កាលពីថ្ងៃទី១៨ ខែធ្នូកន្លងទៅនេះ លោកជីដេវីតបានចូលរួមសម្តែងនៅក្នុងការប្រគំតន្រ្តី Pleng Cambodia Top 50 ជាមួយនឹងសិល្បករកិត្តិយសជាច្រើនរូបទៀតនៅឯខេត្តសៀមរាបដោយមានការផ្សាយបន្តផ្ទាល់នៅលើទំព័រហ្វេសប៊ុកផ្លូវការរបស់ Pleng ផងដែរ។ គួរបញ្ជាក់ផងដែរសិល្បកររបស់យើងមានដូចជាអ្នកនាងពេជ្រសូលីកា កញ្ញាយូរី លោកនីរតនា ក្រុម La Cima Cartel លោកHeng កញ្ញា Tey លោក Glomyy Vincent លោក Raksa និងលោក Vi Kit និងក្រុម EMT Music ផងដែរ។ នៅក្នុងការសម្តែងរបស់លោកជីដេវីត លោកបានជ្រើសរើសបទចម្រៀងទាំង៤បទមកសម្តែងរួមមាន My Brother, I’m Bored, How about now? និងរាំពាក់ម៉ាស់។ 

យ៉ាងណាមិញការសម្តែងរបស់លោកពិតជាបានផ្តល់បរិយាកាសសប្បាយរីករាយជាខ្លាំងដោយលោកជីដេវីតបានទៅទទួលយកកាដូពីទស្សនិកជនម្តងមួយៗនៅក្នុងខណៈពេលសម្តែង និងខ្លះទៀតក៏យកមកពាក់លំអនៅលើខ្លួនរបស់លោកតែម្តង។ នៅចុងបញ្ចប់នៃការសម្តែងលោកជីដេវីតបានជ្រើសរើសអានកាដូស៊ុមរូបថតមួយពីហ្វេនរបស់លោកម្នាក់ដែលជាលិខិតផ្ញើពី TopFan សហគមន៍របស់លោកដែកត្រូវបានរក្សាយ៉ាងស្អាតនៅក្នុងស៊ុមរូបថតមួយ។ លោកជីដេវីតអានលិខិតនោះទៅកាន់អ្នកគាំទ្ររបស់លោកដោយអត្ថន័យរបស់វាបានរៀបរាប់ឡើងថាគេជាអ្នកគាំទ្ររបស់លោកជីដេវីតតាំងពីថ្នាក់បឋមមកថ្នាក់វិទ្យាល័យទៅហើយ ហើយក៏សូមអរគុណលោកជីដេវីតជាខ្លាំងដែលនៅតែបន្តនៅលើវិស័យមួយនេះមិនធ្វើអោយគេខកបំណងពិតមែន ហើយក៏បានបង្ហាញរបស់គេពេញចិត្តបទចម្រៀងទាំង៥បទរបស់លោកជីដេវីតទាំងនេះខ្លាំងមែនទែន។ 

ជាចុងក្រោយថែមទាំងបញ្ជាក់ដោយពាក្យបាវវចនថា សហគមន៍រីករាយ គុណធម៌ សីលធម៌ និងសុជីវធម៌ ដែលពិតជាប្លែកតែម្តងហើយ សូម្បីតែលោកជីដេវីតក៏នឹកឡើងហួសចិត្តផងដែរដោយលោកបាននិយាយឡើងថាពិតជាអរគុណខ្លាំងណាស់តែ​ដល់ថ្នាក់ផ្ញើជាលិខិតហើយមានស៊ុមមកបែបនេះទៀតជារឿងប្លែកមានតែមួយពិតមែននឹកឃើញមិនដល់នោះទេ។ ហើយលោកក៏បញ្ជាក់ប្រាប់ថារបស់របរទាំងនេះដែលលោកបានទទួលពីហ្វេននឹងត្រូវរក្សានៅក្នុងបន្ទប់យ៉ាងស្អាត ហើយលោកនឹងដើរចូលទៅមើលវានៅពេលមួយណាចង់ ពេលឃើញកាដូទាំងនេះហើយក៏នឹកឃើញថាខ្លួនឯងក៏មានអ្នកគាំទ្ររង់ចាំផងដែរ។ បន្ទាប់មកលោកជីដេវីតក៏បានពាក់បូរូបត្រចៀកដែលទទួលបានពីហ្វេនហើយក៏ដើរបង្ហាញម៉ូតតាមការស្នើរសុំពីពិធីករ ធ្វើអោយការប្រគំតន្រ្តីនេះជារាត្រីគួរអោយចងចាំបំផុតសំរាប់អ្នកទស្សនាផ្ទាល់ និងអ្នកទស្សនានៅគេហដ្ឋាន។