កាលពីថ្ងៃទី០៥ ខែតុលាកន្លងទៅនេះ កញ្ញាតន់ចន្ទ័សីម៉ាបានបង្ហោះរូបភាពផ័សស្ទ័រទាក់ទាញមួយសន្លឹកនៅលើហ្វេសប៊ុកផេកផ្លូវការរបស់កញ្ញាដោយបានបោះសំណួរសួរមកកាន់ទស្សនិកជនអោយទស្សន៍ទាយមើលតើដៃគូចម្រៀងរ៉េបជាមួយនាងគឺជាអ្នកណា ដោយពួកគេនឹងបង្ហាញខ្លួនសម្តែងលើឆាកតន្ត្រីជាមួយគ្នានៅក្នុងកម្មវិធី Galaxy Indoor នៅឯACE Lounge នៅក្នុងថ្ងៃទី០៨ ខែតុលាបន្តិចទៀតនេះ។ ទីបំផុតនៅថ្ងៃទី០៨ ខែតុលា មហាជនក៏បានស្គាល់ដៃគូចម្រៀងរ៉េបដ៏ស្រស់សង្ហាជាមួយនឹងកញ្ញានៅឯ ACE Lounge ដោយលោកគឺជាតារារ៉េបថ្មីនៅក្នុងផលិតកម្ម Galaxy Navatra មានឈ្មោះថា K-LA។ លោក K-LA បានឡើងសម្តែងជាមួយកញ្ញាតន់ចន្ទ័សីម៉ាយ៉ាងកន្រ្តាក់អារម្មណ៍ដោយលាក់មុខនៅក្រោមម៉ាសពណ៌ខ្មៅមួយដ៏អាថ៌កំបាំងនិងឡូយអស់ស្ទះ។ ពួកគេបានធ្វើការបកស្រាយបទចម្រៀងថ្មីមួយបទមានចំណងជើងថា«Oun The Best» ដែលជាបទហ៊ីបហប់រ៉េបឆ្លើយឆ្លងគ្នាគួរអោយជក់ចិត្ត និងពិរោះស្តាប់។ កញ្ញាតន់ចន្ទ័សីម៉ាបានអោយដឹងនៅលើខេបសិបរបស់កញ្ញានៅថ្ងៃសួរទស្សនិកជននោះថាពួកគេទាំងពីរនឹងមានគំរោងចេញអាល់ប៊ុម Galaxy Indoor នេះជាមួយគ្នា។ ចង់ដឹងថានៅពេលខាងមុខកញ្ញាតន់ចន្ទ័សីម៉ា និងលោក K-LA នឹងមានគំរោងច្រៀងនូវបទចម្រៀងអ្វីខ្លះទៀតសំរាប់កម្មវិធី Galaxy Indoor យើងមានតែត្រូវរង់ចាំតាមដានមើលទាំងអស់គ្នា។