិកវិលត្រឡប់មកមូលដ្ឋានវិញ។ របាយការណ៍បឋមដែលដកស្រង់ដោយមន្ត្រីពីររូបអះអាងថា ដ្រូនរបស់សត្រូវបានហោះហើរក្នុងរយៈកម្ពស់ទាបនៅខណៈពេលជាមួយគ្នានឹងដ្រូនរបស់អាមេរិកបានវិលត្រលប់មក មូលដ្ឋាន Tower 22 វិញ។
ជាលទ្ធផលគ្មានការប្រឹងប្រែងណាអាចបាញ់ទម្លាក់ដ្រូនរបស់សត្រូវ ដែលបានវាយប្រហារលើទីស្នាក់ការនោះ និងបានសម្លាប់ទាហានអាមេរិកបីនាក់នោះទេ។ អាមេរិកកំពុងវាយតម្លៃថាមានលទ្ធភាពដែលដ្រូនរបស់សត្រូវត្រូវបានចេតនាដាក់មកក្បែរនឹងដ្រូនរបស់អាមេរិកដែលវិលត្រឡប់មកវិញ ដើម្បីធ្វើឲ្យវាពិបាកក្នុងការរកឃើញ។
-
សមាជិកសភារុស្ស៊ីជំរុញពូទីនដាក់អាវុធនុយក្លេអ៊ែរនៅCuba ជិតUSA
យោងតាមសារព័ត៌មាន Times Of India ចុះផ្សាយថ្ងៃទី៣០ ខែមករាបានអោយដឹងថា សមាជិកសភារុស្ស៊ីម្នាក់បានស្នើឲ្យលោកពូទីនដាក់អាវុធនុយក្លេអ៊ែររបស់ទីក្រុងមូស្គូនៅក្នុង«ប្រទេសជាមិត្ត»ដែលនៅក្បែរសហរដ្ឋអាមេរិក។ សមាជិកសភារុស្ស៊ីលោក Aleksey Zhuravlev បាននិយាយថា ទីក្រុងមូស្គូគួរតែដាក់ពង្រាយអាវុធនុយក្លេអ៊ែរឱ្យកាន់តែជិតសហរដ្ឋអាមេរិក ដោយបញ្ជូនពួកវាទៅកាន់ "ប្រទេសជាមិត្តដូចជាគុយបា វេណេហ្ស៊ុយអេឡា និងនីការ៉ាហ្គា"។
សេចក្តីថ្លែងការណ៍នេះបានធ្វើឡើងតែនៅរយៈពេលពីរថ្ងៃបន្ទាប់ពីមានរបាយការណ៍បាននិយាយថាសហរដ្ឋអាមេរិកគ្រោងនឹងដាក់ពង្រាយអាវុធនុយក្លេអ៊ែររបស់ខ្លួននៅក្នុងចក្រភពអង់គ្លេសជាលើកដំបូងក្នុងរយៈពេល 15 ឆ្នាំ។ សមាជិកសភារុស្ស៊ីក៏បានគំរាមទីក្រុងវ៉ាស៊ីនតោនផងដែរអំពីការវាយប្រហារដោយមីស៊ីលលឿនជាងសំឡេងលើសហរដ្ឋអាមេរិក។
-
ប្រធានាធិបតីឆេកបារម្ភ Trump ចរចាជាមួយពូទីន
យោងតាមសារព័ត៌មាន Tasnim News ចុះផ្សាយថ្ងៃទី៣០ ខែមករាបានអោយដឹងថា ប្រធានាធិបតីឆេកបានជំរុញឱ្យអង្គការណាតូត្រៀមខ្លួនសម្រាប់ការអាចវិលត្រឡប់របស់លោក Donald Trump ទៅកាន់សេតវិមាន និងការផ្លាស់ប្តូរយុទ្ធសាស្ត្ររបស់ទីវ៉ាស៊ីនតោនសម្រាប់អឺរ៉ុប។
លោក Pavel បារម្ភថា ប្រសិនបើលោក Trump ឡើងកាន់អំណាច លោកអាចនឹងធ្វើកិច្ចព្រមព្រៀងជាមួយប្រធានាធិបតីរុស្ស៊ីលោក ពូទីន។ លោកបាននិយាយថា"នេះមិនមែនជាការរំខានដល់ចំណងឆ្លងមហាសមុទ្រអាត្លង់ទិក ដែលកំពុងប្រកួតប្រជែងជាមួយសហរដ្ឋអាមេរិកជាសម្ព័ន្ធមិត្តនោះទេ។ ប៉ុន្តែយើងគួរតែទទួលស្គាល់ការពិតថា លោក Donald Trump មើលទៅលើរឿងមួយចំនួនខុសគ្នា... យើងគួរតែត្រៀមខ្លួនសម្រាប់រឿងនោះ ព្រោះវាពិតជានឹងមានផលវិបាកមួយចំនួន "។
