កាលពីយប់ថ្ងៃទី៣ ខែវិច្ឆិកាកន្លងទៅនេះ លោកជីដេវីតបានបង្ហោះឡើងនូវតារាងកាលវិភាគមួយនៃគំរោងធ្វើកម្មវិធីShowtime របស់លោកនៅតាមបណ្តាខេត្តនានានៅលើបណ្តាញសង្គមហ្វេសប៊ុក។ កត់សម្គាល់ឃើញថានៅក្នុងតារាងកាលវិភាគមួយនោះបានបង្ហាញឡើងនូវកាលបរិច្ឆេទ និងទីតាំងយ៉ាងជាក់លាក់សំរាប់រៀបចំធ្វើឡើងកម្មវិធីនៅក្នុងអំឡុងពេលចាប់ផ្តើមពីចុងឆ្នាំ២០២២នេះបន្តរហូតមកដល់ឆ្នាំ២០២៣ខាងមុខនេះទៀតផង។ គួរបញ្ជាក់ផងដែរកម្មវិធី Showtime មួយនេះមិនមែនជា Tour Concert នោះទេតែត្រឹមជាកម្មវិធីជួបជុំមួយត្រូវបានរៀបចំឡើងដោយក្រុមហ៊ុនគាំទ្រលោកជីដេវីតនៅពីក្រោយប៉ុណ្ណោះ។ យ៉ាងណាមិញយើងនៅមិនទាន់ច្បាស់នោះទេ ថានឹងមានព្រឹត្តិការណ៍អ្វីខ្លះនៅក្នុងកម្មវិធី Showtime របស់លោកជីដេវីត មានតែរង់ចាំពត៌មានបន្ថែមលំអិតនិងច្បាស់ជាងនេះបញ្ជាក់ជូនឡើងដោយលោកជីដេវីតផ្ទាល់។ បណ្តាអ្នកគាំទ្ររបស់លោកជីដេវីតខ្លះរំពឹងថានឹងបានជួបជាមួយលោកជីដេវីតផ្ទាល់នៅក្នុងខេត្តដែលពួកគេរស់នៅ និងសង្ឃឹមថាទទួលបានហត្ថលេខាដ៏ស្រស់ស្អាតពីលោកជីដេវីតផងដែរ។ មិនតែប៉ុណ្ណោះពួកគេជឿជាក់ថាថ្វីបើមិនមែនជា Tour Concert តែច្បាស់ជាមានការសម្តែងឡើងអមជាមួយការប្រគំតន្រ្តីខ្លះៗពីលោកជីដេវីតជាមិនខាន។ បន្ទាប់ពីក្រលេកមើលលើតារាងកាលវិភាគរបស់លោកជីដេវីត ក៏ឃើញថាបងប្អូនអ្នកគាំទ្រដែលរស់នៅក្នុងទឹកដីក្នុងសហគមន៍ក្នុងខេត្តក្រុងទាំង៨នេះច្បាស់ជាត្រូវរីករាយជាមិនខាន ដោយក្នុងនោះមានក្រុងព្រះសីហនុ នៅថ្ងៃទី៩ ខែវិច្ឆិកានេះ និងនៅថ្ងៃទី៣១ ខែធ្នូ ឆ្នាំ២០២២ ចំនែកក្រុងប៉ោយប៉ែតនៅថ្ងៃទី១៨ ខែវិច្ឆិកា ឆ្នាំ២០២២ និងថ្ងៃទី៧ ខែមករា ឆ្នាំ២០២៣ រីឯក្រុងភ្នំពេញនឹងធ្វើឡើងនៅក្នុងថ្ងៃទី១៩ និងទី២៦ខែវិច្ឆិកានេះ និងមួយថ្ងៃទៀតនៅថ្ងៃទី០៣ ខែធ្នូ ឆ្នាំ២០២២។ ក្រៅពីនេះមានខេត្តបាត់ដំបងនៅក្នុងថ្ងៃទី១៨ ខែធ្នូ ឆ្នាំ២០២២ និងខេត្តសៀមរាប ហើយស្វាយរៀងនៅក្នុងថ្ងៃទី១៤ ​​​និងថ្ងៃទី២៨ ខែមករា ឆ្នាំ២០២៣។ បន្ទាប់មកទៀតគឺខេត្តព្រៃវែង និងកំពង់ចាមដែលកំណត់ធ្វើឡើងនៅថ្ងៃទី០៤ និងទី១១​​​ខែកុម្ភៈរៀងគ្នា ឆ្នាំ២០២៣​​​នេះ។